ރައީސް ޑރ. މުހައްމަދު މުއިއްޒު ވެރިކަމަށް ގެނެސްގެން "ޅަ އެއްޗެއް" އެޅުނުކަން ޒުވާނުން މިއަދު ޤަބޫލުކުރަން އެބަ ޖެހޭ ކަމަށް މޯލްޑިވިއަން ޑިމޮކްރެޓިކް ޕާޓީ، އެމްޑީޕީގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އައިކު އަހުމަދު އީސާ ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ.
އެ ޕްރޮގްރާމްގައި ވާހަކަދައްކަވަމުން އައިކު ވިދާޅުވީ ދިވެހި ޒުވާނުން މުއިއްޒު ކެނޑިޑޭޓެއްގެ ގޮތުގައި ހުންނަނަވައިގެން ދެއްކި ވާހަކަތައް ޤަބޫލުކުރި ކަމަށެވެ. އެގޮތުން ރިޔާސީ އިންތިޚާބުގެ ކެމްޕެއިންގެ ދުވަސްވަރު ޓިކްޓޮކް އާއި ސޯޝަލް މީޑިއާގެ އެހެން ޕްލެޓްފޯމްތައް ބޭނުންކޮށްގެން ރައީސް މުއިއްޒު ދެއްކެވި ވާހަކަތައް ބަލައިގަނެ މުއިއްޒު އަށް ވޯޓު ދިން މީހުން މިއަދު ތިބީ މާޔޫސް ކަމެއްގައި ކަަމަށް އައިކު ވިދާޅުވިއެވެ. އެ ޒުވާނުންނަށް ހެދުނީ ގޯހެއްކަން މިއަދު އިހުސާސްވާ ކަމަށް އޭނާ ވިދާޅުވިއެވެ. ޒުވާނުންނަށްޓަކާ އެކަށީގެންވާ ކަންތައްތަކެއް ސަރުކާރަށް ނުކޮށްދެވޭ ކަަމަށް ފާހަގަކޮށް އައިކު ވަނީ ސަރުކާރުން ޒުވާނުންނަށްޓަކާ ވީ ވައުދުތައް ނުފުއްދޭތީ އެކަމަށް ފާޑު ވިދާޅުވެފައެވެ. އެގޮތުން ޒުވާނުންނަށް ބޭނުންވާ ވަޒީފާގެ ފުރުސަތުތައް ފަހިކޮށް ނުދެވުމާއި، ޒުވާނުން ތިބި ވަޒީފާގެ ރައްކާތެރިކަން ވެސް ކަށަވަރު ނުވުމަކީ ބޮޑު ކަންބޮޑުވުމެއް ކަމަށް އޭނާ ވިދާޅުވިއެވެ.
ގައުމު ރަނގަޅު ކުރުމަށް މަސައްކަތް ކުރުމަށް އަދިވެސް ފުރުސަތު އެބަ އޮތް ކަމަށް އައިކު ވަނީ ވިދާޅުވެފައެވެ. އައިކު ވިދާޅުވީ ދިވެހި ޒުވާނުންނަށް ހެދުނީ ގޯހެއް ކަމަށް މިއަދު ޒުވާނުން ވެސް ޤަބޫލުކުރާނެ ކަމަށާއި އެކަން އިސްލާހު ކުރެވޭނީ ވެސް އެ ޒުވާނުންނަށް ކަމަށެވެ. ކުރިއަށް އޮތް ކައުންސިލް އިންތިޚާބަކީ އެ ގޯސް ރަނގަޅުކުރަން ލިބޭ ފުރުސަތެއް ކަމަށާއި މިހާރުން ފެށިގެން އެކަމަށް ތައްޔާރުވާން ޖެހޭ ކަމަށް އައިކު ވިދާޅުވިއެވެ. އޭނާ ވަނީ ސަރުކާރު ޖަވާބުދާރީކުރުވަން ކައުންސިލް އިންތިޚާބުގައި ފުރުސަތު ހޯދަން ޖެހޭ ކަމަށް ވިދާޅުވެފައެވެ. އަދި ރައީސް މުއިއްޒު އަށް ވެރިކަން ދީގެން ހެދުނު ގޯސް ރަނގަޅުކުރާ ބަޔަކަށް ޒުވާނުން ވާން ޖެހޭ ކަމަށާއި އެކަން ކުރުމަށްޓަކާ ކުރިއަށް އޮތް ކައުންސިލް އިންތިޚާބުގައި ރައީސް މުއިއްޒު އަށް ހަރު އަޑުން ނޫނެކޭ ބުނަން ޖެހޭ ކަމަށް އޭނާ ވިދާޅުވިއެވެ.
މި ފަހަރު މިއޮތީ ޒުވާނުންނަށް ޅަ އެއްޗެއް އެޅިފައި. އެހެން ބުނާ ސަބަބަކީ ކެމްޕެއިން ތެރޭގައި ކުޅެލި ދެ ތިން ޓިކްޓޮކަކާ، ހައެއްކަ ވާހަކަ އާ، ޕޭޕައިލްއެއްގެ ވާހަކަ ދެއްކެވި އެގޮތަށް ޒުވާނުންނަށް ކަމުދާނެ ވަރަށް ކޫލް ޓިކްޓޮކެއް ކުޅެލީ. ކޫލްވެގެން ދިން ވޯޓުގެ އަސަރު މި ފެންނަނީ. މާދަމާ ނޮވެމްބަރު 3. ޝަހީދުންގެ ދުވަހު ޒުވާނުން ޤައުމު ދޫކޮށްފަ ދިޔައީ ޤައުމަށް ހަދާނެހާ އެއްޗެއް ބަޔަކު ހަދާކަށް ނޫން. މިއީ އަޅުގަނޑުމެންނަށް އޮތް ޒިންމާއެއް. ކުރިއަށް އޮތް ޖީލުތަކަށް ގައުމު ސަލާމަތުން ހަވާލުކުރުމަކީ އަޅުގަނޑުމެންގެ ޒިންމާއެއް.އެމްޑީޕީގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އައިކު އަހުމަދު އީސާ
އެމްޑީޕީގެ ޒުވާނުންގެ ރޫހުގައި ވެސް އިސްކޮށް ހަރަކާތްތެރިވެވަޑައިގަންނަވާ އައިކު ވަނީ މި ސަރުކާރުން ޒުވާނުންނަށް ދެއްކީ ހަގީގަތަށް ނުވާ ހުވަފެންތަކެއް ކަަމަށް ސިފަކުރައްވާފައެވެ. މީގެ އިތުރުން 2025 ވަނަ އަހަރުގެ ބަޖެޓަށް ބަލާއިރުގައި ވެސް ޒުވާނުންނަށް ފަހި އެއްވެސް ކަމެއް ހިމަނާފައި ނެތް ކަމަށް އައިކު ވިދާޅުވިއެވެ. ހަމައެހެންމެ ލާމަރުކަޒީ ނިޒާމް ހަނިކުރުމަކީ ވެސް ޒުވާނުންނަށް ރަށުގައި ތިބެގެން ރަށުގެ ކުރިއެރުމަށް މަސައްކަތްކުރުމަށް އޮތް ފުރުސަތު ގެއްލޭ ކަމެއް ކަަމަށް އައިކު ވަނީ ވިދާޅުވެފައެވެ. މީގެ އިތުރުން ޚިޔާލު ފާޅުކުރުމުގެ މިނިވަންކަން އިންތިހާ އަށް ހަނިވުމުން އާއްމުން ތިބެން ޖެހެނީ ބުނެވޭ ބަހެއްގެ ޒާތުން ވަޒީފާ ގެއްލިދާނެކަމުގެ ބިރުވެރިކަމާއި އެކުގައި ކަމަށް އޭނާ ވިދާޅުވިއެވެ. އަދި ޤަވާއިދާއި އުސޫލުތަކަށް ބެލުމެއް ނެތި އެތައް ބަޔަކު ވަޒީފާއިން ވަކިކުރަމުންދާތީ އެއީ ސަރުކާރުން އާއްމުންނާއި މެދު އިހާނެތިކޮށް ހިތާކަން ހާމަވާ ކަމެއް ކަމަށް އޭނާ ވިދާޅުވިއެވެ.
