ޖޮއިންޓް އެރެބް-އިސްލާމިކް ސަމިޓުގައި ބައިވެރިވެވަޑައިގަތުމަށް ރައީސް ސައޫދީ އަރަބިއްޔާ ވަޑައިގެންފި
ފަލަސްޠީނާއި ލުބްނާނަށް ދެމުންދާ ހަމަލާތަކާއި ގުޅިގެން ސަރަހައްދީ އިސްވާރުން ކުރައްވާ މަޝްވަރާގައި ރައީސް ބައިވެރިވެވަޑައިގަންނަވާނެ
ރައީސް ޑރ.މުހައްމަދު މުއިއްޒު ސައުދީ އަރަބިއްޔާއަށް ވަޑައިގަތުން
މާތްވެގެންވާ ދެ ޙަރަމްފުޅުގެ ޚާދިމް އަދި ސައޫދީ އަރަބިއްޔާގެ ރަސްގެފާނު ހިޒް މެޖަސްޓީ ސަލްމާން ބިން ޢަބްދުލްއަޒީޒްގެ ދަޢުވަތަކަށް، ޖޮއިންޓް އެރެބް-އިސްލާމިކް ސަމިޓުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަޢޫދީ އަރަބިއްޔާގެ ރިޔާޛަށް ވަޑައިގެންފިއެވެ.
ކިންގް ޚާލިދް އިންޓަރނޭޝަނަލް އެއަރޕޯޓުން ރައީސްއަށް މަރުޙަބާ ވިދާޅުވީ، ރިޔާޛު ސަރަހައްދުގެ ޑެޕިއުޓީ ގަވަރނަރ، ހިޒް ރޯޔަލް ހައިނަސް ޕްރިންސް މުޙައްމަދު ބިން އަބްދުއްރަހްމާން ބިން އަބްދުލްއަޒީޒެވެ.
ރައީސް އޮފީހުން މައުލޫމާތުދޭ ގޮތުގައި މަތީ ފަންތީގެ ވަފުދަކާއެކު ކުރައްވާ މި ދަތުރުފުޅުގައި، އިސްރާއީލުގެ އިސްތިއުމާރީ ބާރުތަކުން ފަލަސްޠީނާއި ލުބްނާނަށް ދެމުންދާ ހަމަލާތަކާއި، ސަރަޙައްދީ ހުތޫރާތްތެރި މައްސަލަތަކާމެދު، ސަރަހައްދީ އިސްވާރުން ކުރައްވާ މަޝްވަރާގައި ރައީސް ބައިވެރިވެވަޑައިގަންނަވާނެ އެވެ. މި ސަމިޓުގައި މަޝްވަރާތައް ބިނާކުރައްވާނީ، 2023 ވަނަ އަހަރުގެ ނޮވެމްބަރ މަހުގެ 11 ވަނަ ދުވަހު ސައޫދީ އަރަބިއްޔާގެ ރިޔާޛުގައި ނިންމި ޖޮއިންޓް ޢެރެބް-އިސްލާމިކް ސަމިޓުގެ ނިންމުންތަކުގެ މައްޗަށެވެ.
ހޯމަ ދުވަހުގެ މެންދުރުފަހު، ރައީސް މި ސަމިޓުގައި ވާހަކަފުޅު ދެއްކެވުމަށް ވަނީ ހަމަޖެހިފައިވާ ކަމަށް ވެސް ރައީސް އޮފީހުން ބުނެއެވެ.
ރައީސް މުއިއްޒު ގެ މިދަތުރުފުޅަށް ކުޑަތަން ވެފައި ވަނިކޮށް، އެމަނިކުފާނުގެ ފުލް ކޮންޓްރޯލް އޮންނަ ރައްޔިތުން މަޖިލީހުގައި 150 ދުވަހަށް ވުރެ ގިނަ ދުވަހު ޕާކް ކޮށްފައި އޮތް އިޒްރޭލު ޕާސްޕޯޓު ރާއްޖޭގައި މަނާކުރުމުގެ ބިލުގެ މަސައްކަތް ކުށްލި ގޮތަކަށް ފަށާކަން އާދިއްތަ ދުވަހު ވަނީ ހާމަ ކޮށްފައެވެ.
އިޒްރޭލު ޕާސްޕޯޓު މަނާކުރަން އެމްޑީޕީން ހުށަހެޅި ބިލް ސަރުކާރުގެ ބޮޑު މެޖޯރިޓީއެއް އޮންނަ 241 ކޮމިޓީ ގައި ތާށިކޮށްފައި އޮންނާތީ އެމްޑީޕީ އިން އޮކްޓޯބަރު 21 ވަނަ ދުވަހު ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައި ނުގަންނަން ރައީސް މުއިއްޒު އެންޑޯޒް ކުރައްވައިގެން މަޖިލީހުގެ ރައީސް ކަމަށް ވަޑައިގެންނެވި އަބްދުއްރަޙީމް އަބްދުﷲ އޮތީ ނިންމަވާފައެވެ.
