ހ.ސްނޯލިލީ އިން 539 ގްރާމްގެ މަސްތުވާތަކެތި ފެނުނު މައްސަލަ އާއި ގުޅިގެން ހައްޔަރުކޮށްފައިވާ މީހަކު 30 ދުވަހުގެ މުއްދަތަށް ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފިއެވެ.

ކްރިމިނަލް ކޯޓުން ނެރުނު ބަންދު އަމުރުގައި ބުނެފައި ވަނީ ލ.ފޮނަދޫ، ކަނީރުގެ، އަލީ ރުޝްދާން ޒާހިރު މަސްތުވާތަކެތި ބޭނުންކޮށް ގެންގުޅެ އެތަކެތީގެ ވިޔަފާރިކުރުމުގެ މައްސަލައެއްގައި ބަންދުގައި ބެހެއްޓުމަށް އަމުރުކޮށްފައިވާ ކަމަށެވެ. ހ.ސްނޯ ލިލީ އަކީ އޭނާ ދިރިއުޅެމުންދިޔަގެއެވެ. އެގޮތުން އޭނާ އޮކްޓޯބަރ 20 އިން ފެށިގެން 29 ނޮވެމްބަރުގެ ނިޔަލަށް ބަންދުގައި ބެހެއްޓުމަށް ވަނީ އަމުރުކޮށްފައެވެ.

ކްރިމިނަލް ކޯޓުގެ ބަންދު އަމުރުގައި ބުނެފައި ވަނީ އޭނާގެ މައްޗަށް ތުހުމަތުކޮށްފައިވާ ކުށް ކުރި ކަމަށް ތުހުމަތުކުރެވޭ މިންވަރަށް ހެއްކާއި ގަރީނާ ހުށަހަޅާފައިވާ ކަމަށެވެ. އަދި އޭނާ ކުރިމަތީގައި ހުރި މޭޒުމަތިން ޓްރެފިކިންގެ މިންގަނޑަށް އަރާވަރަށް ހުރި މަސްތުވާތަކެއްޗާއި ޑިޖިޓަލް ކައްޓާ އާއި ހުސް ރަބަރު ޕެކެޓް ފެނިފައިވާ ކަމަށް ވަނީ ބުނެފައެވެ. އޭނާގެ ޖީބުގައި އޮތް ތަޅުދަނޑިއަކުން އެ ގޭގައި ހުރި ތިޖޫރީއެއްގެ ތެރެއިން ގާތްގަނޑަކަށް 16000 ރުފިޔާ ފެނިފައިވާ ކަމަށް ވެސް ވަނީ ބުނެފައެވެ.

އެހެންކަމުން ޤާނޫނު އަސާސީގެ 49 ވަނަ މާއްދާ އާއި ޖިނާއީ އިޖުރާއަތުގެ 59، 60 ވަނަ މާއްދާގެ (ކ) އަށް ރިއާޔަތްކޮށް، ބަންދުން ދޫކޮށްލައިފި ނަމަ މުޖުތަމައުގެ ސަލާމަތަށް ނުރައްކާވާނެ ކަމަށް ފެންނާތީ އޭނާ ބަންދުކުރުމަށް ނިންމާކަމަށް އެ އަމުރުގައިވެއެވެ.

މި މައްސަލަ އާއި ގުޅިގެން ކޯޓު އަމުރު ހޯދާފައި ވަނީ އެ ގޭގެ 1 އަދި 2 ވަނަ ބައި ބަލާ ފާސްކުރުމަށެވެ. ނަމަވެސް އެ ގޭގެ 3 ބައިންވެސް ވަނީ މަސްތުވާތަކެތި ފެނިފައެވެ. އަދި އެގޭގެ 3 ވަނަ ބަޔަކީ ދައުލަތަށް ދޫކޮށްފައިވާ ތަނެއް ކަމަށް ވެސް އިތުރު ބަޔާނުގައި ވަނީ ފާހަގަކޮށްފައެވެ. 3 ވަނަ ބައި ފާސްކުރީ ކޯޓު އަމުރެއް ނެތިކަމުން މި މައްސަލައިގައި ފުލުހުން ނުބައި ތަސައްވުރެއް އުފެއްދުމަށް މަސައްކަތްކުރާ ކަަމަށް ދިފާއީ ވަކީލް ވަނީ ތުހުމަތުކޮށްފައެވެ. އަލީ ރުޝްދާން އަކީ މަސްތުވާތަކެތީގެ މައްސަލަތަކުގެ ކުށުގެ ރެކޯޑް އޮތް މީހެކެވެ.