ހުކުރު ވިލޭރޭ ބެއިރޫތައް އިޒްރޭލުން 10 ފަހަރު ބޮން އަޅައިފި
ބުރާސްފަތި ދުވަހު ލުބުނާނުގެ ހިޒްބުﷲ އިން ވަނީ އުތުރު އިސްރޭލަށް ރޮކެޓް ޙަމަލާތަކެއް ވަނީ ދީފައެވެ. އެ ހަމަލާތަކުގައި ތައިލެންޑުގެ 4 މީހުންނާއި އިޒްރޭލު މީހަކު ވަނީ މަރުވެފައި
ހުކުރު ދުވަހުގެ ރޭ އިޒްރޭލުން ދިން ވަރުގަދަ ބޮމުގެ ހަމަލާތަކާއެކު ބެއިރޫތުގެ މަތިން ބޯދުން އަރަނީ
ލުބުނާނުގެ ނޭޝަނަލް ނިއުސް އެޖެންސީ (އެންއެންއޭ) އިން ރިޕޯޓުކުރާ ގޮތުގައި، ވެރިރަށް ބެއިރޫތުގެ ދެކުނު ސަރަޙައްދުގެ ބައެއް ހިސާބުތަކަށް، ހުކުރު ވިލޭރޭ 10 ފަހަރު އިޒްރޭލުގެ ބޯޓުތަކުން ބޮން އަޅައިފިއެވެ. އިޒްރޭލުން ބޮން އެޅި އިރު އެ ސަރަހައްދުގައި ދިރިއުޅޭ އާބާދީ އެމީހުންގެ ވަޒަން ދޫކޮށް ނުކުމެގެން ދިއުމަށް އިޒްރޭލުން އޮތީ އަމުރު ނެރެފައެވެ.
މި ޙަމަލާތަކުގެ ސަބަބުން އެ ސަރަހައްދުތަކަށް ބޮޑެތި ގެއްލުންތަކެއް ލިބި، އެތައް ޢިމާރާތްތަކެއް ވަނީ ބިންމަތިވެފައެވެ. ބޮން އެޅުމުގެ ސަބަބުން އެކި ސަރަހައްދުތައް އަނދަމުން ދާ ކަމަށްވެސް އެންއެންއޭ އިން ބުނެފައިވެއެވެ.
އިޒްރޭލު ސިފައިން ވަނީ ދާހިޔާ ސަރަޙައްދުގެ ބައެއް ހިސާބުތަކުން އާބާދީ ހުސްކުރުމަށް ވެސް އަމުރު ނެރެފައެވެ. މިއަމުރާ އެކު އިޒްރޭލުން އިންޒާރުދީފައިވަނީ ނުރައްކާތެރި ހަމަލާތައް އެ ސަރަހައްދަށް ދޭނެ ކަމުގައެވެ.
އަނެއްކޮޅުން ބުރާސްފަތި ދުވަހު ލުބުނާނުގެ ހިޒްބުﷲ އިން ވަނީ އުތުރު އިސްރޭލަށް ރޮކެޓް ޙަމަލާތަކެއް ދީފައެވެ. އެ ހަމަލާތަކުގައި ތައިލެންޑުގެ 4 މީހުން މަރުވެ، ތައިލެންޑުގެ އިތުރު މީހަކަށް އަނިޔާވެފައިވާކަން ތައިލެންޑުގެ ފޮރިން މިނިސްޓަރ ވަނީ އެކްސް (ޓްވިޓަރ) ގައި ކަށަވަރުކޮށްދެއްވާފައެވެ.
ތައިލެންޑުގެ 4 ރައްޔިތުން މަރުވި ހާދިސާ ގައި ހިޒްބުﷲ ގެ ރޮކެޓް އަމާޒުވީ އިޒްރޭލުން ހިފައިފައިވާ ސަރަހައްދުގެ ދަނޑުބިމަކަށެވެ. މަރުވީ އެ ތަނުގައި ދަނޑުވެރިކަމުގެ މަސައްކަތުގައި އުޅުނު ތައިލެންޑުގެ 4 މީހުންނާއި އިޒްރޭލުގެ ދަނޑުވެރިއެއް ކަމަށް ރިޕޯޓުތައް ބުނެއެވެ.
އަނެއްކޮޅުން އިރާގުގައި ހަރަކާތެރިވާ ހަތިޔާރުއެޅި ގްރޫޕްތަކުގެ ނެޓްވޯކުން ހުކުރު ދުވަހުގެ ހެނދުނު އިޒްރޭލުގެ ދެކުނަށާއި އަދި އިޒްރޭލުން ހިފާފައިވާ ގޯލާންގެ އުސްބިމުގައި ހުރި މުހިންމު "އަމާޒުތަކަކަށް" ވަކިވަކިން ހަތަރު ޑްރޯން ހަމަލާދީފި ކަމަށް ބުނެފިއެވެ.
އެ ގްރޫޕްތަކުން ސޯޝަލް މީޑިއާގައި ޕޯސްޓްކޮށްފައިވާ ގޮތުގައި، ތިން ޑްރޯން ހަމަލާއެއް އަމާޒުކޮށްފައިވަނީ އިޒްރޭލުގެ ދެކުނަށެވެ. އަދި އެއް ހަމަލާ އަމާޒުކޮށްފައި ވަނީ ގޯލާންގެ އުސްބިމުގައި ހުރި "މުހިންމު އަމާޒަކަށެވެ."
އިޒްރޭލުގެ މީޑިއާއިން ހުކުރު ދުވަހުގެ ކުރީކޮޅު ބުނެފައިވަނީ، އިރުމަތިން އިޒްރޭލަށް އަމާޒުކޮށް ފޮނުވާފައިވާ ދެ ޑްރޯން ރަތްކަނޑުގެ މަތިން އުދުހެމުން ދަނިކޮށް ޖެޓް މަތިންދާބޯޓުތަކުން މަތަކޮށްފައިވާ ކަމަށެވެ. އިތުރު ތަފްސީލެއް ދީފައެއް ނުވެއެވެ.
