ދުނިޔޭގެ އެންމެ ބާރުގަދަ ޕާސްޕޯޓުގެ ލިސްޓުގެ އެންމެ ކުރީގައި އޭޝިއާގެ 10 ގައުމު: ދިވެހިރާއްޖެ އޮތީ ކޮން ހިސާބެއްގައި؟
ސިންގަޕޫރު ވަނީ އަނެއްކާވެސް ދުނިޔޭގެ އެންމެ ބާރުގަދަ ޕާސްޕޯޓް އޮތް ޤައުމުގެ ގޮތުގައި ހޮވިފައި
2012 ވަނަ އަހަރު ރާއްޖޭގެ ފަތުރުވެރިކަމަށް 40 އަހަރު ފުރުން ފާހަގަ ކުރުމަށް ފަތުރުވެރިންގެ ޕާސްޕޯޓުގައި ޖަހާފައިވާ ޚާއްސަ ތައްގަނޑު
2024 ވަނަ އަހަރުގެ އޮކްޓޯބަރ މަހު ނެރުނު އެންމެ ފަހުގެ ހެންލީ ޕާސްޕޯޓް އިންޑެކްސްގެ މަޢުލޫމާތު ދައްކާގޮތުން، ސިންގަޕޫރު ވަނީ އަނެއްކާވެސް ދުނިޔޭގެ އެންމެ ބާރުގަދަ ޕާސްޕޯޓް އޮތް ޤައުމުގެ ގޮތުގައި ހޮވިފައެވެ. ސިންގަޕޫރުގެ ރައްޔިތުންނަށް 195 ޤައުމަކަށް ވިސާ ނުލައި ދަތުރުކުރެވެއެވެ.
ފްރާންސް، ޖަރުމަނުވިލާތް، އިޓަލީ، ޖަޕާން އަދި ސްޕެއިން ވަނީ ދެވަނައިގައެވެ. މި ޤައުމުތަކުގެ ރައްޔިތުންނަށް 192 ޤައުމަކަށް ވިސާ ނުލައި ދަތުރުކުރެވެއެވެ.
އެމެރިކާ ވަނީ 8 ވަނައިގައެވެ. އެމެރިކާގެ ރައްޔިތުންނަށް 186 ޤައުމަކަށް ވިސާ ނުލައި އެތެރެވެވޭނެއެވެ.
ލިސްޓުގައި 53 ވަނަ ގައި ދިވެހިރާއްޖެ އޮތް އިރު، ދިވެހި ރައްޔިތުންނަށް 94 ޤައުމަކަށް ވިސާ ނުލައި ދަތުރުކުރެވޭނެއެވެ.
ދިވެހި ޕާސްޕޯޓަށް ހެންލީ ޕާސްޕޯޓް އިންޑެކްސްގައި މިހާތަނަށް އެންމެ މަތިން ލިބިފައި ވަނީ 2014 އަދި 2013 ގައެވެ. މި ދެ އަހަރުވެސް ރާއްޖެއަށް 49 ވަނަ ލިބިފައިވެއެވެ.
އޭޝިއާގެ ޤައުމުތަކުން ވަނީ ގިނަ އަހަރުތަކެއް ވަންދެން ހެންލީ ޕާސްޕޯޓް އިންޑެކްސްގައި އެންމެ މަތީ ދަރަޖަތައް ހޯދަމުން ގޮސްފައެވެ. ޖަޕާން، ސިންގަޕޫރު އަދި ދެކުނު ކޮރެއާ ފަދަ ޤައުމުތައް ގިނަފަހަރަށް ދުނިޔޭގެ އެންމެ ބާރުގަދަ ޕާސްޕޯޓްތަކުގެ ތެރޭގައި އެންމެ މަތީ ދަރަޖައިގައި ހޮވޭއިރު، އެ ޤައުމުތަކުގެ ރައްޔިތުންނަށް ވިސާ ނުޖަހާ ގިނަ ޤައުމުތަކަށް ދަތުރުކުރެވެއެވެ. މިކަމުން ދައްކުވައިދެނީ މި ޤައުމުތަކުން ދުނިޔޭގެ އެހެން ޤައުމުތަކާ އެކު ބިނާކޮށް ދަމަހައްޓަމުންދާ ވަރުގަދަ ޑިޕްލޮމެޓިކް ގުޅުންތަކެވެ.
ހެންލީ ޕާސްޕޯޓް އިންޑެކްސްގައި ޕާސްޕޯޓްތަކުގެ ދަރަޖަ ކަނޑައަޅަނީ ތަފާތު ގިނަ ކަންތައްތަކެއް ބަލައިގެން ފުރިހަމަ މެތަޑޮލޮޖީއެއް ބޭނުންކޮށްގެންނެވެ. މީގެ ތެރޭގައި ހިމެނެނީ ޕާސްޕޯޓް ހޯލްޑަރަކަށް ވިސާ ނުނަގާ ވަދެވޭ ޤައުމުތަކުގެ އަދަދާއި، އެ ޤައުމެއްގެ ޑިޕްލޮމެޓިކް ގުޅުންތަކާއި، އަދި ބައިނަލްއަޤްވާމީ އެއްބަސްވުންތަކެވެ.
2024 ވަނަ އަހަރުގެ ހެންލީ ޕާސްޕޯޓު އިންޑެކްސްއަށް ބަލާއިރު ދުނިޔޭގެ އެންމެ ބަލިކަށި ޕާސްޕޯޓުތަކުގެ ތެރޭގައި އަފްޣާނިސްތާން، ސީރިއާ، އިރާޤު، ޔަމަން، ސޯމާލިއާ އަދި ޕާކިސްތާނު ހިމެނެއެވެ. މި ޕާސްޕޯޓުތަކުގެ ވެރިންނަށް ގިނަ ޤައުމުތަކަށް ދަތުރުކުރުމަށް ވީސާ ހޯދަން ޖެހެއެވެ.
