ނިއު ރޭޑިއަންޓްގެ ކޮންގްރެސް މި މަހު 20 ގައި ބާއްވަނީ

މި ވަގުތު ދެ ވަނަ ޑިވިޝަންގައި އޮތް ނިއު ރޭޑިއަންޓް ސްޕޯޓްސް ކުލަބުގެ ކޮންގްރެސް ނޮވެންބަރު މަހުގެ 20 ވަނަ ދުވަހު ބާއްވަން އެ ކުލަބުން ނިންމައިފި އެވެ.

ނިއު ރޭޑިއަންޓުން އެ ކުލަބުގެ ކޮންގްރެސް ބޭއްްވުމަށް ތައްޔާރުވެ މަސައްކަތް ކުރަމުން އަންނައިރު، މިވަގުތު އެ ކުލަބުގެ ޗެއާމަންކަމުގެ މަގާމު އޮތީ ހުސްކޮށެވެ. އެންމެ ފަހުން އެ މަގާމުގައި ހުރީ އަޙުމަދު ވާސިފު އެވެ. ނިއު ރޭޑިއަންޓުގެ ޗެއާމަންކަމުން ވާސިފު އިސްތިއުފާ ދެއްވާފައި ވަނީ، އަލުން ފުރަތަމަ ޑިވިޝަނަށް އައުމަށް ނިއު އިން ކުރަމުން އައި މަސައްކަތް ދެ ފަހަރެއްގެ މަތިން ކާމިޔާބު ނުވުމުންނެވެ.

ކޮންގްރެސްގައި ނިއު ރޭޑިއަންޓުގެ މަޤާމުތަކަށް މެމްބަރުން އިންތިޚާބު ކުރާއިރު، އެ ކުލަބުގެ އައު ޗެއާމަނަކަށް އަންނާނީ ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރުއޭސީއެލް)ގެ މެނޭޖިން ޑައިރެކްޓަރު އަޙުމަދު މުބީން ކަމަށް ވަނީ ބެލެވިފަ އެވެ. މީގެ ކުރިން 18 ވަނަ ރައްޔިތުންގެ މަޖިލީހުގައި ބިލެތްދޫ ދާއިރާގެ މެމްބަރުކަން ވެސް ކުރައްވާފައިވާ މުބީން، ނިއު ރޭޑިއަންޓުގެ ޗެއާމަނަކަށް ގެންނަން އެ ކުލަބުގެ އިސްވެރިން މަސައްކަތް ކުރާ ކަމުގެ އަޑުތައް އޮތީ ފެތުރިފަ އެވެ. އަދި ނިއު ރޭޑިއަންޓުގެ ޗެއާމަނަކަށް ވަޑައިގެންފާނެ ކަމުގެ އިޝާރާތެއް މީގެ ކުރިން މުބީން ވެސް ވަނީ ދެއްވައިފަ އެވެ.

އެކަމާ ގުޅޭ ގޮތުން "ރާއްޖެ އެމްވީ"އާ ވާހަކަ ދައްކަވަމުން މީގެ ކުރިން ވެސް މުބީން ވިދާޅުވީ ނިއު ރޭޑިއަންޓު މިހާރު އޮތް ޙާލަތުން ސަލާމަތް ކުރުމަށް މަސައްކަތްތަކެއް ކުރައްވަމުން އަންނަ ކަމަށެވެ. ނަމަވެސް ޗެއާމަންކަމަށް ވަޑައިގެންނެވުމާ ގުޅޭ ގޮތުން ސީދާ ޖަވާބެއް ނުދެއްވައި މުބީން ވިދާޅުވީ، މިހާރު ނިއު ރޭޑިއަންޓުގެ ދަރަނި އޮތް ޙާލަތު ވެސް ދެނެގަތުމަށް މަސައްކަތް ކުރަމުން އަންނަ ކަމަށާއި، ނިއު ރޭޑިއަންޓުގެ ސަޕޯޓަރުންނަށް އުފާވެރި ދުވަސްތަކެއް ހޯއްދަވައި ދެއްވަން މަސައްްކަތް ކުރައްވާ ކަމަށެވެ. އަދި ކުލަބުގެ ކަންކަމުގައި އުޅުއްވާ ފަރާތްތަކާ އެކު ކުރަމުން އަންނަ މަސައްކަތާ އެކު، އެކަން ކާމިޔާބު ވާނެ ކަމުގެ އުންމީދު ބޮޑު ކަމަށް ވެސް މުބީން އޭރު ވިދާޅުވެފައިވެ އެވެ.

އަލުން އެއް ވަނަ ޑިވިޝަނަށް އައުމަށް ނިއު އިން ކުރަމުން އަންނަ މަސައްކަތުގައި ރައީސުލްޖުމްހޫރިއްޔާ އޮފީހުގެ މިނިސްޓަރު ޢަބްދުﷲ ނާޞިރު (ހެރިންސް އައްޅޯ) ވެސް ވަރަށް އިސްކޮށް މަސައްކަތް ކުރައްވަ އެވެ. އޭގެ އިތުރުން ވެމްކޯގެ މެނޭޖިން ޑައިރެކްޓަރު މުޖުތަބާ ޖަލީލް އަދި ހެންވޭރު ހުޅަނގު ދާއިރާގެ މެންބަރު ޢަލީ އިބްރާހީމް (ކައްޕި) ވެސް މަސައްކަތް ކުރައްވަ އެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިއު ރޭޑިއަންޓު ސަސްޕެންޑު ކޮށްފައި ވަނީ 2019 ވަނަ އަހަރު އެވެ. ނިއު ރޭޑިއަންޓު ސަސްޕެންޑު ކުރިއިރު، އޭގެ ކުރިން އެ ކުލަބުން ވަނީ އޭރު އެފްއޭއެމްގެ ރައީސަކަށް ހުންނެވި ބައްސާމް އަދީލް ޖަލީލްގެ އިތުބާރު ނެތް ކަމަށް ސޮއިކޮށް، ޕެޓިޝަނެއް ހުށަހަޅައިފަ އެވެ. އޭގެ ފަހުން އެފްއޭއެމް އިން ނިއު ރޭޑިއަންޓު ސަސްޕެންޑު ކުރީ އެ ކުލަބުގެ ކުޅުންތެރިންނަށް މުސާރަ ނުދޭ ކަމަށް ބުނެ އެވެ. އޭގެ ފަހުން އަލުން ފުރަތަމަ ޑިވިޝަނަށް އައުމަށް މަސައްކަތް ކުރަމުން އަންނަ ނިއު ރޭޑިއަންޓު ވަނީ، އެންމެ ފަހުން އޮތް ދެ ފަހަރު ވެސް ދެ ވަނަ ޑިވިޝަންގައި ވާދަކޮށްފަ އެވެ.