ގާޑިއޯލާ ހުރީ ހަތަރު ވަނަ ބައްޔެއް ކުރިމަތި ނުވާނެ ކަމުގެ ޔަޤީންކަމާ އެކު

އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ނިކުންނައިރު، ހަތަރު ވަނަ ބައްޔެއް ކުރިމަތި ނުވާނެ ކަމުގެ ފުރިހަމަ ޔަޤީންކަން އޮތް ކަމަށް އެންމެ ފަހުގެ ޗެމްޕިއަން މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

އޭނާ މިހެން ބުނީ ލީގުގައި ހޮނިހިރު ދުވަހުގެ ރޭ ބްރައިޓަންގެ ދަނޑުގައި ސިޓީން އެ ޓީމާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެ މެޗަށް ނިކުންނައިރު، މިވަގުތު ސިޓީ އޮތީ ޕްރެޝަރުގަ އެވެ. އެއީ އެންމެ ފަހުން އެ ޓީމު ކުޅުނު ތިން މެޗުން ވެސް ބަލިވެފައި އޮތުމުންނެވެ.

ކަރަބޯ ކަޕްގައި ޓޮޓެންހަމާ ދެކޮޅަށް ކުޅުނު މެޗުން ބަލިވީއިރު، އޭގެ ފަހުން އިނގިރޭސި ޕްރިމިއަރ ލީގުގަައި ބޯންމައުތާ ދެކޮޅަށް ކުޅުނު މެޗުން ވެސް ވަނީ ބަލިވެފަ އެވެ. އެންމެ ފަހުން ޔުއެފާ ޗެމްޕިއަންސް ލީގުގައި ސްޕޯޓިންއާ ދެކޮޅަށް ކުޅުނު މެޗުން ވެސް ސިޓީ ވަނީ ބަލިވެފަ އެވެ.

ބްރައިޓަން މެޗުގެ ކުރިން ވާހަކަ ދައްކަމުން ގާޑިއޯލާ ބުނީ، ޖެހި ޖެހިގެން ހަތަރު މެޗުން ސިޓީ ބަލިވުމަކީ އަލަށް ވާނެ ކަމެއް ކަމަށެވެ. އެހެން ނަމަވެސް، ބްރައިޓަން އަތުން ބަލިވެ، ޖެހި ޖެހިގެން ހަތަރު ބައްޔާ ކުރިމަތިލާން ނުޖެހޭނެ ކަމުގެ ފުރިހަމަ ޔަޤީންކަން އޮތް ކަމަށް ވެސް ގާޑިއޯލާ ބުންޏެވެ. ގާޑިއޯލާ ބުނީ ލީގުގައި ފުލަމްއާ ދެކޮޅަށް ކުޅުނު މެޗާއި، ބޯންމައުތާ ދެކޮޅަށް ކުޅުނު މެޗުގެ ފުރަތަމަ 20 މިނެޓަށް ބަލާއިރު، ސިޓީގެ ކުޅުން ރަނގަޅު ނޫން ކަމަށެވެ. އެހެން ނަމަވެސް ދެން ހުރި މެޗުތަކުގައި ސިޓީގެ ފަރާތުން ފެނުނޫ ރަނގަޅު ކުޅުމެއް ކަމަށް އޭނާ ދެކެ އެވެ.

ސިޓީގެ އަނިޔާގެ މައްސަލަ އަށް އިޝާރާތް ކުރަމުން ގާޑިއޯލާ ބުނީ، ރަނގަޅު ޚަބަރެއް ދެވެން އޭނާ އަށް ނެތް ކަމަށެވެ. އެގޮތުން ސިޓީ އޮތީ އެންމެ ފަހުން ސްޕޯޓިންއާ ދެކޮޅަށް ކުޅުނުއިރު އޮތް ޙާލަތުގައި ކަމަށް ވެސް ގާޑިއޯލާ ފާހަގަ ކުރި އެވެ. ބްރައިޓަންއާ ދެކޮޅަށް ސިޓީން ކުޅޭ މެޗުގައި ޖޯން ސްޓޯންސް އަދި ރުބެން ޑިއާޒް އަަށް ނުކުޅެވޭނެ އެވެ. ނަމަވެސް ގާޑިއޯލާ ފާހަގަ ކުރި ގޮތުގައި އެއީ ސިޓީ އަށް މެޗުން މޮޅު ނުވެވޭނެ އެއްވެސް ސަބަބެއް ނޫނެވެ.

ސިޓީގެ ކޯޗުކަމާ ގާޑިއޯލާ ހަވާލުވީ ފަހުން، މިހާތަނަށް އެ ޓީމު ޖެހި ޖެހިގެން ހަތަރު މެޗުން ބަލިވެފައި ނުވެ އެވެ. ނަމަވެސް 17-2016 ވަނަ ސީޒަންގައި ގާޑިއޯލާ އެންމެ ފުރަތަމަ ސިޓީއާ ހަވާލުވީއިރު، މޮޅެއް ނުހޯދި ޖެހި ޖެހިގެން ހަ މެޗު ނިންމާލަން ޖެހުނެވެ. ބްރައިޓަންގެ ދަނޑުގައި ސިޓީން އެ ޓީމާ ދެކޮޅަށް ނިކުންނާނީ ހޮނިހިރު ދުވަހުގެ ރޭ ރާއްޖެ ގަޑިން 22:30 ގައެވެ.