ނަތަންޔާހޫ އޮފީހުން ސިއްރު މަޢުލޫމާތު ލީކްކުރި ކަމަށް ޝައްކު ކޮށް މުވައްޒަފުންތަކެއް ހައްޔަރުކޮށްފި

އިޒްރޭލުގެ ބޮޑުވަޒީރު ބެންޔަމިން ނަތަންޔާހޫގެ އޮފީހުން އިންތިހާ ދަރަޖައިގެ ސިއްރު މައުލޫމާތު ލީކު ކުރި ކަމުގެ ތުހުމަތުގައި މުވައްޒަފުންތަކެއް ހައްޔަރު ކޮށްފި ކަމަށް އިޒްރޭލުގެ މީޑިއާ އިން ބުނެފިއެވެ.

ގިނަ އަދަދެއްގެ މުވައްޒަފުން، ޝިން ބެޓުން ހައްޔަރު ކުރީ ޣައްޒާގައި އިޒްރޭލުން ހިންގަމުންދާ ނަސްލު ނައްތާލުމުގެ ހަނގުރާމަ އާ ބެހޭ މައުލޫމާތު ލީކު ކޮށްގެން ކަމަށްވެސް މި ޚަބަރުގައި ވެއެވެ.

އިޒްރޭލުގެ މީޑިއާއިން މި ޚަބަރު ހާމަކޮށްފައިވަނީ އިޒްރޭލުގެ މެޖިސްޓްރޭޓް ކޯޓަކުން މިކަމާ ބެހޭ ގޮތުން ނެރުނު ބަޔާނަކާ ހަވާލާދީއެވެ. އެ ބަޔާނުގައި ބުނެފައިވަނީ ބޮޑުވަޒީރުގެ އޮފީހުން ސިއްރު ލިޔެކިޔުންތަކެއް ލީކްވުމާ ގުޅިގެން ހުކުރު ދުވަހު ގިނަ އަދަދެއްގެ މީހުން ހައްޔަރުކުރެވުނު ކަމަށެވެ.

މެޖިސްޓްރޭޓް ކޯޓުން އިތުރަށް ބުނެފައިވަނީ، އެމީހުން ހައްޔަރު ކުރީ އިޒްރޭލުގެ ފުލުހުން – ޝިން ބެޓް އާއި، އިޒްރޭލުގެ ސިފައިންނާއި ގުޅިގެން ހިންގާ ތަހުގީގަކަށް ކަމަށެވެ.

ހައްޔަރު ކުރި މީހުންގެ މައްޗަށް ކުރެވޭ ތުހުމަތަކީ، "ސެންސިޓިވް މަޢުލޫމާތު ލީކު ކުރުމާއި، އެކަމުގެ ސަބަބުން ޣައްޒާގައި އިޒްރޭލުން ހާސިލު ކުރަން ބޭނުންވާ ލަނޑުދަނޑިތައް ހާސިލު ކުރުމަށް ހުރަސް އެޅުމެވެ."

ވައިނެޓް އިން ރިޕޯޓު ކޮށްފައިވާ ގޮތުގައި ހައްޔަރުކުރެވުނު މީހުންގެ ތެރޭގައި ބޮޑުވަޒީރުގެ އޮފީހުގައި ތަރުޖަމާނެއްގެ ގޮތުގައި މަސައްކަތް ކުރި ފަރާތެއްވެސް ހިމެނެއެވެ.

އިސްރާއީލުން ޣައްޒާއަށް އަނިޔާވެރި ހަމަލާތައް ދޭން ފެށީ 7 އޮކްޓޯބަރު 2023 ގައެވެ. މި ހަމާލާތަކަށް އަހަރަކަށް ވުރެ ގިނަ ދުވަސް ފާއިތުވެގެން ގޮސްފައިވާއިރު، މުޅި ޣައްޒާ ފުނޑުފުނޑުވެ، ކުށެއްނެތް އެތައް ހާސް ފަލަސްތީނުގެ ރައްޔިތުން ވަނީ އިޒްރޭލުގެ އަނިޔާވެރި ހަމަލާތަކުގައި ޝަހީދުވެފައެވެ.