ދައުލަތުގެ ރިޒާވް ދަށަށް ދިޔައީ ދަރުމަވަންތަ ހޮސްޕިޓަލްގެ ސަބަބުން!

މިއަހަރުގެ ތިންވަނަ ކުއާޓަރގައިވެސް ދައުލަތުގެ ރިޒާވް ދަށަށް ގޮސްފައިވާ ކަމަށް މަރުކަޒީ ބޭންކުން ބުނެފިއެވެ.

މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީއިން އާއްމުކޮށްފައިވާ މިއަހަރުގެ 3 ވަނަ ކުއާޓަރގެ އިޤްތިޞާދީ ޙާލަތުގެ ރިޕޯޓްގައިވާ ގޮތުން ރިޒާވްގައި ހުރީ 9.9 ބިލިއަން ރުފިޔާއެވެ. މިއީ މިއަހަރުގެ ދެވަނަ ކުއާޓަރގައި ހުރި އަދަދަށް ވުރެ ދަށް އަދަދެކެވެ. އެހެން ނަމަވެސް ކުއާޓަރއިން ކުއާޓަރއަށް ބަލާއިރު، ރިޒާވްދަށްވާ މިންވަރު މަޑުޖެހިފައިވާ ކަމަށް އެމްއެމްއޭއިން ބުނެއެވެ. އެގޮތުން ދަށަށްދާ މިންވަރު 1 އިންސައްތަ ދަށްވެފައިވާ ކަމަށް ތަފާސްހިސާބުތައް ދައްކައެވެ.

އެމްއެމްއޭއިން ބުނާ ގޮތުގައި މިއަހަރުގެ ތިންވަނަ ކުއާޓަރގައި ދައުލަތުގެ ބޭރު ފައިސާގެ ރިޒާވްގައި ހުރީ 519.4 މިލިއަން ޑޮލަރެވެ. މީގެ ތެރެއިން ޔޫޒަބަލް ރިޒާރވްގެ ގޮތުގައި ހުރީ 191.9 މިލިއަން ޑޮލަރެވެ. އެމްއެމްއޭގެ ބޭރު ފައިސާގެ ރިޒާވްގެ ބޮޑު ބަޔަކީ ވިޔަފާރި ބޭންކްތަކުން އެމްއެމްއޭގައި ރައްކާކުރާ ފައިސާއެވެ. މިއަހަރުގެ ތިންވަނަ ކުއާޓަރގައި ބޭރު ފައިސާގެ ރިޒާވް 4 އިންސައްތަ ދަށްވެފައިވާއިރު، އެ މިންވަރު ދަށްވެފައިވަނީ ބޭންކްތަކުން ޖަމާކުރާ ބޭރު ފައިސާ މަދުވުމުން ކަމަށް އެމްއެމްއޭއިން ބުނެއެވެ. އަދި ހަމައެއާއިއެކު ޑޮލަރުގެ ތާށިކަން އަޔަ ނުދިނުމަށް ބޭންކްތަކަށް ޑޮލަރު ދޫކުރުމުގެ ސަބަބުން ވެސް ޑޮލަރުގެ ރިޒާވް ދަށްވިކަމަށް އެމްއެމްއޭއިން ބުނެއެވެ. އެމްއެމްއޭއިން ބުނާ ގޮތުގައި ދެވަނަ ކުއާޓަރަށް ވުރެ ތިންވަނަ ކުއާޓަރގައި ބޭނުން ކުރެވޭ ރިޒާވްގެ މިންވަރު ދަށްވެފައިވަނީ ދަރުމަވަންތަ ހޮސްޕިޓަލްގެ ލޯނު ދެއްކުމަށާއި، އެހޮސްޕިޓަލް އެޅުމަށް ބޭނުންވާ މުއާމަލާތްތަކަށް ފައިސާ ނެގުމުންނެވެ.

ދެވަނަ ކުއާޓަރއަށް ވުރެ ބޭނުން ކުރެވޭ ރިޒާވްގެ މިންވަރު، ތިންވަނަ ކުއާޓަރގައި ވަނީ 23 އިންސައްތަ ދަށްވެފައެވެ.