މުޅި ދުނިޔެ ބަންދުވެ، އިންސާނިއްޔަތު މާޔޫސްވި އިރު ވެސް ހިތިބޭސްބޯކަށް އެމްޑީޕީން ރައްޔިތުން ކައިރިއަކު ނުބުނޭ - ޝާހިދު

މުޅި ދުނިޔެ ބަންދުވެފައި މުޅި އިންސާނިއްޔަތު މާޔޫސްވެފައި އޮތް ޒަމާނުގައި ވެސް އެމްޑީޕީ ސަރުކާރުން ރައްޔިތުން ކައިރި ބުނިތޯ ހިތި ބޭސް ބޯންވެއްޖެ ކަމަށް ބުނެފައި ނުވާނެ ކަމަށްއެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

އެ މަނިކުފާނު އެފަދައިން ވިދާޅުވީ އަންގާރަ ދުވަހުގެ ރޭ އެމްޑީޕީގެ ފުދިއްޖެ، ފުނޑިއްޖެ ޖަލްސާގައި ވާހަކަދައްކަވަމުންނެވެ.

އެ ޖަލްސާގައި ވާހަކަދައްކަވަމުން އިންސާނުންނަކީ ތޮބީއީ ގޮތުން ހަނދާން ބަލި ބައެއް ކަމަށާއި އެހެންކަމުން ހަނދާން އާކޮށްދިނުމަކީ އޮންނަ ކަމެއް ކަމަށް ޝާހިދު ވަނީ ވިދާޅުވެފައެވެ. އެގޮތުން ނިމިދިޔަ ވެރިކަމުގައި ކޮވިޑް-19އިގެ އާލަމީ ވަބާ އާއި ކުރިމަތިވިކަން މިއަދު ހަނދާން ނެތިފައިވާ ކަމަށް ޝާހިދު ވަނީ ވިދާޅުވެފައެވެ. އެ ދުވަހު ތަޖުރިބާކުރި ބިރުވެރި މާހައުލު ދިވެހިން މިހާރު ހަނދާނެއް ނެތް ކަމަށް ޝާހިދު ވިދާޅުވިއެވެ. މަގާއި، ކަނޑުތަކުގައި ދުއްވާ އެއްޗެއް ނެތި ހަމަހިމޭންކަމުގައި އޮތް އޮތުން ދިވެހިން ހަނދާން ނެތިފައިވާ ކަމަށް ޝާހިދު ވަނީ ވިދާޅުވެފައެވެ. ކޮވިޑުން ސަލާމަތްވި އިރު ޖީޑީޕީގެ ތިން ބައިކުޅަ އެއްބައި ގެއްލުނު ކަމަށާއި ފަތުރުވެރިކަމުގެ 60 އަށް ވުރެ ގިނަ އިންސައްތަ އުނިވި ކަމަށް ޝާހިދު ފާހަގަކުރެއްވިއެވެ.

އެ ދުވަހު ސަރުކާރުން ރައްޔިތުންނަށް ދިން ޔަޤީންކަމަކީ ދައުލަތެއްގެ މުހިންމުކަން ކަމަށް ޝާހިދު ވަނީ ވިދާޅުވެފައެވެ. އިތުރަށް ވާހަކަދައްކަވަމުން ޝާހިދު ވިދާޅުވީ ކޮވިޑަށް ފަހު އިގްތިޞާދު އެންމެ ބާރަށް ކުރި އެރި ޤައުމުތަކުގެ ތެރޭގައި ރާއްޖެ ހިމެނޭ ކަމަށެވެ. ވެރިކަން ބަދަލުވަމުން ދިޔަ އިރު އިންފްލޭޝަން ކޮންޓްރޯލްކުރެވި ރާއްޖެ އަންނަ ފަތުރުވެރިންގެ އަދަދު ދިޔައީ އިތުރުވަމުން ކަމަށް ޝާހިދު ވިދާޅުވިއެވެ. 6202 ވަނަ އަހަރަށް 5.5 އިންސައްތައިން އިގްތިޞާދީ ކުރިއެރުން ލިބޭނެ ކަމަށް ބައިނަލްއަޤުވާމީ އިދާރާތަކުން ލަފާކުރި ކަމަށް ވެސް ޝާހިދު ވިދާޅުވިއެވެ.

މީގެ އިތުރުން ދައުލަތަކުން ބަލަން ޖެހޭނީ މީހާ ނިކަމެތިވާ އިރު އޭނާ ނަގާ ކޮޅަށް ޖަހަން ކަމަށާއި ދައުލަތުން އޭނާ ކޮށްޕާލާ ވައްޓާލާ އިތުރަށް ނިކަމެތިކޮށްގެން ނުވާނެ ކަމަށް ޝާހިދު ވަނީ ފާހަގަކުރައްވާފައެވެ. އެ ޖަލްސާގައި މި ސަރުކާރަށް ފާޑު ވިދާޅުވެ ވާހަކަދައްކަވަމުން މިއީ އެއްވެސް އިމެއް ސުމާރެއް ނެތި ދޮގު ހަދާ ސަރުކާރެއް ކަމަށް އެ މަނިކުފާނު ވިދާޅުވިއެވެ. މި ސަރުކާރުން ދަނީ ތިން އިރު ކާ ބޭހެއް ފަދައިން ދޮގު ހަދަމުން ކަމަށާއި ސަރުކާރުގެ ދޮގުހެދުމަށް ރައްޔިތުން ބުނަމުން ދަނީ "ފުދިއްޖެ" އޭ ކަމަށް ޝާހިދު ވަނީ ވިދާޅުވެފައެވެ. މި ސަރުކާރުގެ ދޯހަޅި ސިޔާސަތުގެ ސަބަބުން ވަރަށް ބޮޑަށް ރާއްޖެ އަށް އޭގެ ނޭދެވޭ އަސަރުކުރާ ކަަމަށް ޝާހިދު ވަނީ ވިދާޅުވެފައެވެ.