އޮކްޓޯބަރު ނިމުނުއިރު އޮފިޝަލް ރިޒާވް 614.6 މިލިއަން ޑޮލަރަށް އިތުރުވެފައިވާ ކަމަށް އެމްއެމްއޭ އިން ބުނެފި

ސެޕްޓެމްބަރު ނިމުނުއިރު "އޮފިޝަލް ރިޒާވް އެސެޓްސް" 371.2 މިލިއަން ޔޫއެސް ޑޮލަރުގައި ހުރި ނަމަވެސް، އޮކްޓޯބަރު ނިމުނުއިރު އޮފިޝަލް ރިޒާވް އެސެޓްސް ވަނީ 614.6 މިލިއަން ޔޫއެސް ޑޮލަރަށް އިތުރުވެފައި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.

މީގެ އިތުރުން މި މުއްދަތުގައި އަދަރ ފޮރިން ކަރަންސީ އެސެޓްސްގެ ގޮތުގައި ހުރީ 122.5 މިލިއަން ޔޫއެސް ޑޮލަރު ކަމަށާއި މި ދެ ބަޔަކީ ވެސް އެމްއެމްއޭގެ ފޮރިން ކަރަންސީ އެސެޓްގެ ތެރޭގައި ހިމެނޭ ދެބައި ކަމަށްވެސް ބުނެފައިވެއެވެ.

އެމްއެމްއޭ އިން ހާމަ ކުރި އޮކްޓޫބަރު 2024ގެ ރިޒާވް ޑޭޓާ ޓެމްޕްލެޓާ ގުޅޭ ތަފުސީލާ ހާމަ ކުރުމުގެ ގޮތުން އަންގާރަ ދުވަހުގެ ރޭ ނެރުނު ނޫސްބަޔާނެއްގައި ބުނެފައިވަނީ އެމްއެމްއޭ އާއި ރިޒާވް ބޭންކް އޮފް އިންޑިއާ (އާރްބީއައި) އާއި ދެމެދު ދާދި ފަހުން ވެވުނު ކަރަންސީ ސްވޮޕް އެރޭންޖްމަންޓްގެ ދަށުން، އެ އޮތޯރިޓީ އަށް 400 މިލިއަން ޔޫއެސް ޑޮލަރު ލިބިފައިވާ ކަމަށެވެ.

"އާއްމުކޮށް އެމްއެމްއޭއިން މިފަދަ ފައިސާ ބޭރުގެ ބޭންކުތަކުގައި އިންވެސްޓް ކުރި ނަމަވެސް، އޮކްޓޫބަރު 2024 ގައި އެމްއެމްއޭ އިން ވަނީ 120 މިލިއަން ޑޮލަރު ރާއްޖޭގެ ބޭންކުތަކުގައި އިންވެސްޓް ކޮށްފައެވެ. މި ނިންމުމުގެ މަގުސަދަކީ މި އިންވެސްޓްމަންޓުން ލިބޭ ނަފާ ވީހާވެސް ބޮޑުކުރުމާއި މާލީ ދާއިރާގެ ކުރިއެރުމާއި ހަމަޖެހުމަށް މަގުފަހިކޮށް މުޅި އިގްތިސާދަށް ފައިދާވާނެ ގޮތަށް މިކަންކުރުމެވެ." އެމްއެމްއޭ ގެ ބަޔާނުގައި ވެއެވެ.

އެމްއެމްއޭ އިން ހާމަ ކޮށްފައިވާ މައުލޫމާތުގައި ބުނެފައިވަނީ ރިޒާވްގެ ހާލަތަށް އައިސްފައިވާ ބަދަލުތައް އެމްއެމްއޭގެ މަންތްލީ ސްޓެޓިސްޓިކްސްގެ ރިޒާވް ޑޭޓާ ޓެމްޕްލެޓް އިން ފެނިގެންދާނެ ކަމަށާއި، ކަރަންސީ ސްވޮޕް އިން ލިބުނު ބޭރު ފައިސާ ރިކޯޑް ކޮށްފައި ވާނީ ބައިނަލްއަގުވާމީ މިންގަނޑުތަކާ އެއްގޮތަށް، "އޮފިޝަލް ރިޒާވް އެސެޓްސް" ގައި ކަމަށެވެ. ހަމަ އެފަދައިން، ބޭރުގެ ބޭންކުތަކުގެ ބަދަލުގައި ރާއްޖޭގެ ކޮމާޝަލް ބޭންކްތަކުގައި 120 މިލިއަން ޔޫއެސް ޑޮލަރު އިންވެސްޓް ކޮށްފައިވާތީ، މިއަދަދު ރެކޯޑް ކޮށްފައި ވާނީ "ޑިޕޮސިޓްސް ނޮޓް އިންކްލޫޑެޑް އިން އޮފިޝަލް ރިޒާވް އެސެޓްސް" ގައި ކަމަށްވެސް ބުނެފައިވެއެވެ.