ފަސް އަހަރުގެ ދައުރެއް ނިންމާލާފައި ގޮސް ބޭފުޅަކު، 18 ބުރި ގެއެއް އެޅި އިރު ދިވެހި ރައްޔިތުން ކަނެއް ނޫން - އައްބާސް
ކޮންމެ ސަރުކާރަކުން ވެސް ވެރިކަމަށް އަންނަނީ ދައުލަތަށް ވެފައިވާ ހިޔާނާތްތައް ބަލާ ފިޔަވަޅު އަޅާނެކަމުގެ ވައުދައި އެކުގައިކަން އޭނާ ވަނީ ފާހަގަކުރައްވާފަ
ވެލިދޫ ދާއިރާގެ މެމްބަރު މުހައްމަދު އައްބާސް އަދި ކުރީގެ ރައީސް ޔާމީން
ކުރީގެ ރައީސް އަބްދުﷲ ޔާމީން 5 އަހަރުގެ ވެރިކަމެއް ނިންމާފައި ގޮސް 18 ބުރީގެ ގެއެއް އެޅި އިރު ދިވެހި ރައްޔިތުން ކަނު ނޫން ކަމަށާއި އެކަންކަމާއި މެދު ދިވެހިން ސުވާލު އުފައްދާ ކަމަށް ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެއެވެ.
އޭނާ އެފަދައިން ވިދާޅުވީ ދައުލަތުގެ މަޤާމެއްގައި ހުރެ ހޯދާފައިވާ ނުހައްގު މުއްސަނދިކަމަށް ފަސޭހައިން ދައުވާކުރެވޭ ގޮތަށް ގާނޫނުލް އުގޫބާތަށް އިސްލާހު ގެނައުމުގެ ބިލަށް ބަހުސްކުރައްވަމުންނެވެ.
ދައުލަތުގެ އިދާރާތަކުގެ ތެރޭގައި އަށަގެންފައިވާ ކޮރަޕްޝަނާއި ނުހައްގު މުއްސަދިކަން ހޯދުމުގެ މައްސަލަތައް ތަހްގީގުކޮށް، ދަޢުވާކުރުމަށް ހުރި ގޮންޖެހުންތައް ނައްތާލުމަށް ހެދިފައި ހުރި ޤާނޫނުތައް މަދު ނޫން ކަމަށް އޭނާ ވިދާޅުވިއެވެ. ހަގީގަތަކީ އެކަން ކުރުމަށް އެކަަށައަޅާފައިވާ މުއައްސަސާތަކަށް އެކަން ބެލުމަށް ނުކުޅެދުން ކަމަސް މެމްބަރު އައްބާސް ވިދާޅުވިއެވެ. ކޮންމެ ސަރުކާރަކުން ވެސް ވެރިކަމަށް އަންނަނީ ދައުލަތަށް ވެފައިވާ ހިޔާނާތްތައް ބަލާ ފިޔަވަޅު އަޅާނެކަމުގެ ވައުދައި އެކުގައިކަން އޭނާ ވަނީ ފާހަގަކުރައްވާފައެވެ. ހަމައެހެންމެ ކޮންމެ މަޖިލީހުގެ މެމްބަރުން ވެސް އަންނަނީ ކޮރަޕްޝަން ނައްތާލުމުގެ ވައުދާއި އެކުގައި ކަމަށް އޭނާ ވިދާޅުވިއެވެ.
އޭނާ ވިދާޅުވީ ނުހައްގުން މުއްސަނދިކަން ހޯދާ މީހުން އެނގެން އޮންނަ ކަމަށެވެ. ސަބަބަކީ އަތުގައި އެއްވެސް އެއްޗެއް ނެތި ( ފައިސާ އާއި މުދަލުގެ ތަނަވަސްކަން ނެތި) ރައީސުލްޖުމްހޫރިއްޔާކަމަށް ވަޑައިގެން، ފަސް އަހަރުގެ ދައުރެއް ނިންމާލާފައި ގޮސް 18 ބުރި ގެއެއް އެޅި އިރުގައި އެކަން ފެންނާނެ ކަމަށް އައްބާސް ވިދާޅުވިއެވެ. އޭސީސީ ފަދަ މުއައްސަސާތަކަށް ފާރަވެރި ނުވެވޭ ނަމަ ކިތަންމެ ވަރުގަދަ ޤާނޫނެއް ހެދިޔަސް ނަތީޖާ އެއް ނުނިކުންނާނެ ކަމަށް އޭނާ ވިދާޅުވިއެވެ. އަދި ރައްޔިތުން އެފަދަ ކަންކަމުގައި އިތުބާރު ކުރާނީ ބަހާއި އަމަލާއި ދިމާވެގެން ކަމަށް ވެސް އޭނާ ވިދާޅުވިއެވެ.
ދައުލަތުގެ އިދާރާތަކުގެތެރޭގައި އަށަގެންފައިވާ ކޮރަޕްޝަނާއި ނުޙައްގު މުއްސަނދިކަން ހޯދުމުގެ މައްސަލަތައް ތަހުގީގުކޮށް، ދަޢުވާ ކުރުމުގައި ހުރި ގޮންޖެހުންތައް ނައްތާލުމަށް ދިވެހިރާއްޖޭގެ ޤާނޫނުލް ޢުޤޫބާތަށް ގެންނަން އިސްލާހެއް ހުށަހަޅާފައިވާއިރު، މިފަދަ މައްސަލަތައް ތަހުގީގު ކުރުމަށް އުފައްދާފައިވާ އެންޓި ކަރަޕްޝަން ކޮމިޝަންގެ ރައީސް އައްޔަން ކުރުމުގެ ބާރު ރައީސުލް ޖުމްހޫރިއްޔާ އަށް ލިބިދޭ ގޮތައް އެންޓިކަރަޕްޝަން ކޮމިޝަންގެ ގާނޫނަށް ބަދަލު ގެނައުމަށްވެސް ސަރުކާރުން ވަނީ މަޖިލީހަށް ހުށަހަޅާފައެވެ.
