މިސަރުކާރުގައި އާރްޓީއައި ނުލައި ހަމައެކަނި ލިބޭ ލިޔުމަކީ ޚުތުބާ: މެންބަރު ޒިޔާދު
މިސަރުކާރަށް އެއްއަހަރު ވެގެންދިޔައިރު، ސިޔާސީ މަގާމުތަކުގެ ޖުމްލަ އަދަދު ހާމަކޮށްފައިނުވޭ
ގިލަންވެރިކަމުގެ އެއްއަހަރު ޕްރޮގްރާމްގައި ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވެރިކަމުގައި އާރްޓީއައި ނުލައި ހަމައެކަނި ލިބޭ ލިޔުމަކީ ހުކުރު ޚުތުބާ ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.
ރައީސް މުއިއްޒުގެ ސަރުކާރަށް އެއްއަހަރު ފުރުމާއި ގުޅިގެން ރާއްޖެޓީވީން ގެނެސްދޭ ގިލަންވެރިކަމުގެ އެއްއަހަރު ޕްރޮގްރާމްގައި މެންބަރު ޒިޔާދު ވިދާޅުވީ ކޮރަޕްޝަނާއި ދެކޮޅަށް މަސައްކަތް ކުރަމަށް އައި ސަރުކާރުގެ ފަރާތުން ފެންނަނީ މުޅީން އެހެން ސިފައެއް ކަމަށެވެ.
މެންބަރު ޒިޔާދު ވިދާޅުވީ ކޮރަޕްޝަންއާ ދެކޮޅަށް މަސައްކަތްކޮށް ކޮރަޕްޝަން ނައްތާލަން މަސައްކަތް ކުރާނަމަ ކަންކަން ހާމަކުރުމަކީ ވަރަށް މުހިންމު ކަމެއް ކަމަށާއި، ހާމަކަން އިސްކުރަންޖެހޭ ކަމަށެވެ. ނަމަވެސް މިސަރުކާރުގެ ހާމަކުރުމުގެ ސިޔާސަތަކީ ހާމަނުކުރުމުގެ ސިޔާސަތެއް ކަމަށެވެ. ދިވެހިންގެ ރާއްޖެ ވަރަށް ތަފާތު ކަމަށާއި، މިސަރުކާރު ސިއްރު ކުރަން ނުޖެހޭ ކަންކަން ވެސް ސިއްރު ކުރަމުންދާ ކަމަށެވެ. އަދި ވިދާޅުވީ މިސަރުކާރަށް އެއްއަހަރު ވެގެންދިޔައިރު، ސިޔާސީ މަގާމުތަކުގެ ޖުމްލަ އަދަދު ހާމަކޮށްފައިނުވާ ކަމަށެވެ.
މެންބަރު ޒިޔާދު ވިދާޅުވީ މިސަރުކާރުގެ ހުރިހާ ދިމާލަކުން ފެނިގެންދަނީ ގިލަންވެރިކަން ކަމަށާއި، މިއީ ދިވެހިންގެ ރާއްޖޭގައި ދިވެހިންނަށް އޮތް މިންވަރު ކަމަށެވެ. އަދި މިއަށްވުރެ ދަށް ހާލަތެއް އޮތް ކަމަށްވާނަމަ ރައްޔިތުން ތިބީ ދިވެހިންގެ ރާއްޖޭގައި އުފަލުން ކަމަށް މިސަރުކާރުގެ ބޭފުޅުން ވިދާޅުވާނެ ކަމަށް މެންބަރު ޒިޔާދު ވިދާޅުވިއެވެ.
