ފަތުރުވެރިކަމުގެ ދާއިރާ އަށް އަމާޒުކޮށް ތައާރުފް ކުރި ބޭރު ފައިސާ އާ ބެހޭ ގަވައިދަށް ރަސްމީ ކޮށް އިއުތިރާޒް ކުރައްވާ ކަމަށް ރާއްޖޭގެ ފަތުރުވެރިކަމުގެ ދާއިރާގައި އެންމެ ފުންނާބު އުސް އެއްފަރާތް ކަމަށްވާ ޗަމްޕާ މުހައްމަދު މޫސާ (އުއްޗު) ސޮއިކުރައްވާ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ފޮނުއްވި ސިޓީ އަކުން ދަންވައިފިއެވެ.
އެމްއެމްއޭ ގެ ގަވައިދާ ގުޅޭ ގޮތުން ހުރި ގިނަ ކަންބޮޑުވުންތަކެއް ފާހަގަ ކުރައްވާ މުހައްމަދު މޫސާ ސޮއިކުރައްވައި އޭނާގެ ރިސޯޓްތައް ހިންގާ ތިން ކުންފުނި ކަމަށްވާ ޗަމްޕާލާސް ހޯލްޑިންގްސް، ކޮމަންޑޫ ހޯލްޑިންގްސް އަދި ކުރެއްދޫ ހޯލްޑިންގްސް އިން އެމްއެމްއޭގެ ގަވަރުނަރު އަހުމަދު މުނައްވަރަށް އެޑްރެސްކޮށް އަންގާރަ ދުވަހު ވަނީ ސިޓީއެއް ފޮނުއްވާފައެވެ.
އެމްއެމްއޭ އިން ފަތުރުވެރިކަމުގެ ދާއިރާ އަށް އަމާޒުކޮށް ތައާރުފް ކުރި ގަވައިދުގައިވާ ގޮތުން، މުދާ ވިއްކާ އަދި ޚިދުމަތް ފޯރުކޮށްދޭ ފަރާތްތަކުން، ކަލަންޑަރު މަހެއްގައި ވިއްކާފައިވާ މުދަލަށް ނުވަތަ ފޯރުކޮށްދީފައިވާ ޚިދުމަތަށް ލިބޭ ޖުމްލަ ބޭރު ފައިސާ އެ މަހެއްގެ ފަހުން އަންނަ ތިންވަނަ މަހުގެ 28 ވަނަ ދުވަހުގެ ކުރިން ބޭންކެއްގައި ހުޅުވާފައިވާ ބޭރު ފައިސާގެ އެކައުންޓަކަށް ޓްރާންސްފަރ ކުރަން ނުވަތަ ޖަމާކުރަން ވަނީ ލާޒިމު ކޮށްފައެވެ.
އޭގެ އިތުރުން، ރިސޯޓު ހިންގާ ފަރާތުން، ކޮންމެ ކަލަންޑަރު މަހަކަށް، އެ ތަނަކަށް އަންނަ ފަތުރުވެރިންގެ އަދަދާ އެއްވަރުގެ ޖުމްލަ އަދަދެއް، ކޮންމެ ފަތުރުވެރިއަކަށް 500 (ފަސްސަތޭކަ) އެމެރިކާ ޑޮލަރުގެ ރޭޓުން ރުފިޔާއަށް ބަދަލުކޮށް، އެ މަހެއްގެ ފަހުން އަންނަ ތިންވަނަ މަހުގެ 28 ވަނަ ދުވަހުގެ ކުރިން ޖަމާކުރަން ޖެހެއެވެ.
މި ނޫހަށް ކޮޕީ ލިބިފައިވާ, އުއްޗު ފޮނުއްވި ސިޓީގައި ވިދާޅުވެފައި ވަނީ، ފަތުރުވެރިކަމުގެ ދާއިރާގެ ވިޔަފާރިތަކަށް ހަމައެކަނި އަމާޒުކޮށް ތަޢާރަފުކޮށްފައިވާ މި ގަވައިދަކީ "ބޭއިންސާފު އަދި އަމަލީ ގޮތުން ތަންފީޒް ކުރަން އުނދަގޫ" ގަވައިދެއް ކަމަށެވެ.
"އެހެން ކަމުން އެ ގަވައިދަށް ރަސްމީ ކޮށް އިޢުތިރާޟުކުރަން،" އުއްޗު ވިދާޅުވެފައިވެއެވެ.
ބޭރު ފައިސާ އާ ބެހޭ އައު ގަވައިދަކީ ކަމާބެހޭ ފަރާތްތަކާ އެއްވެސް މަޝްވަރާކުރުމެއް ނެތި ވަރަށް ކުއްލިއަކަށް ތަޢާރުފު ކުރެވުނު ގަވައިދެއް ކަމީ އިންތިހާ އަށް ކަންބޮޑުވާ ކަމެއް ކަމަށް ސިޓީގައި ފާހަގަ ކުރައްވާފައިވެއެވެ.
"އެހެން ކަމުން، މި ގަވާއިދު އިންސާފުވެރި، ޢަދުލުވެރި، ހަމަހަމަ އަދި ޢަމަލީގޮތުން ތަންފީޒު ކުރެވޭނެ ގޮތަކަށް ބަދަލުކުރުމަށް ނުވަތަ އުވާލުމަށް ސަރުކާރުން އަޅަންޖެހޭ ހުރިހާ ފިޔަވަޅެއް ވަގުތުން އެޅުމަށް އެދޭ ކަމުގައި،" ސިޓީގައި ވެއެވެ.
މި ގަވާއިދުގެ ދަށުން ތަޢާރުފު ކޮށްފައިވާ ކަންތައްތަކުން ނޭދެވޭ އަސަރު ކުރާނީ ހަމައެކަނި ފަތުރުވެރިކަމުގެ ދާއިރާގެ ވިޔަފާރިތަކަށް ނޫން ކަން ފާހަގަ ކުރަމުން ސިޓީގައި ބުނެފައިވަނީ މި ގަވައިދު އެކުލަވާލުމުގައި މުޅި ދިވެހި އިޤްތިޞާދަށް ކޮށްފާނެ ނުރައްކާތެރި އަސަރައް ވެސް ރިޢާޔަތްކޮށްފައެއް ނުވާ ކަމަށެވެ.
އެމްއެމްއޭ ގެ ގަވައިދުގައި ބުނާ ކަންކަމަކީ ފީސިބަލް ކަންކަމަށް ނުވުމުގެ އިތުރުން، ޢަމަލީގޮތުން ކުރަން އުނދަގޫ ކަންތައްތައް ތަކެއް ކަން ސާފުކޮށް ދައްކުވައިދޭ އެތައް ސަބަބެއް އެމްއެމްއޭ އަށް އުއްޗު ފޮނުއްވި ސިޓީގައި ވަނީ ފާހަގަ ކުރައްވާފައެވެ.
މިހާރު އޮތް ގޮތުން މި ގަވާއިދަކީ ކުރު ރާސްތާގެ ވިސްނުމެއްގައި އެކުލަވާލާފައިވާ އަދި ދިވެހި ސަރުކާރުގެ މިހާރުގެ ދަރަނީގެ ހާލަތު ވަގުތީގޮތުން ހޯދާ ފަރުވާއެއްކަން ސާފުކޮށް އެނގޭ ކަމަށް ވެސް ސިޓީގައި ވެއެވެ. އަދި މީގެ ސަބަބުން ކުދި އަދި މެދު ފަންތީގެ ވިޔަފާރިތައް ހިމެނޭ ގޮތަށް މުޅި ދިވެހި އިޤްތިޞާދަށް ދުރު ރާސްތާގައި މާ ބޮޑު އަދި ނުރައްކާތެރި އަސަރެއް ކުރާނެ ކަމަށްވެސް ސިޓީގައި ފާހަގަ ކުރައްވާފައިވެއެވެ.
"40 އަހަރަށްވުރެ ގިނަ ދުވަހުގެ ތަޖުރިބާ ލިބިފައިވާ ރިސޯޓު އޮޕަރޭޓަރުންގެ ހައިސިއްޔަތުން، ޤައުމުގެ އެންމެ މަޞްލަޙަތު ހުރި ގޮތުގައި ސަރުކާރުގެ ލަނޑުދަނޑިތަކަށް އެހީތެރިވުމަށް އަޅުގަނޑުމެން ތައްޔާރަށް ތިބީމެވެ. ނަމަވެސް، މިހާރު ހުށަހަޅާފައިވާ ގޮތަށް މި ގަވާއިދު ދެމެހެއްޓެނިވި ގޮތެއްގައި ކުރިއަށް ގެންދެވޭނެ ކަމަކަށް އަޅުގަނޑުމެން ގަބޫލެއް ނުކުރަމެވެ." ސިޓީގައި ވެއެވެ.
އެމްއެމްއޭ އަށް އުއްޗު ފޮނުއްވި ސިޓީގައި ރިސޯޓު އޮޕަރޭޓަރުން މިހާރުވެސް ޓެކްސްތަކާއި، ކުލިތަކާއި، ފީތަކުގެ ގޮތުގައި ޤައުމުގެ އިޤްތިޞާދަށް ބޮޑު ހިއްސާއެއް ކުރާ ކަމަށާއި، ނަމަވެސް، މި އިތުރު މާލީ އިލްތިޒާމްތަކުގެ ސަބަބުން ފައިދާ ކުޑަވެ، އައު އިންވެސްޓްމަންޓްތައް މަދުވެ، ދިވެހިރާއްޖޭގެ ހޮސްޕިޓަލިޓީ ޞިނާޢަތުގެ ދިގު މުއްދަތުގެ ދެމެހެއްޓެނިވިކަމާމެދު އަލުން ވިސްނަން ޖެހޭނެ ކަން ފާހަގަ ކުރައްވާފައިވެއެވެ.
"އިންވެސްޓަރުންގެ އިތުބާރު ގެއްލުމުގެ ސަބަބުން ގެއްލުންވާނީ ހަމައެކަނި ފަތުރުވެރިކަމުގެ ދާއިރާއަށް ނޫން، ދިވެހިރާއްޖޭގެ މުޅި އިޤްތިޞާދީ މަސްރަޙަށް ގެއްލުންތަކެއް ކުރިމަތިވާނެއެވެ." އުއްޗުގެ ސިޓީގައި ވިދާޅުވެފައިވެއެވެ.
"މަތީގައި ބަޔާންކޮށްފައިވާ ކަންކަމަށް ރިޢާޔަތްކޮށް، ވަގުތުން މި ގަވާއިދު އުވާލުމަށް ނުވަތަ، މުޅި ދިވެހި އިޤްތިޞާދަށް ދިގު މުއްދަތަކަށް ދެމިގެންދާނެ ފައިދާހުރި އަސަރެއް ކުރާނެ ފަދަ ގޮތަކަށް ގަވާއިދެއް ތަޢާރަފުކުރުމަށް ކަމާގުޅޭ ހުރިހާ ފަރާތްތަކާ މަޝްވަރާ ކޮށްގެން މަސައްކަތްކުރުމަށް،" ސަރުކާރަށް އުއްޗު ފޮނުއްވި ސިޓީގައި ވަނީ ގޮވާލައްވާފައެވެ.
