އޭސީސީ އާއި އީސީގެ ރައީސް އައްޔަންކުރުމުގެ ބާރު ރައީސަށް މުތުލަގަށް ލިބެން ޖެހޭ - ނާޒިމް
ސަރުކާރުގެ ފަރާތުން އެންޓި-ކޮރަޕްޝަން ކޮމިޝަންގެ ޤާނޫނަށް އިސްލާހު ގެނައުމުގެ ބިލު މަޖިލީހަށް ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރު
މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ޏާޒިމް
އެންޓިކޮރަޕްޝަން ކޮމިޝަން (އޭސީސީ) އާއި އިިލެކްޝަންސް ކޮމިޝަން (އީސީ)ގެ ރައީސް އައްޔަންކުރުމުގެ ބާރު ރައީސަށް މުތުލަގަށް ލިބެން ޖެހޭކަމަށް ޤަބޫލުކުރައްވާ ކަމަށް މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ޏާޒިމް ވިދާޅުވެއްޖެއެވެ.
އޭނާ އެފަދައިން ވިދާޅުވީ އެންޓ-ިކޮރަޕްޝަން ކޮމިޝަނުގެ ޤާނޫނަށް ސަރުކާރުން ގެންނަ އިސްލާހުގެ ބިލުގެ އިބްތިދާއީ ބަހުސް މަރުހަލާގައި ވާހަކަދައްކަވަމުންނެވެ. އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުރަން ޤާނޫނުތަކަށް ބަދަލު ގެންނަން ސަރުކާރުން ވަނީ ހުށަހަޅާފައެވެ. ސަރުކާރުގެ ފަރާތުން އެންޓި-ކޮރަޕްޝަން ކޮމިޝަންގެ ޤާނޫނަށް އިސްލާހު ގެނައުމުގެ ބިލު މަޖިލީހަށް ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރުއެވެ.
ނާޒިމް ވަނީ އެކަން ދިފާއުކޮށް ވާހަކަދައްކަވާފައެވެ. އެގޮތުން އޭސީސީގެ ރައީސް ހޮވާ އިޖުރާއަތު ބަދަލުކުރުމަކީ މައްސަލަ އެއް ނޫން ކަމަށާއި ސީއެސްސީގެ ރައީސް އައްޔަން ކުރާ ގޮތް ނިމިދިޔަ ސަރުކާރުން ބަދަލުކޮށްފައިވާ ކަމަށް ނާޒިމް ވިދާޅުވިއެވެ. ސީއެސްސީގެ ރައީސް އަކީ 27000 މުވައްޒަފުންގެ ކަންކަން ބަލަހައްޓާ މީހެއް ކަމަށާއި އޭނާ އަކީ ޖޭއެސްސީގެ މެމްބަރުކަންވެސް ކުރައްވާ މީހެއްކަން ނާޒިމް ފާހަގަކުރެއްވިއެވެ. އެހެންކަމަށް ވާއިރު ސީއެސްސީގެ ރައީސް ކަމަށް ބޭނުންވާ މީހަކު އައްޔަންކޮށް އޭރު ޤާނޫނު ބަދަލުކުރި އިރު މިހާރު އޭސީސީގެ ރައީސް އައްޔަންކުރާ ގޮތް ބަަލުކުރުމަކީ މައްސަލަ އެއް ކަމަށް ދެކެވަޑައިނުގަންނަވާ ކަމަށް ނާޒިމް ވިދާޅުވިއެވެ.
މިހާރު އޮތް އޭސީސީގެ ބޯޑު ހިންގަނީ ރަނގަޅަށް ކަމަށް ޤަބޫލު ނުކުރައްވާ ކަމަށް ނާޒިމް ވިދާޅުވިއެވެ. އަދި އެމްޑީޕީ ސަރުކާރުން އީސީ އަށް ހޮވި މެމްބަރުން މަސައްކަތްކުރީ އީސީގެ ރައީސްގެ ބާރު ކަނޑުވާލަން ކަމަށް ނާޒިމް ސިފަކުރެއްވިއެވެ. އެ ތިން މެމްބަރުން ޖަލްސާތަކަށް ނުގޮސް އީސީގެ ރައީސް ހައިޖެކްކުރި ކަމަށް އޭނާ ވިދާޅުވިއެވެ. އަދި އެމްޑީޕީން އީސީ އަށް ލާފައި ތިބީ ޕްރޮފެޝަނަލް ބައެއް ނޫން ކަމަށް އޭނާ ވިދާޅުވިއެވެ.
ސަރުކާރުން ހުށަހަޅާފައިވާ ބަދަލުގައި ބަޔާންކޮށްފައިވާ ގޮތުގައި ޤާނޫނުގައި މިހާރު އޮތްގޮތް ކަމަށްވާ އޭސީސީ އަދި އީސީގެ ރައީސާއި ނައިބު ރައީސް އެ ކޮމިޝަނުތަކުގެ މެންބަރުންގެ މެދުގައި ނަގާ ވޯޓަކުން އައްޔަން ކުރާ ގޮތައް އޮންނަ އޮތުން ބަދަލުކޮށް، ކޮމިޝަނުގެ ރައީސާއި ނައިބު ރައީސް އައްޔަން ކުރައްވާނީ އެ ކޮމިޝަނުގެ މެންބަރުންގެ ތެރެއިން ރައީސުލްޖުމްހޫރިއްޔާ ކަމަށް ވަނީ ހުށަހަޅާފައެވެ. އަދި ރައީސާއި ނައިބު ރައީސް ކަމަށް ކަނޑައަޅާ ފަރާތްތަކުގެ ނަންތައް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަންވާނެ ކަމަށް ވެސް މިގެންނަ ބަދަލުގައި ވެއެވެ. ރައީސުލްޖުމްހޫރިއްޔާ މަޖިލީހަށް ހުށަހަޅުއްވާ ނަން ދިރާސާކޮށް މަޖިލީހުން ފާސްކުރަން ޖެހޭނެ ކަމަށްވެސް ޤާނޫނަށް ހުށަހަޅުއްވާފައިވާ އިސްލާހުގައި ވަނީ ބަޔާންކޮށްފައެވެ.
އޭސީސީ އާއި އިލެކްޝަންސް ކޮމިޝަނުގެ ޤާނޫނުގައިވާ ގޮތުން އެ ކޮމިޝަންތަކުގެ ރައީސުން އިސްތުފާދޭން ބޭނުންވެއްޖެނަމަ އެކަން ހާމަކޮށް ސިޓީ ހުށަހަޅަންޖެހޭނީ ކޮމިޝަނަށެވެ. އަދި ނައިބު ރައީސް އިސްތިއުފާދޭން ބޭނުންވާނަމަ ސިޓީ ހުށަހަޅާންޖެހޭނީ ކޮމިޝަނުގެ ރައީސަށެވެ. ނަމަވެސް މިހާރު ހުށަހަޅާފައިވާ އިސްލާހުގައިވާގޮތުން ދެ ކޮމިޝަނުގެވެސް ރައީސާއި ނައިބު ރައީސް އިސްތިއުފާދޭ ނަމަ އެކަން ހާމަކޮށް ސިޓީ ހުށަހަޅަންޖެހޭނީ ރައީސުލްޖުމްހޫރިއްޔާއަށެވެ. އިލެކްޝަންސް ކޮމިޝަންގެ ޤާނޫނަށް އިސްލާހު ގެނައުމުގެ ބިލު ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފެވެ.
