ކަރަބޯ ކަޕްގެ ގަދަ 16 ވަނަ ބުރުގައި ލެސްޓަރ ސިޓީއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން މުބާރާތުގެ ކުއާޓަރ ފައިނަލްގެ ފުރުސަތު ހޯދައިފި އެވެ.

ޔުނައިޓެޑުގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 5-2 އިންނެވެ. މެޗުގެ ފުރަތަމަ ހާފުގައި ޔުނައިޓެޑުން ހަތަރު ލަނޑު ޖެހިއިރު، ލެސްޓަރ އިން ދެ ލަނޑު ޖެހި އެވެ. ޔުނައިޓެޑުގެ ފަހު ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ. މިއީ ޔުނައިޓެޑުގެ ކޯޗު ކަމުން ނެދަލެންޑްސްގެ އެރިކް ޓެން ހާގް ވަކި ކުރި ފަހުން އެ ޓީމު ކުޅުނު ފުރަތަމަ މެޗެވެ. ވަގުތީ ގޮތުން ޔުނައިޓެޑަށް އިރުޝާދު ދެމުން އަންނަނީ ރޫޑް ވެން ނިސްޓަލްރޫއި އެވެ.

މެޗު ފަށައިގެން 15 ވަނަ މިނެޓުގައި ޔުނައިޓެޑަށް ލީޑު ނަގައިދިނީ ބްރެޒިލްގެ ކަސެމީރޯ އެވެ. އޭގެ ފަހުން މެޗުގެ 28 ވަނަ މިނެޓުގައި ޔުނައިޓެޑުން ވަނީ ދެ ވަނަ ލަނޑެއް ޖަހައިފަ އެވެ. ޑިއޭގޯ ޑަލޮޓް ތަނަވަސްކޮށްދިން ފުރުސަތެއްގައި އެ ޓީމަށް އެ ލަނޑު ޖަހައިދިނީ އަލެހަންދްރޯ ގާނާޗޯ އެވެ. އޭގެ ފަސް މިނެޓު ފަހުން ލެސްޓަރ ގެ ފުރަތަމަ ލަނޑު ޖެހީ އަލް ޚަނޫސް އެވެ.

އޭގެ ފަހުން ޔުނައިޓެޑުގެ ވަނީ ގާތް ގާތުގައި އިތުރު ދެ ލަނޑު ޖަަހައިފަ އެވެ. އެގޮތުން މެޗުގެ 36 ވަނަ މިނެޓުގައި ޕޯޗުގަލްގެ ބްރޫނޯ ފެނާންޑޭޒް ވަނީ ޔުނައިޓެޑުގެ ތިން ވަނަ ލަނޑު ޖަހައިފަ އެވެ. އޭގެ ތިން މިނެޓު ފަހުން ކަސެމީރޯ ވަނީ އެ ޓީމުގެ ހަތަރު ވަނަ ލަނޑު ޖަހައިފަ އެވެ. ފުރަތަމަ ހާފުގެ އިތުރު ވަގުތުގައި ލެސްޓާގެ ދެ ވަނަ ލަނޑު ޖެހީ ކޮނާ ކޯޑީ އެވެ. ދެ ވަނަ ހާފު ފަށައިގެން ސާދަ ވަނަ މިނެޓުގައި ފެނާންޑޭސް ވަނީ ޔުނައިޓެޑުގެ ފަސް ވަނަ ލަނޑު ޖަހައިފަ އެވެ.

މޮޅާއެކު މުބާރާތުގެ ކުއާޓާ ފައިނަލަށް ޔުނައިޓެޑު ދަތުރު ކޮށްފައިވާއިރު، ކުއާޓަރ ފައިނަލްގައި ޔުނައިޓެޑު ނިކުންނާނީ ޓޮޓެންހަމާ ދެކޮޅަށެވެ.