ރެއާލް މޮޅުވީއިރު، ވިނީޝިއުސް ހެޓްރިކް ހަދައިފި

ސްޕެނިޝް ލީގުގައި އޮސަސޫނާއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ރެއާލް މެޑްރިޑު މޮޅުވެއްޖެ އެވެ.

ރެއާލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 4-0ންނެވެ. މެޗުގެ ފުރަތަމަ ހާފުގައި ރެއާލް އިން ވަނީ ދެ ލަނޑު ޖަހައިފަ އެވެ. އަދި އަނެއް ދެ ލަނޑު އެ ޓީމުން ޖެހީ ފަހު ހާފުގަ އެވެ.

މެޗުގެ ފުރަތަމަ ހާފުގެ 34 ވަނަ މިނެޓުގައި ރެއާލަށް ލީޑު ނަގައިދިނީ ބްރެޒިލްގެ ވިނީޝިއުސް ޖޫނިއާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އިންގްލެންޑުގެ ޖޫޑް ބެލިންހަމް އެވެ. އޭގެ ފަހުން، ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ރެއާލްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ބެލިންހަމް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ރައުލް އަސެންސިއޯ އެވެ.

މެޗުގެ ދެ ވަނަ ހާފުގައި ރެއާލްގެ ތިން ވަނަ ލަނޑު ޖެހީ ވިނީޝިއުސް އެވެ. ރެއާލްގެ ތިން ވަނަ ލަނޑު ޖެހިތާ އަށް މިނެޓު ފަހުން، ވިނީޝިއުސް ވަނީ ރެއާލްގެ ހަތަރު ވަނަ ލަނޑު ޖަހައި މެޗުގައި އޭނާގެ ހެޓްރިކް ހަމަކޮށްފަ އެވެ. އެ ލަނޑު ވިނީޝިއުސް ޖެހީ ބްރަހިމް ޑިއާޒް ތަނަވަސްކޮށްދިން ފުރުސަތެއްގަ އެވެ.

މޮޅާއެކު ރެއާލް އޮތީ ލީގު ތާވަލްގެ ދެ ވަނައިގަ އެވެ. ރެއާލްއާ، އެއް ވަނައިގައި ވާދަވެރި ބާސެލޯނާއާ ދެމެދު ހަ ޕޮއިންޓުގެ ފަރަގެއް އެބަ އޮތެވެ. މިހާތަނަށް ލީގުގައި ކުޅުނު 12 މެޗުން ރެއާލަށް ލިބެނީ 27 ޕޮއިންޓެވެ. ރެއާލް ވަނީ މި ސީޒަންގެ ސްޕެނިޝް ލީގުގައި އަށް މެޗުން މޮޅުވެ، ހަތަރު މެޗު އެއްވަރުވެފަ އެވެ. އަދި އެއް މެޗުން ވަނީ ބަލިވެފަ އެވެ. އެއް ވަނައިގައި ބާސެލޯނާ އޮތީ 12 މެޗުން 33 ޕޮއިންޓު ހޯދައިގެންނެވެ.