ލަމްހާ ބަންދުން ދޫކޮށްލަން އަނެއްކާވެސް އެދިއްޖެ، ދިފާއުން ބުނަނީ ބަންދުގައި ހުރުމުން ހައްގުތައް ގެއްލޭކަމަށް
ދައުލަތުން ވަނީ ލަމްހާ ބަންދުން ދޫކޮށްލުމަށާއި ގޭބަންދަށް ބަދަލުކުރުމަށްވެސް ދެކޮޅު ހަދާފައި
ހަލީމަތު ލަމްހާ އަބްދުއްރަޙްމާން
މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ ހަލީމަތު ލަމްހާ ބަންދުން ދޫކޮށްދިނުމަށް އަނެއްކާވެސް އެދިއްޖެއެވެ.
މޭރީ ގްރޭސްގެ މަރުގެ މައްސަލައިގައި ދައުވާކުރަނީ ހަލީމަތު ލަމްހާގެ އިތުރުން މޭރީގެ ފިރިމީހާ އަދި ލަމްހާ ލޯބީގެ ގޮތުން ގުޅިގެން އުޅުނު މާވިންގެ މައްޗަށެވެ. މޭރީގެ މަރުގެ މައްސަލާގައި އުމުރުން 30 އަހަރުގެ މާވިން ހައްޔަރުކުރީ އޮކްޓޫބަރު 27، 2021 ގައެވެ. ލަމްހާ ހައްޔަރުކުރީ ނޮވެމްބަރު 16، 2021 ގައެވެ.
މީގެ ކުރިންވެސް ކްރިމިނަލް ކޯޓުގައި އެދިގެން ލަމްހާ ޝަރުތުތަކާއެކު ދޫކޮށްލިއެވެ. މިދިޔަ ނޮވެމްބަރު މަހު އޭނާ ދޫކޮށްލަން ކޯޓުން އަމުރުކުރި ނަމަވެސް ދައުލަތުން މި މައްސަލަ ހައިކޯޓަށް ހުށަހެޅުމުން، 20 ޑިސެމްބަރު 2023 ގައި ދިވެހިރާއްޖޭގެ ހައިކޯޓުން ވަނީ ކްރިމިނަލް ކޯޓުގެ ނިންމުން ބާތިލުކޮށް އޭނާގެ ބަންދު ދަމަހައްޓާފައެވެ.
ޝަރީއަތް ނިމެންދެން ބަންދުކޮށްފައި ހުރި ލަމްހާގެ ބަންދު މުރާޖައާ ކޮށްދިނުމަށް މިދިޔަ އޮކްޓޫބަރު މަހު ކްރިމިނަލް ކޯޓަށް އަނެއްކާވެސް ވަނީ ހުށަހަޅާފައެވެ.
ކްރިމިނަކް ކޯޓުގައި ކުރިއަށްދިޔަ އަޑުއެހުމުގެ ލަމްހާގެ ފަރާތުން ވަނީ ލަމްހާ ބަންދުގައި ބަހައްޓަން ޖެހޭ ސަބަބެއް އޮތް ކަމަށް ގަބޫލު ނުކުރެވޭ ކަމަށާއި އަދި ބަންދު ދިގުލައިގެން ދިޔުމުގެ ސަބަބުން އޭނާގެ ހައްގުތައް ގެއްލެމުންދާ ކަމަށް ބުނެފައެވެ. ލަމްހާ ދޫކޮށްލާފައި ހުއްޓާ ހައިކޯޓުން އޭނާ ބަންދުކުރަން އަމުރުކުރީ އޭރު ދަށު ކޯޓުގައި މައްސަލައާއި ގުޅޭ ހެކިބަސް ނަގަމުންދާތީ ޝަރީއަތް ދެން ލަސްވެގެން ނުދާނެ ކަމަށް ބެލުމަށްފަހު ކަމަށެވެ.
މީގެ އިތުރުން ދިފާއުން ވަނީ ކްރިމިނަލް ކޯޓުގެ ޝަރީއަތްތައް އެކަށީގެންވާ ގޮތަކަށް މިހާރު ކުރިއަށް ނުދާތީ މައްސަލަ ދިގުލައިގެން ދިއުމަކީ ހައްގުތައް ގެއްލޭ ކަމެއް ކަމަށާއި، ހެއްކަށް ނުފޫޒު ފޯރުވަފާނެކަމަށް ދައުލަތުން ބުނި ނަމަވެސް، މި މައްސަލައިގައި ގިނަ އަދަދެއްގެ ބައެއްގެ ހެކި ނަގާފައިވުމުން އެ ފުރުސަތު ހަނިކަމަށްވެސް ލަމްހާގެ ވަކީލު ވަނީ ފާހަގަކުރައްވާފައެވެ.
ނަމަވެސް ދައުލަތުން ވަނީ ލަމްހާ ދޫކޮށްލުމަށް އަދި ގޭ ބަންދަން ބަދަލުކުރުމަށް ވެސް ދެކޮޅު ހަދާފައެވެ. އަދި އިތުރު ހެކިންގެ ހެކިބަސް ނެގުން ކުރިއަށް އެބައޮތް ކަމަށާއި، ލަމްހާގެ ބަންދުކޮށްފައި ހުރީ މުޖުތަމައުއަށް ނުރައްކާވާ ފަދަ ޖިނާއީ ބޮޑު ކުށެއް ޖަމާއަތް ހަދައިގެން ކުރުމުގެ ތުހުމަތުގައި ކަމަށެވެ. އެހެންކަމުން އެ ހާލަތް އަދިވެސް އޮތުމުން ލަމްހާ ދޫކޮށްލަން އެއްބަސް ނުވެވޭނެކަމަށް ދައުލަތުން ވަނީ ބުނެފައެެވެ.
ލަމްހާގެ މައްޗަށް، އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވާއިރު، އޭނާގެ މައްޗަށް ވަނީ, އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާވެސް އުފުލާފައެވެ. އަދި މި މައްސަލައިގައި ހިމެނޭ މާވިންގެ މައްޗަށް ދައުލަތުން އުފުލާފައިވަނީ އެނގިހުރެ މީހަކު މެރުމުގެ ދައުވާއެވެ.
އަދި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދަައުވާވެސް ލަމްހާގެ މައްޗަށް އުފުލާފައިވާއިރު، ލަމްހާ ދިރިއުޅޭ ގެ ކްރިމިނަލް ކޯޓުގެ އަމުރެއްގެ ދަށުން ބަލައި ފާސްކުރިއިރު، ލަމްހާ ދިރިއުޅޭ ކޮޓަރި ތެރެއިން، ހޮސްޕިޓަލްތަކާއި ފަރުވާދޭ މަރުކަޒުތަކުގެ ބޭނުމަށް އެކަނި ދޫކުރެވޭ ބާވަތުގެ ބޭސްތަކެއް ފެނިފައިވެއެވެ.
