ފެންސީ ފުޑްސްގެ ފަރާތުން ރާއްޖެ އެތެރެކޮށް ޑިސްޓްރިބިއުޓްކުރާ ކޮއްތުމީގެ މުޅިން އާ ފްލޭވަރތަކެއް ރާއްޖެ އަށް ތައާރަފްކޮށްފިއެވެ.
ކޮއްތުމީގެ އާ ފްލޭވަރތައް ތައާރަފްކޮށްފައި ވަނީ ހޮނިހިރު ދުވަހު އެކަމަށްޓަކާ ބޭއްވި ޚާއްސަ ހަފްލާއެއްގައެވެ.
ހޮނިހިރު ދުވަހު އަލަށް ތައާރަފްކުރި ޕްރޮޑަކްޓްތަކާއި މެދު ޕްރީމާ ކޮއްތުމީ - ލަންކާގެ ހެޑް އޮފް އިންޓަރނޭޝަނަލް މާކެޓިން، އަޗާލާ ރަމަނަޔެކަ ވިދާޅުވީ ޕްރީމާ ކޮއްތުމީ ބްރޭންޑް ރާއްޖެ އަށް ތައާރަފްކުރިތާ 12 އަހަރުވެގެން ގޮސްފައިވާ ކަމަށެވެ. ޕްރީމާ ކޮއްތުމީ އިން ރާއްޖޭގައި ހޭދަކުރި މުއްދަތުގައި އެ ޕްރޮޑަކްޓަކީ ކާމިޔާބު ޕްރޮޑަކްޓެއްގެ ގޮތުގައި އާއްމުން ބަލައިގަނެފައިވާކަމަށް އޭނާ ފާހަގަކުރެއްވިއެވެ. އެހެންކަމުން ކޮއްތުމީގެ އިތުރު ރަހަތަށް ރާއްޖެ އަށް ތައާރަފްކުރަން ވިސްނާފައިވާކަމަށް އޭނާ ވިދާޅުވިއެވެ. އެގޮތުން ކޮއްތުމީގެ ހޮޓްއެންޑް ސްޕައިސީ އާއި ޗިކަން އެންޑް މަސާލާ ފަދަ ރަހަތައް މީގެ ކުރިން ވާނީ ކަސްޓަމަރުންނާއި ހަމައަށް ގެނެސްދީފައި ކަމަށް އޭނާ ވަނީ ފާހަގަކޮށްފައެވެ. މީގެ އިތުރުން މިހާރު ޕްރީމާ ކޮއްތުމީ ކޮރެއަން ރާމަން ފިއެރީ ޗިކެން (ޓޫއެކްސް ސްޕައިސީ) އަދި ޕްރީމާ ކޮއްތުމީ ކޮރެއަން ޗީސް ރާއްޖެ އަށް ތައާރަފްކުރުމަށް ނިންމާފައިވާ ކަމަށް އޭނާ ވިދާޅުވިއެވެ.
އެ ޕްރޮޑަކްޓް ލޯންޗްކުރުމުގެ ހަފްލާގައި ވާހަކަދައްކަވަމުން ފެންސީ ފުޑްސްގެ ޑިރެކްޓަރ އަލީ ޝިޔާޒް ވަނީ ކޮއްތުމީ ރާއްޖެ އަށް ތައާރަފްކޮށްފައި ވަނީ 2008ގައިކަން ފާހަގަކުރައްވާފައެވެ. ޕްރީމާ ކުންފުނީގެ ފަރާތުން ރާއްޖެ އަށް ތައާރަފްކޮށްފައިވާ އެ ޕްރޮޑަކްޓަކީ ދިވެހިންގެ މެދުގައި މަޤްބޫލު ޕްރޮޑަކްޓެއްކަމަށް ވާއިރު، ހޮނިހިރު ދުވަހު އަލަށް ތައާރަފްކުރި މި ފްލޭވަރތަކަކީ ދިވެހިންނަށް ވަރަށް ކަމުދާނެ ފަދަ ފްލޭވަރތަކެއްކަމަށް އުންމީދު ކުރެވޭ ކަަމަށް އޭނާ ވަނީ ވިދާޅުވެފައެވެ. މިހާރުވެސް ކޮއްތުމީ ސްޕައިސީ ކޮރެއަން ރާމެން މާކެޓްގައި ލިބެން ހުންނާނެ ކަމަށް އޭނާ ވިދާޅުވިއެވެ. އަދި ޗީޒް ފްލޭވަރ 10-15 ވަރަކަށް ދުވަހުގެ ތެރޭގައި މާކެޓުން ލިބެން ހުންނާނެ ކަމަށް އޭނާ ވަނީ ވިދާޅުވެފައެވެ. މި ޕްރޮޑަކްޓްތައް ފެންސީ ފުޑްސްގެ ބާޒާރުމަތީގައި ހުންނަ މެއިން ހޯލްސޭލް އައުޓްލެޓް، ހުޅުމާލޭގައި ހުންނަ ރީޓެއިލް އަދި ހޯލްސޭލް އައުޓްލެޓް، އައްޑޫގެ ހޯލްސޭލް އައުޓްލެޓް އަދި ސުޕަރމާޓްތަކުންނާއި، ކޮއްތުމީ ބްރޭންޑް ލިބެން ހުންނަ ކަންމަތީ ފިހާރަކުން ވެސް ލިބޭނެ ކަމަށް އޭނާ ވިދާޅުވިއެވެ. އަދި އަގުތަކަށް ބަލާއިރު މާކެޓްގައި ލިބޭ އެހެން ނޫޑްލްސް އަށް ވުރެ ބޮޑުތަނުން އަގުހެޔޮވާނެ ކަމަށް އޭނާ ވަނީ ފާހަގަކުރައްވާފައެވެ.
އެ ހަފްލާގައި ވާހަކަދައްކަވަމުން ޕްރީމާ ކޮއްތުމީ - ލަންކާގެ ޖެނެެރަލް މެނޭޖަރ ސަޖިތް ގުނަރަތްނެ ވިދާޅުވީ މިއީ ފުރާވަރުގެ ކުދިންނާއި ޒުވާނުންގެ މެދުގައި ވަރަށް މަޤްބޫލް ފްލޭވަރތަކަކަށް ވާނެ ކަމަށެވެ. ކޮއްތުމީ އަކީ މިހާރުވެސް ވަރަށް ގިނަ ބަޔަކަށް ކަމުދާ ޕްރޮޑަކްޓެއްކަން އޭނާ ވަނީ ފާހަގަކުރައްވާފައެވެ. ރާއްޖޭގެ އާބާދީގެ ބޮޑުބައެއް ޒުވާނުން ހިއްސާކުރާ އިރު ކޮރެއަން ރާމެންއަކީ ޒުވާނުންނަށް ވަރަށް ކަމުދާ ޕްރޮޑަކްޓްތަކެއް ކަމަށް އޭނާ ވަނީ ފާހަގަކުރައްވާފައެވެ. ފެންސީ ފުޑްސް މެދުވެރިކޮށް ރާއްޖެ އަށް މި ޕްރޮޑަކްޓްތައް ލޯންޗްކުރާ އިރު ވަރަށް އުންމީދާއި އެކު ތިބި ކަމަށް އޭނާ ވަނީ ފާހަގަކުރައްވާފައެވެ.
ކޮއްތުމީއަކީ ދިވެހިންނަށް ވަރަށް ކަމުދާ ބްރޭންޑެކެވެ. އަދި ކޮރެއަން ރާމެންއަކީ ދިވެހިންގެ މެދުގައި މަގްބޫލްކަން ހޯދަމުން އަންނަ ކެއުމުގެ ބާވަތެކެވެ.
