ހިޔާ ޓަވަރުގައި މީހަކު ރަހީނުކުރުމުގެ ފަހަތުގައި އުޅެނީ 65 އަހަރުގެ މީހެއް

ހިޔާ ޓަވަރުގައި މީހަކު ރަހީނުކުރުމުގައި އިސްކޮށް އުޅެނީ މުހައްމަދު ސަލީމް ނަމަކަށް ކިޔާ މީހެއް ކަމަށް ފުލުހުން ބުނެފިއެވެ.

މިދިޔަ ބުރާސްފަތި ދުވަހުގެ ރޭ ހިޔާ ފްލެޓެއްގެ ތެރޭގައި މީހަކު ރަހީނުކޮށްގެން އަނިޔާކުރި މައްސަލައިގައި ތަފްސީލުދިނުމަށް ފުލުހުން ބޭއްވި ނޫސްވެރިންގެ ބައްދަލުވުމުގައި މިކަމާއި ގުޅޭގޮތުން ހެޑް އޮފް ޑްރަގް އެންފޯސްމަންޓް، ސްޕްރިންޑެންޓެޑް އޮފް ޕޮލިސް ނާހިދު ހުސައިން ވިދާޅުވީ މަސްތުވާތަކެތީގެ މައްސަލައިގައި ރަހީނުކޮށް އަނިޔާދީފައިވާ މީހާގެ މައްސަލައިގެ ފަހަތުގައި ހުރިމަށް ތުހުމަތުކުރެވެނީ ރ. އިންނަމާދޫ، ފެރޯމާގޭ، މުހައްމަދު ސަލީމު ކަމަށެވެ.

އޭނާ ހައްޔަރުކޮށް ބުދަ ދުވަހު ވަނީ ކްރިމިނަލް ކޯޓުން ބަންދުގެ މުއްދަތުވެސް ޖަހާފައެވެ. އޭނާގެ ބަންދަށް ދީފައިވަނި 15 ދުވަހެވެ. 65 އަހަރުގެ މުހައްމަދު ސަލީމްގެ މައްޗަށް ތުހުމަތުކުރަނީ މަސްތުވާތަކެތި ބޭނުންކޮށްގެން ވިޔަފާރިކުރުމެވެ. ކޯޓު އަމުރުގައިވަނީ އޭނާގެ މައްޗަށް ކޮންމެވެސް މިންވަރެއްގެ ތުހުމަތެއް ވުޖޫދުވާވަރަށް ހެކި ލިބިފައިވާ ކަމަށް ފެންނަ ކަމަށެވެ. އެގޮތުން ހުށަހެޅިފައިވާ ފުލުހެއްގެ ބަޔާނުން އޭނާގެ ޖީބުންނާއި އޭނާ ހުރި އެޕާޓްމަންޓު ތެރެއިން މަސްތުވާތަކެތިކަމަށް ޝައްކުކުރެވޭ ތަކެތި ފެނިފައިވާ ކަމަށެވެ.

އަދި ފެނުނު ތަކެތީގެ ތެރޭގައި ވަގުތީގޮތުން ބެލިބެލުމުން 2 ގްރާމުގެ މެތް އަދި 1 ގްރާމުގެ ހެރޮއިން ހުރި ކަމަށް ބަޔާންކޮށްފައިވާ އިރު، މިއީ ގާނޫނީ ގޮތުން ބަލާއިރު ގިނަ އަދަދެއްގެ ތަކެތި ހިމެނެއެވެ. އަދި ފެނުނު ތަކެއްޗަކީ އެކި ބާވަތުގެ ތަކެތި ކަމުގައިވުމުން، އޭނާއަކީ މަސްތުވާތަކެތީގެ ވިޔަފާރިކރުުމުގައި ބައިވެރިވުމެއް އޮތް ފަރާތެއް ކަމަށް ބެލެވޭތީ، މިފަދަ ފަރާތެއް ބަންދުން ދޫކޮށްލައިފިނަމަ މުޖްތމައުގެ ސަލާމަތަށް ނުރައްކަލެއް އޮތްކަމަށް ފެންނަ ކަމަށެވެ.

މުހައްމަދު ސަލީމުގެ ހަށިގަނޑުން ޝައްކު ކުރެވޭ އެއްޗެއް ހުރި 13 ރަބަރު ޕެކެޓް ފެނިފައިވެއެވެ. އަދި އޭނާ ދިރިއުޅޭ އެޕާޓްމަންޓް ބަލާ ފާސްކުރިއިރު މަސްތުވާތަކެއްޗަށް ޝައްކުކުރެވޭ އެއްޗެއް ހުރި 8 ރަބަރު ޕެކެޓް ފެނިފައިވެއެވެ.

ސްޕްރިންޑެންޓެޑް އޮފް ޕޮލިސް ނާހިދު ހުސައިން ވިދާޅުވީ މި މީހާއަކީ އުމުރުދުވަހަށް ޖަލަށްލާފައިވާ މީހެއް ކަމަށެވެ. އެގޮތުން 2016 ވަނަ އަހަރު މަސްތުވާތަކެތީގެ ޑައިނޯމިން ޓްރެފިކް ކުރުމުގެ މައްސަލައެއްގައި ކްރިމިނަލް ކޯޓުގައި ދައުވާކުރެވި 17 މާރޗް 2019 ގައި ސާބިތުވާކަމަށް ކަނޑައަޅާ އުމުރުދުވަހަށް ޖަލަށް ލާފައިވާ ކަމަށް އޭނާ ވިދާޅުވިއެވެ. އަދި މި ހުކުމް 6 އޮކްޓޯބަރ 2022 ގައި ހައިކޯޓުން ދަމަހައްޓާފައިވާ އިރު، މި މައްސަލައިގެ ހުކުމް ތަންފީޒްކުރަމުން ދަނިކޮށް 2021 ޖުލައި 8 ވަނަ ދުވަހު މީނަވަނީ ގޭބަންދަށް ބަދަލުކުރެވުނު ކަމަށެވެ. އަދި 2023 ވަނަ އަހަރު ޑައިނޯމިކް ޓްރެފިކްކުރުމުގެ އިތުރު މައްސަލައެއްގައި ހުޅުމާލޭ ކޯޓުގައި މިހާރުވެސް ޝަރީއަތް ހިނގަމުންދާކަމަށް ނާހިދު ވިދާޅުވިއެވެ.