އިނގިރޭސި ޕްރިމިއާ ލީގުގައި ޗެލްސީ އާއި އާސެނަލް ކުޅުނު މެޗު އެއްވަރުވެގެން ނިމިއްޖެ އެވެ.

ޗެލްސީގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1ން އެއްވަރުވެގެންނެވެ. މެޗުގައި އާސެނަލް އިން ލަނޑު ޖަހައި ކުރި ހޯދާފައި ވަނިކޮށް، ޗެލްސީން ވަނީ ފަހަތުން އަރައި ލަނޑު ޖަހައިގެން އެއްވަރު ކޮށްފަ އެވެ.

މެޗު ފަށައިގެން 32 ވަނަ މިނެޓުގައި އާސެނަލްގެ ކައި ހަވާޓްޒް ވަނީ ލަނޑު ޖަހައިފަ އެވެ. ނަމަވެސް ވީޑިއޯ އެސިސްޓެންޓު ރެފްރީ (ވީއޭއާރު) އިން ބެލުމަށްފަހު، އެ ލަނޑު ބަަލައި ނުގަންނަން ވަނީ ނިންމައިފަ އެވެ. މެޗުގައި އާސެނަލް އާއި ޗެލްސީގެ ލަނޑުތައް ދެން ފެނުނީ ދެ ވަނަ ހާފުގަ އެވެ.

ދެ ވަނަ ހާފު ފަށައިގެން މެޗުގެ 60 ވަނަ މިނެޓުގައި އާސެނަލަށް ލީޑު ނަގައިދިނީ ގަބްރިއެލް މާޓިނެލީ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ މާޓިން އޮޑެގާޑް އެވެ. ނަމަވެސް އޭގެ ދިހަ މިނެޓު ފަހުން ޗެލްސީން ވަނީ މެޗުގައި ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު ޗެލްސީ އަށް ޖަހައިދިނީ ޕެޑްރޯ ނެޓޯ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އެންޒޯ ފެނާންޑޭޒް އެވެ.

ނަތީޖާ އާއެކު ޗެލްސީން ވަނީ އާސެނަލް ފަހަތަށް ޖައްސާލުމަށްފަހު، ތާވަލްގެ ތިން ވަނަ އަށް ޖެހިލައިފަ އެވެ. މިހާތަނަށް ކުޅުނު 11 މެޗުން ޗެލްސީ އަށް ލިބެނީ 19 ޕޮއިންޓެވެ. ހަމަ އެ އަދަދަށް މެޗު ކުޅެގެން އާސެނަލަށް ވެސް ލިބެނީ 19 ޕޮއިންޓެވެ. ނަމަވެސް ލަނޑުގެ ގޮތުން ކުރި ހޯދައިގެން ޗެލްސީ ތިން ވަަނައިގައި އޮތްއިރު، އާސެނަލް އޮތީ ހަތަރު ވަނައިގަ އެވެ.