ޓެކްސް ބޮޑު ކުރާ ބިލު ރައީސް މުއިއްޒު ތަސްދީގު ކުރެއްވުމާއެކު ވައުދު އުވިއްޖެ

ޓީޖީއެސްޓީ، ގްރީން ޓެކްސް އަދި އެއަރޕޯޓު ފީތައް ބޮޑުކުރުމަށް ރައްޔިތުންގެ މަޖިލީހުން ފާސްކޮށްފައިވާ ބިލްތައް އަންގާރަ ދުވަހު ރައީސް ޑރ. މުޙައްމަދު މުޢިއްޒު ތަޞްދީޤު ކުރައްވައިފިއެވެ. މިއީ އެއްވެސް ޓެކްސްއެއް ބޮޑުނުކުރައްވާނެ ކަމަށް ރައީސް މުޢިއްޒު ވެވަޑައިގެންނެވި ވަޢުދާ ޚިލާފަށް ކުރެއްވި ކަމެއްކަން ފާހަގަ ކުރެވެއެވެ.

ރައްޔިތުންގެ މަޖިލީހުން 31 އޮކްޓޯބަރ 2024 ވީ ބުރާސްފަތި ދުވަހު ފާސްކުރި ބިލުތަކަށް ރައީސް މުޢިއްޒު އަންގާރަ ދުވަހު ތަސްދީގުކުރެއްވުމާ ގުޅިގެން، މި ގާނޫނުތަކުގެ ދަށުން ހުރި ގަވާއިދުތަކަށް އިސްލާހު ގެނެސް 30 ދުވަހުގެ ތެރޭގައި ގެޒެޓުކުރަންޖެހޭނެ ކަމަށް ވެސް ވަނީ ކަނޑައަޅާފައެވެ.

މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ގެނެވުނު އިސްލާހާ އެކު، 2025 ވަނަ އަހަރުގެ ޖޫން މަހުން ފެށިގެން ޓީޖީއެސްޓީ 16 އިންސައްތަ އިން 17 އިންސައްތަ އަށް ބޮޑުކުރުމަށް ވަނީ ނިންމާފައެވެ. މީގެ އިތުރުން، ޓޫރިޒަމް ގާނޫނަށް ގެނެވުނު އިސްލާހާ އެކު 2025 ވަނަ އަހަރުގެ ޖެނުއަރީ މަހުން ފެށިގެން ގްރީން ޓެކްސް 6 ޑޮލަރުން 12 ޑޮލަރަށް ބޮޑުކުރުމަށް ވެސް ވަނީ ނިންމާފައެވެ.

އެއަރޕޯޓު ޓެކްސް އަދި ފީތައް ބޮޑުކުރަން ނިންމާފައިވަނީ މިއަހަރުގެ ޑިސެންބަރު 1 އިން ފެށިގެންނެވެ.

ޓެކްސްގެ އެއްވެސް ސީލިން އެއް ބޮޑުކޮށް ޓެކްސް ބޮޑުކުރަން ގަސްތު ނުކުރައްވާ ކަމަށް އެކި ޕްލޭޓްފޯމްތަކުގައި ރާއީސް ޑރ. މުޙައްމަދު މުޢިއްޒު ވަނީ ވިދާޅުވެފައެވެ.

ރައީސް މުޢިއްޒުގެ އިންތިޚާބީ ވަޢުދާ ޚިލާފުވެ، އަހަރެއް ނުވަނީސް ޓެކްސްތައް ބޮޑުކުރުމާ ގުޅިގެން ގިނަ ބަޔަކު ވަނީ ފާޑުކިޔާފައެވެ. އެހެންނަމަވެސް، ސަރުކާރުން ބުނެފައިވަނީ މި ފިޔަވަޅުތަކަކީ ޤައުމުގެ އިޤްތިޞާދީ ހާލަތު ރަނގަޅުކުރުމަށް ކޮންމެހެން އަޅަންޖެހޭ ފިޔަވަޅުތަކެއް ކަމަށެވެ.