މެންޗެސްޓަރ ޔުނައިޓެޑަކީ އިނގިރޭސި ޕްރިމިއަރ ލީގުގެ އިންޖީނު ކަމަށް، އެ ޓީމާ ދާދި ފަހުން އެ ޓީމުގެ ދާއިމީ ކޯޗަކަށް ހަމަޖެއްސި ޕޯޗުގަލްގެ ރުބެން އަމޯރިމް ބުނެފި އެވެ.

ޔުނައިޓެޑުގެ ކޯޗުކަމަށް އަމޯރިމް ހަމަޖެއްސީ އޭނާގެ ކުރިން އެ މަގާމުގައި ހުރި ނެދަލެންޑްސްގެ އެރިކް ޓެން ހާގް މަގާމުން ވަކި ކުރުމަށްފަހު އެވެ. ކޯޗުކަމުގެ މަގާމުން ޓެން ހާގް ވަކިކޮށްފައި ވަނީ އޭނާގެ އިރުޝާދުގެ ދަށުން މި ސީޒަންގައި، ޚާއްސަކޮށް ޕްރިމިއާ ލީގުގައި ޔުނައިޓެޑުގެ ނަތީޖާތައް ދަށްވެފައިވާތީ އެވެ. މި ސީޒަނަކީ ޔުނައިޓެޑުގެ ތާރީޚުގައި ވެސް ޕްރިމިއާ ލީގުގައި އެ ޓީމަށް އެންމެ ދަށް ނަތީޖާއާ ކުރިމަތިލާން ޖެހުނު ސީޒަނެވެ.

ޔުނައިޓެޑާ ރަސްމީކޮށް ހަވާލުވުމަށްފަހު ވާހަކަ ދައްކަމުން އަމޯރިމް ބުނީ، ޕްރިމިއާ ލީގުގެ އިންޖީނަކީ ޔުނައިޓެޑު ކަމަށެވެ. އަދި ވަކިން ޚާއްސަކޮށް، ޔުނައިޓެޑަކީ ފުޓުބޯޅައިގެ އިންޖީނުކަން އެންމެނަށް ވެސް އިނގޭނެ ކަމަށް އަމޯރިމް ބުންޏެވެ. އޭނާ ބުނީ ޔުނައިޓެޑުގެ އިސްވެރިން އަދި ޚާއްސަކޮށް އެ ކުލަބުގެ ސީއީއޯ އޭނާއާ ވާހަކަ ދައްކައި، ކުލަބާ މެދު އެމީހުން ގެންގުޅޭ ތަސައްވަރު ހިއްސާ ކުރުމުން، އެކަމާ އޭނާ ވަރަށް ގަޔާވި ކަމަށެވެ.

މިވަގުތު ޔުނައިޓެޑާ ހަވާލުވުމަކީ ވެސް ވަރަށް ބޮޑު ޚާއްސަ ޝަރަފެއް ކަމަށް އަމޯރިމް ޤަބޫލު ކުރެ އެވެ. އެއީ އަލުން ޔުނައިޓެޑު ކުރިއަށް ގެންދިޔުމަށް ކުރާ މަސައްކަތުގައި، ކުލަބުގެ އިސްވެރިންގެ ފުރަތަމަ ހޮވުމަކަށް އޭނާ ވުމުން ކަމަށް ވެސް އަމޯރިމް ބުންޏެވެ. އެހެންކަމުން މިވަގުތު އޭނާ ހަވާލުވަނީ ވަރަށް ބޮޑު ޒިންމާއަކާ ކަމަށާއި، އެކަން ކުރުމުގައި ދެމި ހުންނާނެ ކަމަށް ވެސް އަމޯރިމް ބުންޏެވެ.

މީގެ އިތުރުން އަމޯރިމް ބުނީ ޔުނައިޓެޑަކީ އަބަދު ވެސް އެންމެ ކުރީގައި އޮންނަން ޖެހޭ، އެންމެ ކާމިޔާބު ޓީމު ކަމަށެވެ. އަދި އަލުން އެ މަގާމަށް ޔުނައިޓެޑު ގެންދަން އޭނާ އަށް ރަނގަޅު މަސައްކަތްތަކެއް ކުރެވޭނެ ކަމަށާއި، ޔުނައިޓެޑަށް ހައްގުވާ މަގާމުގައި އެ ކުލަބު ބާއްވަން ކުރަން ޖެހޭ މަސައްކަތް އޭނާ އަށް ކުރެވޭނެ ކަމަށް ވެސް އަމޯރިމް ބުންޏެވެ. އޭނާ ފާހަގަ ކުރި ގޮތުގައި ޔުނައިޓެޑާ އެކު ކުރިއަށް ދާނީ މާޒީން ފެންނަން ހުރި ކާމިޔާބާއި، ހިތްދަތި ކަންތައްތަކުން ފިލާވަޅު ލިބިގެންނެވެ.

މީގެ ކުރިމް ބެންފީކާ އަދި ޕޯޗުގަލް ޤައުމީ ޓީމަށް ވެސް ކުޅެފައިވާ އަމޯރިމް ކޯޗިންގެ ކެރިއަރު ފެށީ 2018 ވަނަ އަހަރު އެވެ. އޭގެ ފަހުން ޔުނައިޓެޑު ވެގެން ދާނީ އަމޯރިން އިރުޝާދު ދޭނެ ހަތަރު ވަނަ ކުލަބަށެވެ. އޭނާ އެންމެ ފަހުން ހުރީ ޕޯޗުގަލްގެ ސްޕޯޓިންގެ ކޯޗުކަމުގަ އެވެ. އޭނާގެ އިރުޝާދުގެ ދަށުން ސްޕޯޓިން ވަނީ 231 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ 164 މެޗުންނެވެ. 34 މެޗު އެއްވަރުވެފައިވާއިރު، 33 މެޗުން ވަނީ ބަލިވެފަ އެވެ. އޭނާގެ އިރުޝާދުގެ ދަށުން ސްޕޯޓިން ވަނީ ފަސް ތައްޓެއް ވެސް ކާމިޔާބު ކޮށްފަ އެވެ.