ޗެލްސީން ޔުނައިޓެޑާ އެއްވަރު ކޮށްފި

އިނގިރޭސި ޕްރިމިއަރ ލީގުގައި މެންޗެސްޓަރ ޔުނައިޓެޑާއި، ޗެލްސީ ބައްދަލު ކުރި މެޗު އެއްވަރުވެގެން ނިމިއްޖެ އެވެ.

ޔުނައިޓެޑުގެ އަމިއަލަ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ޔުނައިޓެޑުންނެވެ. ނަމަވެސް ޗެލްސީން ވަނީ ފަހަތުން އަރައި ލަނޑު ޖަހައި، ނަތީޖާ ހަމަހަމަ ކޮށްފަ އެވެ. މިއީ ޔުނައިޓެޑުގެ ކޯޗުކަމުން ނެދަލެންޑްސްގެ އެރިކް ޓެން ހާގް ވަކި ކުރި ފަހުން ޔުނައިޓެޑު ކުޅުނު ދެ ވަނަ މެޗެވެ. އަދި ލީގުގައި އެ ޓީމު ކުޅުނު ފުރަތަމަ މެޗެވެ. ޔުނައިޓެޑަށް މިވަގުތު އިރުޝާދު ދެމުން އަންނަނީ އެސިސްޓެންޓު ކޯޗު ރޫޑް ވެން ނިސްޓަލްރޫއި އެވެ.

މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ނުޖެހެ އެވެ. ދެ ވަނަ ހާފުގައި ޔުނައިޓެޑުން ލީޑު ނެގީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. މެޗުގެ 70 ވަނަ މިނެޓުގައި ޕެނަލްޓީ ކާމިޔާބުކޮށް ޔުނައިޓެޑަށް ލީޑު ނަގައިދިނީ ކެޕްޓަން ބްރޫނޯ ފެނާންޑޭސް އެވެ. ނަމަވެސް އޭގެ އެންމެ ހަތަރު މިނެޓު ފަހުން ޗެލްސީން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ މޮއިސަސް ކައެސޭޑޯ އެވެ.

ނަތީޖާ އާއެކު ޔުނައިޓެޑު އޮތީ ލީގު ތާވަލްގެ 13 ވަނަ މަގާމުގަ އެވެ. އެއީ މިހާތަނަށް ކުޅުނު 10 މެޗުން 12 ޕޮއިންޓު ހޯދައިގެންނެވެ. މިއީ ޔުނައިޓެޑުގެ ތާރީޚުގައި ވެސް ޕްރިމިއާ ލީގުގައި އެ ޓީމު އެންމެ ދަށްކޮށް ފަށަން ޖެހުނު ފަހަރެވެ. މީގެ ކުރިން ލީގުގައި ޔުނައިޓެޑު އެންމެ ދަށްކޮށް ފަށަން ޖެހުނީ، ޕްރިމިއާ ލީގު އަލުން ރީ ބްރޭންޑޫ ވެސް ކުރުމުގެ ކުރިންނެވެ. ޔުނައިޓެޑާ އެއްވަރުކޮށް، ލިބުނު ޕޮއިންޓާ އެކު ޗެލްސީ އޮތީ ޖުމުލަ 18 ޕޮއިންޓު ހޯދައިގެން ހަތަރު ވަނައިގަ އެވެ.