ރައީސް ނަޝީދަކީ ދުނިޔޭގެ ފެންވަރުގެ ހީރޯއަކަށް ވާތީ، ރައީސް ޔާމީން ޖޭ ވަނީ: ރޮޒެއިނާ

ކުރީގެ ރައީސް މުހައްމަދު ނަޝީދަކީ، ދުނިޔޭގެ ފެންވަރުގެ މަގުބޫލު ހީރޯއަކަށް ވާތީ، ރައީސް ޔާމީން ޖޭ ވަނީކަމަށް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ.

ހުރިހާ ސިޔާސީ ލީޑަރުން އެދިވަޑައިގެންފި ނަމަ، ރައީސް ނަޝީދު މިނިވަން ވާނޭ ގޮތަށް މަސައްކަތް ކުރައްވާނޭ ކަމަށް ވިދާޅުވެ، ރައީސުލްޖުމްހޫރިއްޔާ ޢަބްދުﷲ ޔާމީން ދެއްކެވި ވާހަކަފުޅަށް ރައްދު ދެއްވައި، ނ.މިލަދޫގައި ބުރާސްފަތި ދުވަހުގެ ރޭ އޮތް އެމްޑީޕީގެ ކެމްޕެއިން ޖަލްސާގައި ވާހަކަ ދައްކަވަމުން ރޮޒެއިނާ ވިދާޅުވީ، ރައީސް މުހައްމަދު ނަޝީދަށް ހުކުމްކޮށް ޖަލަށްލީ ހެކިހުށައަޅާ ދައުވާއިން ދިފާއުވުމަށް އެމަނިކުފާނަށް ފުރުސަތުވެސް ލިބިވަޑައިނުގަނެ ކަމަށެވެ.

Advertisement

ރައީސް ނަޝީދު ހައްޔަރުކޮށް ޖަލަށްލީ މިހާރުވެސް އުފެދިފައި ހުރި ގާނޫނު ތަކުގެ ދަށުންތޯ ރޮޒެއިނާ ވަނީ ސުވާލުކުރައްވާފައެވެ. އޭނާ ވިދާޅުވީ، ރައީސް ޔާމީނު ފުރަތަމަ ކުރައްވަންވީކަމަކީ، މިހާރު ހުރި ގާނޫނު ތަކަށް ތަބާވެވަޑައިގަތުން ކަމަށް ރޮޒޭނާ ވިދާޅުވިއެވެ.

ގަނޫނު ބަދަލުކުރައްވާ ވާހަކަފުޅު ރައީސް ޔާމީން ވިދާޅުވާއިރު،ޕީޕީއެމްގެ ޕީޖީ ލީޑަރު ނިހާނު ހުސެއިން މަނިކު އޭރު ބެރިކޭޑުމަތިން ފުންމާލީ ފުލުހުން ދައުވަތު ދީގެންތޯ ރޮޒެއިނާ ސުވާލުކުރެއްވިއެވެ.

ކުނޫޒުގައި ގާސިމް އިބްރާހިމް ދެއްކެވި ވާހަކަފުޅަކާއި ގުޅިގެން، މެންބަރަކު ޚިޔާލު ބަދަލުވުމަކުން އެއީ ނުފޫޒު ފޯރުވުން ނޫންކަމަށް ރޮޒޭ ވިދާޅުވިއެވެ.

" ތޮއްޔިބާއި ލޫކަސް ލިޔެލާ ޓްވީޓަކުން ގެންގޮސް ޖަލަށް ލަނީ ކޮން ގާނޫނަކުންތޯ. ގައުމީ ސަލާމަތަށް ނުރައްކާ ވަނިއްޔޯ" ރޮޒެއިނާ ވިދާޅުވިއެވެ.

ރައީސް ޔާމީން ނޫން ހުރިހާ ސިޔާސީ ލީޑަރުންނަަކީ ގައުމީ ސަލާމަތަށް ހުރިނުރަކަލަކަށް މިއަދު ވެއްޖެކަމަށް ރޮޒެއިނާ ވިދާޅުވިއެވެ.

ސަރުކާރުގެ ތެރޭގައި ކޮރަޕްޝަން އޮތް ކަމަށް ބުނެ ފާޑުކިޔާ ފަރާތްތަކުން ވާހަކަ ދެއްކި ނަމަވެސް، ކޮރަޕްޝަން އޮތީ ކޮން ކަމެއްގައިކަން ބުނެނުދެވޭ ކަމުގައި ރައީސުލްޖުމްހޫރިއްޔާ ވިދާޅިވި ވިދާޅުވުމަށް ރަށްދުދެއްވާ ރޮޒެއިނާ ވިދާޅުވީ، 3 ބިލިއަނަށް ވުރެ ގިނަ ރުފިޔާ ދިވެހި ދައުލަތުން ގެއްލުނީމައި ކޮރަޕްޝަން އަކީ ކޮބައިތޯ އޭ ވިދާޅުވެ ރައީސް ޔާމީން ކޮރަޕްޝަނުގެ ވާހަކަ ދެއްކީމައި އެ ވަނީ މިއަދު ބޮޑު ޖޯކަކަށްކަމަށެވެ. އަދި އެއީ ކޮރަޕްޝަނަށް ނުވަނީތޯ ރޮޒެއިނާ ސުވާލުކުރެއްވިއެވެ.

އިދިކޮޅުގައި ހުންނެވި އިރު ފުލުހުން ނުކުމެ ވެރިކަން ބަދަލުކުރަން ގޮވާލެއްވި އިރު އެކަން ސިޔާސީ ކަމަކަށް އޭރު ވެފައި މިއަދު އެއީ ޓެރެރިޒަމަށް ވާންވީ ކިހިނެއްކަމެއް ނުވިސްނޭކަމަށް ރޮޒެއިނާވިދާޅުވިއެވެ.

ރޮޒެއިނާ ވިދާޅުވީ، މިފަދަ ކަންކަމާމެދު ރައްޔިތުން މިއަދު ވަރަށް ބޮޑަށް ވިސްނަންޖެހެއެެވެ. އަދި ކުރިއަށް އޮތް ކައުންސިލް އިންތިޚާބުގެ މުހިއްމު ފުރުސަތުގެ ބޭނުން ވަރަށް ވިސްނުންތެރިކަމާއިއެކު ހިފުމަށް ރޮޒެއިނާވަނީ ދިވެހި ރައްޔިތުންނަށް ގޮވާލައްވާފައެވެ.