ކަރަންސީ ސްވޮޕަށް ފައިސާ ދެއްކުމުން މަހެއްގެ ތެރޭގައި ރިޒާވް 17 އިންސައްތަ ދަށަށް!
ކަރަންސީ ސްވޮޕުގެ ގޮތުގައި 100 މިލިއަން ޑޮލަރު އަނބުރާ ދައްކާފައިވޭ
ރާއްޖޭގެ މަރުކަޒީ ބޭންކް : މޯލްޑިވްސް މަނިޓަރީ އޮތޯރިޓީގެ އިމާރާތް
ފެބްރުއަރީ މަހުގެ ތެރޭގައި ރާއްޖޭގެ ރިޒާވް 938 މިލިއަން ޑޮލަރުގައި ހުރުމަށް ފަހު، 776.2 މިލިއަން ޑޮލަރަށް ތިރިވާން ޖެހުނީ ކަރަންސީ ސޮވަޕަށް ދައްކަން ޖެހޭ ފައިސާ ދެއްކުމުން ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކޮށްފިއެވެ.
ރަސްމީ ރިޒާވު އެއް މަހުގެ ތެރޭގައި 17 އިންސައްތަ ދަށަށް ގޮސްފައިވާއިރު، މަދުވީ 162 މިލިއަން ޑޮލަރުގެ ތެރެއިން 100 މިލިއަން ޑޮލަރަކީ ރިޒާވް ބޭންކް އޮފް އިންޑިއާ (އާރްބީއައި) އަށް ކަރަންސީ ސްވޮޕުގެ ގޮތުގައި ދެއްކި ފައިސާ ކަމަށް އެމްއެމްއޭއިން ބުނެފައިވެއެވެ. ރިޒާވަށް މިހެން އަންނަ ބަދަލުތަކަކީ އާންމުކޮށް ވެސް އަންނާނެ ބަދަލުތަކެއް ކަމަށް އެމްއެމްއޭއިން ބުނެފައިވެއެވެ.
އިންޑިއާގެ މަރުކަޒީ ބޭންކުން ނަގާ ގޮތަށް ކަރަންސީ ސްވޮޕުގެ ގޮތުގައި ހަމަޖެއްސި 400 މިލިއަން ޑޮލަރަކީ، ރައީސް އިބްރާހިމް މުހައްމަދު ސޯލިހު، ވެރިކަމުގެ ހުވާކުރެއްވި ފަހުން ކުރެއްވި ފުރަތަމަ ރަސްމީ ދަތުރުފުޅުގައި އިންޑިއާއަށް ވަޑައިގެން ހަމަޖެއްސެވި ފައިސާއެވެ. ކުރިން އެ އަދަދު ހުރީ 200 މިލިއަން ޑޮލަރުގައެވެ.
ދައުލަތުގެ ރަސްމީ ރިޒާވުގެ އިތުރުން، މާޗް މަހުގެ ތެރޭގައި ޔޫސަބަލް ރިޒާވް ވެސް ވަނީ ދަށަށްގޮސްފައެވެ. އެގޮތުން ފެބްރުއަރީ މަހުގެ ނިޔަލަށް ޔޫސަބަލް ރިޒާވްގައި 295.3 މިލިއަން ޑޮލަރު ހުރިއިރު، މާޗް މަހުގެ ނިޔަލަށް އެ އަދަދު ވަނީ 251.8 މިލިއަން ޑޮލަރަށް ދަށްވެފައެވެ. މި އަހަރު ފެށުނު އިރު ޔޫސަބަލް ރިޒާވް ހުރީ 317.9 މިލިއަން ޑޮލަރުގައެވެ.
ރަސްމީ ރިޒާވު ދަށަށް ގޮސްފައިވާ އިރު، ވެރިކަމުގެ ފަސް އަހަރުގެ ތެރޭގައި ދައުލަތުގެ ރިޒާވް އެއް ބިލިއަން ޑޮލަރަށް އިތުރު ކޮށްދިނުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
