އޮކްޓޯބަރު މަހުގެ މެދެއްހާ ހިސާބެވެ. އިވުނީ ވޭޕް ބޭނުންކުރުމާއި، އެތެރެކުރުމާއި ވިޔަފާރިކުރުން މަނާކުރަން ރައީސް ޑރ. މުހައްމަދު މުއިއްޒު ނިންމެވި ޚަބަރެވެ. އަޅުގަނޑަކީ ވޭޕް ބޭނުންކުރާ އަދި ދުންފަތުގެ އިސްތިއުމާލު ކުރާ މީހެއް ވެސް ނޫނެވެ. އެހެންވީމަ އަޅުގަނޑަށް ޒާތީ ގޮތުން އެކަމުން އަންނަ ފަރަގެއް ނެތެވެ. މި ނިންމެވުން ރައީސް ނިިންމެވީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024ން ފެށިގެން މަނާ ކުރުމަށް އަންގަވާފައިވާކަން ހާމަކުރައްވައެވެ. ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިސްތިހާރު ކުރުމާއި ހިލޭބެހުން 15 ޑިސެމްބަރ 2024ން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފަކަން ވެސް ހާމަކުރެއްވިއެވެ.

ދެން އޭގެ ހަފްތާއެއްހާ ދުވަސް ފަހުން އައީ އިމްޕޯޓް އެކްސްޕޯޓް ޤާނޫނަށް ގެންނަ އިސްލާހެއްގެ ވާހަކައެވެ. އެ ބިލުގައި ހިމަނާފައި ވަނީ ސިނގިރޭޓުން ނަގާފީ 50 އިންސައްތަ އަދި ކޮންމެ ސިނގިރޭޓަކުން 8 ރުފިޔާ ބޮޑުކުރުމަށެވެ. އަދި ބިޑިން 50 އިންސައްތަ އަދި ކޮންމެ ބިޑިއަކުން 8 ރުފިޔާ އިތުރުކުރުމަށާއި، އީސިނގިރޭޓަށް ނުވަތަ ދުންފަތުގެ އިސްތިއުމާލު ކުރަން ބޭނުންކުރާ އާލާތްތަކަށް އަޅާ ފްލޭވާ: އިން 50 އިންސައްތަ އަދި މިލިލީޓަރަކަށް 8 ރުފިޔާ ބޮޑުކުރުމަށް ވަނީ ހިމަނާފައވެެ. ހަމައެހެންމެ ހީޓެޑް ޓޮބޭކޯ ޕްރޮޑަކްޓްސް ނުވަތަ ރޯކުރުމަކާ ނުލައި ހޫނުކޮށްގެން ބޭނުންކުރެވޭ ގޮތަށް އުފައްދާފައި ހުންނަ ދުންފަތުގެ އުފެއްދުންތަކުން 50 އިންސައްތަ އަދި ކޮންމެ ސްޓިކަކުން 8 ރުފިޔާ އިތުރުކުރުމަށް ވަނީ ހިމްނާފައެވެ. އަޅުގަނޑަކީ ވޭޕް ބޭނުންކުރާ މީހެއް ނޫނީ ދުންފަތުގެ އިސްތިއުމާލު ކުރާ މީހެއް ވެސް ނޫނެވެ. އެހެންވީމަ އަޅުގަނޑަށް ޒާތީ ގޮތުން އެކަމުން އަންނަ ފަރަގެއް ނެތެވެ. އެހެންނަމަވެސް ދުންފަތުގެ އިސްތިޢުމާލުކުރަމުން އައި މީހުންގެ މެދުގައި އެންމެ ގިނައިން ބޭނުންކުރި ވޭޕް މަނާކުރުމުން އެ ނޫން ދުންފަތުގެ ބާވަތަކަށް އެ މީހުން އެނބުރުން ގާތެވެ. އެއީ ވޭޕް މަނާކުރުމަކުން އެކަނި ދުންފަތް ނުހުއްޓޭނެތީއެވެ. އެހެންކަމަށް ވާއިރު ވޭޕްމަނާކުރުމުން އެއްކަލަ އަގުބޮޑުކޮށް ސިނގެރެޓް ފޮށި ގަންނަ މީހުން ވާނީ ހައްތަހާ އިތުރުކަމަށް އަޅުގަނޑަށް ޤަބޫލުކުރެވެއެވެ.

ސަރުކާރު މެމްބަރުން ދައްކަވަން މަސައްކަތް ކުރެއްވި މަންޒަރަކީ މި ނިންމުމުން ދުންފަތް ބޭނުންކުރާ މިންވަރު މަދުވާކަމުގެ ވާހަކައެވެ. ރާއްޖެ ޓޮބޭކޯ ފްރީ ޤައުމަކަށް ހަދަނީޔޯލައެވެ. ފަހަރުގައި ދުންފަތް މަނާކުރި ނަމަ އެހެން ބުނެވިދާނެއެވެ. އެކަމަކު ދުންފަތުގެ ތެރެއިން އަގު ބޮޑު ބާވަތެއް ގަންނަން މަޖުބޫރުވާ ގޮތަށްކަންތައް ކުރެއްވުމުން ސަރުކާރުގެ ނިޔަތާއި މެދު ސުވާލު އުފެދެއެވެ. ހަގީގަތަކީ ޓެކްސް ބޮޑުކުރަނީ ހަމައެކަނި އާމްދަނީ އިތުރުކުރަން ކަމަށް ބުނުމުގެ ފުރުސަތު ބޮޑެވެ. އެ ނޫން މަޤްސަދެއް މިކަމުން ހާސިލްކުރުމުގަ އިޚުލާސްތެރިކަމެއް ނުފެނެއެވެ. އާމްދަނީ ހޯދޭ ކޮންމެ ގޮތެއް ހޯދާ އެ ގޮތް އިޚުތިޔާރު ކުރަމުންދާ މަންޒަރު މި ދަނީ ފެންނަމުންނެވެ. ދައުލަތުގެ އާމްދަނީ އިތުރުކުރަން ކޮށްފަ ނުކުރާނެ ކަމެއް ނެތްކަން ވޭޕް މަނާކުރުމަށް ފަހު އެއާއި ވިދިގެން ދުންފަތުގެ ބާވަތްތަކުން ނަގާ ޓެކްސް ބޮޑުކުރުމުން އެނގެއެވެ.

ފަހަރެއްގާވެސް ވެސް ދުންފަތް އެތެރެ ކުރުން ހުއްޓުވުމާއި ދެކޮޅެއް ނޫނެވެ. ކަނބޮޑުވަނީ އިންތިހާ އަށް ސިނގެރެޓް ބޮޑުކޮށްފަ މާކެޓްގައި ހުރި ނަމަ އެ ނުގަންނާނެ ގޮތެއް ނުވިސްނޭތީއެވެ. އެހެންކަމުން ހަމައެކަނި ޓެކްސް ބޮޑުކޮށްގެން ދުންފަތް ބޭނުންކުރާ މިންވަރު މަދު ކުރެވިދާނެ ކަމަށް ދައްކަން މަސައްކަތްކުރުމަކީ ގޯހެކެވެ.