ޔާމީންގެ ވެރިކަން ނިމުނު އިރު ރިޒާވްގައި ހުރީ 572 މިލިއަން ޑޮލަރު، ޔޫޒަބަލް ރިޒާވްގައި ހުރީ 162 މިލިއަން ޑޮލަރު، އެސްޑީއެފްގައި ހުރީ 1.9 ބިލިއަން ރުފިޔާ - ޞާލިހު
ދައުލަތުގެ ރިޒާވްއެއް ހުރިއްޔާ އޮތީ ޖީއެމްއާރުއަށް ދީފައި
ކުރީގެ ރައީސް ޞާލިހު އެމްޑީޕީގެ 'ފުދިއްޖެ، ފުނޑިއްޖެ' ޖަލްސާގައި ވާހަކަ ދައްކަވަނީ
ރައީސް ޔާމީންގެ ވެރިކަން ނިމުނު އިރު ރިޒާވްގައި ހުރީ 572 މިލިއަން ޑޮލަރު ކަމަށާއި، ޔޫޒަބަލް ރިޒާވްގައި ހުރީ 162 މިލިއަން ޑޮލަރާއި، އެސްޑީއެފްގައި ހުރީ 1.9 ބިލިއަން ރުފިޔާ ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އަންގާރަ ދުވަހުރޭ ގިނަ ބަޔަކު ހާޒިރުވި އާޓިފިޝަލް ބީޗް ގައި އޮތް ޖަލްސާގައި، ރައީސް ޔާމީން ދެއްކެވި ވާހަކަފުޅަށް ރައްދު ދެއްވާ އެމަނިކުފާނު ވިދާޅުވީ ވެރިކަމުން ފައިބައިވަޑައިގެންނެވި އިރު 1 ބިލިއަން ޑޮލަރު ރިޒާވުގައި ހުންނާނެކަމަށް ދެއްކެވި ވާހަކައަކީ ބުހުތާނު ދޮގެއް ކަމަށެވެ. ރައީސް ޞާލިހު ވިދާޅުވީ ރައީސް ޔާމީންގެ ވެރިކަން ނިމި ވެރިކަން ބަދަލުވި އިރު ނޮވެމްބަރު މަހުގައި ދައުލަތުގެ ރިޒާވުގައި ހުރީ 572 މިލިއަން ޑޮލަރު ކަމަށެވެ.
އަދި ޔޫޒަބަލް ރިޒާވުގެ ގޮތުގައި 200 މިލިއަން ޑޮލަރުވެސް ނެތް ކަމަށެވެ.
ރައީސް ޞާލިހު ވިދާޅުވީ މިއަދު ގައުމު ސަލާމަތްވެފައި އޮތީ އެދުވަހު ކުރި މަސައްކަތުން ކަމަށާއި، 2022 ވަނަ އަހަރު އައި އިރު އިގްތިސާދު އެހިސާބަށް ދިޔައީ އެދުވަހު އެ މަސައްކަތް ކުރުމުން ކަމަށާއި، ނަމަވެސް މިއަދު މި ފެންނަނީ އިގްތިސާދުގެ ކުރިއެރުން ހުއްޓިފައިވާތަން ކަމަށެވެ.
ރައީސް ޞާލިހު މިފަދައިން ވިދާޅުވެފައިވަނީ ކޮވިޑްގެ އާލަމީ ވަބާގައި، ރޭވުންތެރިކަމާއެކު، އެހީތައް ހޯދަ، އިގްތިސާދު ކޮޅަށްޖަހާ ކުރި މަސައްކަތަށް އިޝާރާތްކުރައްވައެވެ. އެގޮތުން އަވަށްޓެރި ގައުމުތަކުން މާލީ އެހީތެރިކަން ހޯދާ، ވިޔަފާރިތަކަށް އެހީތެރިކަން ފޯރުކޮށްދީ، ރިސޯޓްތަކުގެ ކުލި މާފްކުރައްވާ އިގްތިސާދީ އަދި މާލީ ކާރިސާއަކަށް ނުގޮސް އަރައިގަތުމަށް އެއިރުކުރެވުނު މަސައްކަތްތައް ހިމެނެއެވެ.
ރައީސް ޞާލިހު ވިދާޅުވީ އެމަނިކުފާނު ވެރިކަމަށް ވަޑައިގެން އިރު އެސްޑީއެފްގައި ހުރީ 1.9 ބިލިއަން ރުފިޔާ ކަމަށެވެ. ނަމަވެސް ވެރިކަމުން ފައިބައިވަޑައިގެން އިރުގައި އެސްޑީއެފްގެ ސައިޒަކީ 7.7 ބިލިއަން ރުފިޔާ ކަމަށެވެ.
ރައީސް ޞާލިހު ވިދާޅުވީ 1 އަހަރު ފުރުނު އިރުގައި ތިބި ހާލާއިމެދު ވިސްނާލަންޖެހޭ ކަމަށެވެ. ދިވެހި ތާރީހުގައި މަސްވެރިން އެންމެ ހާލުގައި އުޅެންޖެހިފައިވާ ދުވަސްވަރަކީ މިއީ ކަމަށާއި، އަގުކުޑަކޮށް ފައިސާކޮޅު ނުދޭ ކަމަށެވެ. މަސްވެރި ސިނާއަތްކޮޅަށް ޖެހުމަށް ފެށި ހުރިހާ މަސައްކަތް މި ސަރުކާރުން ހުއްޓާލާފައިވާ ކަމަށް ރައީސް ޞާލިހު ވިދާޅުވިއެވެ.
