ދައުލަތުގެ ދަރަނި 155 ބިލިއަން ރުފިޔާއިން މައްޗަށް، 2025 ވަނަ އަހަރުގެ ބަޖެޓުގައި ނަގާ ދަރަންޏާ އިންޓްރެސްޓް ހަރަދު ދިމާ ނުވޭ: އަމީރު
އިންޑިއާއިން ނަގާފައިވާ 400 މިލިއަން ޑޮލަރުގެ ކަރަންސީ ސްވޮފް ދަރަނީގެ ހިސާބުތަކުން ފެންނަން ނެތް
މޯލްޑިވްސް މަނިޓަރީ އޮތޯރިޓީ (އެމްއެމްއޭ)
މިއަހަރު ނިމޭއިރު ދައުލަތުގެ ދަރަނި 155 ބިލިއަން ރުފިޔާއިން މައްޗަށް އަރާނެ ކަމަށާއި، 2025 ވަނަ އަހަރުގެ ބަޖެޓުން ނަގާ ދަރަންޏާ އިންޓްރެސްޓް ހަރަދު ދިމާ ނުވާ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އަމީރު ވަނީ ވަރަށް ތަފްސީލުކޮށް 2025 ވަނަ އަހަރަށް ސަރުކާރުން ހުށަހަޅާފައިވާ ބަޖެޓް ހިއްސާކޮށްދެއްވާފައެވެ.
އަމީރު ވިދާޅުވީ މިއަރު ނިމޭއިރު، ދައުލަތުގެ ދަރަނި 155 ބިލިއަން ރުފިޔާއިން މައްޗަށް އަރާ ކަމަށެވެ.
2025 ވަނަ އަހަރަށް ހުށަހަޅާފައިވާ ބަޖެޓުގައި އަންނަ އަހަރު ނިމޭއިރު ދައުލަތުގެ ޖުމްލަ ދަރަނި ހުންނާނެ ކަމަށް ލަފާކޮށްފައިވަނީ 150 ބިލިއަން ރުފިޔާކަން ފާހަގަކުރައްވައި އަމީރު ވިދާޅުވީ އޮކްޓޫބަރު މަސް ތެރޭ އިންޑިއާއިން ނަގާފައިވާ 400 މިލިއަން ޑޮލަރުގެ ކަރަންސީ ސްވޮފް ދަރަނީގެ ހިސާބުތަކުން ފެންނަން ނެތް ކަމަށެވެ. އަދި 2023 ނިމުނުއިރު ދައުލަތުގެ ޖުމްލަ ދަރަންޏަކީ 124 ބިލިއަން ރުފިޔާ ކަމަށާއި، ރައީސް ޑރ.މުހައްމަދު މުއިއްޒުގެ ވެރިކަމަށް 1 އަހަރު ވީއިރު ދަރަންޏަށް 20 ބިލިއަން ރުފިޔާ އިތުރުކޮށް ޖުމްލަ ދަރަނި 145 ބިލިއަންއަށް އަރުވާފައިވާ ކަމަށް އޭނާ ވިދާޅުވިއެވެ.
ދަރަނި މިސްރާބު ހުރި ގޮތުން ކޮންމެ އަހަރަކު ދަރަންޏަށް 15 ބިލިއަން އާއި 20 ބިލިއަން ރުފިޔާގެ އަދަދެއް އިތުރުވާނެ ކަމަށް ބެލެވޭ ކަމަށާއި، 5 އަހަރު އަހަރުގެ ދައުރު ނިމޭއިރު ޖުމްލަ ދަރަނި 220 ބިލިއަން ރުފިޔާއަށް އިތުރުވެގެންދާނެ ކަމަށް އަންދާޒާ ކުރެވޭ ކަމަށް އަމީރު ވިދާޅުވިއެވެ.
2025 ވަނަ އަހަރުގެ ބަޖެޓުން ނަގާ ދަރަންޏާ އިންޓްރެސްޓް ހަރަދު ދިމާ ނުވާތީ އެކަން ފާހަގަކުރައްވައި އަމީރު ވިދާޅުވީ 2025 ވަނަ އަހަރުގެ ބަޖެޓު ފައިނޭންސް ކުރުމަށް ބޭނުންވާ ފައިސާގެ 60 އިންސައްތަ ނުވަތަ 765 މިލިއަން އެމެރިކާ ޑޮލަރު ހޯދާނެ ކަމަށް ޖަހާފައިވަނީ ބޭރުން ނަގާ ލޯނު މެދުވެރިކޮށް ކަމަށެވެ. މީގެ ތެރެއިން 432 މިލިއަން އެމެރިކާ ޑޮލަރު ހޯދާނެ ކަމަށް ޖަހާފައި އޮތީ ބޭރުގެ ކޮމާޝަލް ބޭންކުތަކުން ލޯނު ނަގައިގެން ކަމަށް އޭނާ ވިދާޅުވިއެވެ.
ނަމަވެސް މި ބަޖެޓުގެ އިންޓްރެސްޓް ހަރަދަށް ބެލުމުން ފެންނަނީ ކޮމާޝަލް ބޭންކުތަކުން ނަގާ ލޯނުތަކަށް ދައްކަން ޖަހާފައިވަނީ އެމެރިކާ ފެޑެރަލް ރިޒާވްގެ ފެޑް ފަންޑްސް ރޭޓުގައި ކަމަށާއި، މިއީ ކަންބޮޑުވާ ކަމެއް ކަމަށް އަމީރު ވިދާޅުވިއެވެ. އަމީރު ވިދާޅުވީ ކޮމާޝަލް ބޭންކްތަކުން ކޮންސެޝަނަލް އިންޓްރަސްޓް ރޭޓުގައި ލޯނު ލިބޭނެ ކަމަށް ނިންމީ ކިހިނެތް ކަމެއް ސާފު ނުވާ ކަމަށެވެ. އަދި ވިދާޅުވީ މިފަދަ ރޭޓުތަކުގައި ފައިނޭންސް ދެނީ އައިއެމްއެފް އަދި ވޯލްޑް ބޭންކް ފަދަ އިދާރާތަކުން ކަމަށާއި، ޚާއްސަކޮށް ޕްރޮގްރާމްއަށް ވަންނަ ހާލަތްތަކުގައި ކަމަށެވެ.
އަމީރު ވިދާޅުވީ ސަރުކާރުން މިފަދަ ޕްލޭނެއް ގެންގުޅޭ ކަމުގައިވާނަމަ އެކަން ރައްޔިތުންނަށް ސާފުކޮށްދޭންޖެހޭ ކަމަށެވެ. އަދި ސަރުކާރުގެ ފައިނޭންސްގ ޕްލޭން މިހާތަނަށް ފެއިލްވެފައިވާއިރު، މި ބަޖެޓަށް ފައިސާ ހޯދޭނެ ކަމުގެ އެއްވެސް ޔަގީން ކަމެއް ނެތް ކަމަށް އޭނާ ވިދާޅުވިއެވެ.
