ޓެކްސީ ޚިދުމަތް ދިނުމަށް ސަރުކާރުން ވަނުމާއި މެދު ކުރި އެއްވެސް ސުވާލަކަށް މިނިސްޓަރގެ ޖަވާބެއް ނެތް
ހުރިހާ ޑޮމައިން ހުއްދަތައް އާ ކުރާނެކަން މިނިސްޓަރ ވަނީ ހާމަކުރައްވާފަ
ޓްރާންސްޕޯޓް މިނިސްޓަރު އަމީން
ޓެކްސީ ޚިދުމަތް ދިނުމަށް ސަރުކާރުން ވަނުމާއި މެދު ކުރި އެއްވެސް ސުވާލަކަށް ސަރުކާރަށް ޖަވާބެއް ނުދެވުނެވެ.
އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީން މިނިސްޓަރާއި ސުވާލުކޮށްފައި ވަނީ އެ މިނިސްޓްރީ އިން ޓެކްސީ ޚިދުމަތް ދިނުމަށް ސަރުކާރުން ވަނުމާއި މެދު ކުރެވެމުންދާ މަސައްކަތްތަކާއި ޓެކްސީ ޚިދުމަތްތަކާއި މެދު ޓެކްސީ ޑްރައިވަރުންނާއި އާއްމުން ކުރަމުންދާ ބައެއް ސުވާލުތަކަށެވެ. ނަމަވެސް މަދަނީ އުދުހުންތަކާ ބެހޭ ވަޒީރު މުޙައްމަދު އަމީން އެއިން އެއްވެސް ސުވާލަކަށް ޖަވާބުދެއްވާފައެއް ނުވެއެވެ. އޭގެ ބަދަލުގައި ޓެކްސީ ޚިދުމަތްތައް ދިނުމުގެ މައްސަލަ އަކީ މި ސަރުކާރުގައި ދިމާވި މައްސަލަ އެއް ނޫން ކަމަށާއި ޚިދުމަތް ދިނުމުގައި މައްސަލަތައް ދިމާ ވަނީ އެ މައްސަލަ އަށް ކުރިން އަޅާ ނުލެވި ވުމުން ކަމަށް ވަނީ ސިފަކުރައްވާފައެވެ.
ރާއްޖެ އެމްވީން ވަނީ ސަރުކާރުން އެކުލަވަލާލާ ޓެކްސީ ލައިން ހަދަން ފަށާ ސަބަބަކީ ޑްރައިވްރުން ބޮޑު އަގު ނެގުމާ، ބުނާ ހިސާބުތަކަށް ނޫދާތީ ކަމަށް މިނިސްޓަރު ވިދާޅުވެފައި ވާއިރު، ޓެކްސީ ޑްރައިވްރުން ބޮޑު އަގު ނަގާ ޑްރައިވްރުންނާއި މެދު ފިޔަވަޅު އެޅުމަކީ ރެގިއުލޭޓަރީ އޮތޯރިޓީ ގެ ކަމެއް ކަމަށް ޑްރައިވަރުން ބުނާތީ އެކަމާއި މެދު މިނިސްޓަރގެ ބަހެއް ސާފުކޮށްދިނުމަށް އެދިފައެވެ. އަދި ނުވަދެވޭ މަގުތައް ޑްރައިވަރުން މިނިސްޓްރީ އާއި ހިއްސާކޮށްފައިވާ އިރު އެކަމާއި މެދު އެޅި ފިޔަވަޅެއް ސާފުކޮށްދިނުމަށް ވެސް ވަނީ އެދިފައެވެ.
މީގެ އިތުރުން ޓެކްސީ ލައިނަށް ސަރުކާރުން ވަނުން ހުއްޓުވާ ދިނުމަށް ޑްރައިވަރުންގެ ޖަމިއްޔާ އިން މަޖިލީހުގެ ކޮމިޓީގާ އެދިފައިވާތީ، އެކަމާ ގުޅިގެން ނިންމުމަށް ބަދަލެއް ގެންނަވާނެތޯ ނޫނީ ކުރީގެ ނިންމުމާއި އެއްގޮތަށް ކުރިއަށް ދަނީތޯ ސާފުކުރުމަށް ވަނީ ސުވާލުކޮށްފައެވެ. ހަމައެހެންމެ ސަރުކާރުން ޓެކްސީ ޚިދުމަތް ފަށައިފި ނަމަ ސަރުކާރުން ޓެކްސީ ޚިދުމަތް ފެށުމުން މިހާރު މިކަމުން އާމްދަނީ ހޯދާ މިހުންނަށް ލިބޭނެ ގެއްލުމުގެ ދިރާސާ އެއް ކުރެވިފައިވޭތޯ ސުވާލުކޮށްފައިވެއެވެ. ސުކާރުގެ ޓެކްސީ ލައިންގައި މަސައްކަތް ކުރާ މީހުންނަށް 100 ރުފިޔާ ގަޑި އިރަކަށް ދޭން ޖެޙޭ ގޮތަށް ހަމަޖައްސާ އިރު ތެޅޮއަޅާ ސާފުކުރަން ޓެކްސީ ދުއްވާ މީހުން ނުޖެހޭނެ ކަަމަށް ބުނެފައި ވާއިރު 300 ކާރުގެ ފީސިބިލިޓީ އާއި މެދު ރާއްޖެޓީވީން ވަނީ ސުވާލުކޮށްފައެވެ.
އެއިން އެއްވެސް ސުވާލަކަށް ވަޒީރު ޖަވާބެއް ނުދެއްވައެވެ. މިނިސްޓަރ ވަނީ ސުވާލުގެ ޖަވާބު އަމިއްލައަށް އެނގެން ޖެހޭނެ ކަމަށާއި، އިންވެސްޓިގޭޓިވް ޖާނަލިޒަމް އިން ނޫސްވެރިޔާ އަމިއްލައަށް ޖަވާބުހޯދުމަށް އެދިވަޑައިގަންނަވާފައެވެ. މިނިސްޓަރ އިތުރަށް ވިދާޅުވީ މިނިސްޓަރުގެ ވާހަކަފުޅުގެ ރިކޯޑިންގ އިން ވިސްނުމާއި، ފިކުރިއްޔާތާއި، ސަބަބުތަކަށް ބެލުމަށްފަހު ޖަވާބު ހޯދުމަށެވެ.
އެ ނޫސްވެރިންގެ ބައްދަލުވުމުގައި މިނިސްޓްރީގެ މަސައްކަތްތަކާއި މެދު ވާހަކަދައްކަވަމުން ސެކިއުޓީ ފީޗަރތަށް އިތުރުކޮށް ރެޖިސްޓްރީ އަލުން ދޫކުރާގޮތަށް، ހުރިހާ ޑޮމައިން ހުއްދަތައް އާ ކުރާނެކަން މިނިސްޓަރ ވަނީ ހާމަކުރައްވާފައެވެ. އަދި މިމަހުގެ 17 ވަނަ ދުވަހު އެކަމަށް ހުޅުވާލާނެކަމަށް މިނިސްޓަރ ވިދާޅުވިއެވެ. މީގެ އިތުރުން އެކަމުގެ ސަބަބުން ރާއްޖޭގައި ބޭނުންކުރާ ޑޮމައިންގެ ސައްޙަކަށް ކަށަވަރުކޮށް އަދި ޑޮމައިން ބޭނުންކުރާ މީހުންނަށް ބޭނުންވާ ރައްކާތެރިކަން ކަށަވަރުކުރެވޭނެ ކަމަށް ވަޒީރު ވިދަޅުވިއެވެ.
މީގެ އިތުރުން ހުރިހާ ޑޮމައިންތަކުން ލިޔެކިޔުންތައް ހުށަހެޅުމަށާއި، އައު އުސޫލާ އެއްގޮތަށް ޑޮމައިން ރެޖިސްޓްރީ ބަދަލުކުރުމުގެ އިތުރުން، ސެކިއުރިޓީ ފީޗަރތަކާއެކު ލިބޭ ލައިސަންސެއް ލިބޭނެކަމަށް އެ މަނިކުފާނު ވިދާޅުވިއެވެ.
