ޖެންސެޓުތަކެއް ރަށްރަށަށް ފޮނުވަން ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ހުޅުވާލި ބީލަން އެތެރެ އެތެރެއިން ނިންމާލި މައްސަލައެއް އެންޓި ކޮރަޕްޝަން ކޮމިޝަނަށް ހުށަހަޅައިފި އެވެ.

ބީލަށް ކުރިމަތިލި ކުންފުންޏެއްގެ އިސްމީހަކު ރާއްޖެއެމްވީ އަށް ވަނީ ލިޔެކިއުންތައް ހިއްސާކޮށްފަ އެވެ.

އެމީހާ ބުނީ ބީލަމަށް ދެ ފަހަރު ފުރުސަތު ހުޅުވާލި ކަމަށާއި، ފުރަތަމަ ފަހަރު ހުޅުވާލި ބީލަން ބާތިލް ކުރީ އެ މަސައްކަތް ކުރުމަށް ހުށަހެޅި ކުންފުނި ތަކުން މާ ބޮޑު އަދަދެއް ޖަހާފައިވާ ކަމަށް ބުނުފަހު ކަމަށެވެ. ދެ ވަނަ ބީލަމަށް 5 ކުންފުންޏަކުން ކުރިމަތިލި ކަމަށާއި، ޖަވާބެއް ނުލިބި ގިނަ ދުވަސް ވާތީ ޖަވާބެއް ހޯދުމަށް ކުރި މަސައްކަތުން އެހެން ކުންފުންޏަކާ އެ މަސައްކަތް ހަވާލު ކޮށްފައިވާ ސްޓެލްކޯ އިން ބުނެފައިވާ ކަމަށެވެ.

ލިޔެކިއުން ތަކުން އިނގޭ ގޮތުގައި މި މަސައްކަތް ހަވާލު ކޮށްފައިވަނީ 7 ދުވަސް ތެރޭގައި މަސައްކަތް ނިންމާނެ ކަމަށް ބުނެ، އަގުގެ ގޮތުގައި 756،000 ރުފިޔާ ހުށަހަޅާފައިވާ ކުންފުންޏަކަށެވެ. ނަމަވެސް މިއަށް ވުރެ ކުޑަ އަގެއް ގައި އަދި 3 ދުވަސް ތެރޭގައި މަސައްކަތް ނިންމުމަށް ހުށަހެޅި ކުންފުނިތައް ހުރިކަން ހާމަވެ އެވެ. އެއީ މި މަސައްކަތް ކުރާ ތަޖުރިބާ ހުރި ކުންފުނިތައް ކަމަށް ވެސް ލިޔެ ކިއުން ތައް ހިއްސާ ކުރި މީހާ ބުންޏެވެ.

މީގެ އިތުރުން، އެ ކުންފުނިން ވަނީ މައްސަލަ ބަލައި ދިނުމަށް އެދި މިމަހުގެ 23 ވީ ބުރާސްފަތި ދުވަހު އޭސީސީ އަށް ހުށަހަޅާފައިވަ އެވެ. އިންސާފު ލިބޭނެ ކަމަށް ގަބޫލު ނުކުރާ ކަމަށާއި، ނަމަވެސް ޖެންސެޓުތަކެއް ރަށްރަށަށް ފޮނުވުމުގެ މަސައްކަތް ވަކި ކުންފުންޏަކާ ހަވާލުކޮށް ކޮރަޕްޝަން ހިންގާފައިވާ ކަމަށް އެ މީހާ ތުހުމަތު ކޮށްފައިވެ އެވެ. އަދި އެކަން ސްޓެލްކޯ އިން ސިއްރު ކުރުމަށް ވެސް ވަރަށް މަސައްކަތް ކޮށްފައިވާ ކަމަށް އެމީހާ ބުންޏެވެ.

މި މައްސަލައާ ގުޅިގެން ރާއްޖެއެމްވީ އަށް ސެޓެލްކޯގެ މީޑީއާ އޮފިޝަލް ވިދާޅުވީ މޯލްޑިވްސް ޕޯރޓް ލިމިޓެޑް ހުޅުމާލެ ޕޯރޓްގައި ހުރި ޖަނަރޭޓަރ އަދި ސްޓެލްކޯގެ ހެޑް އޮފީހު ސްޓޯރު ގައި ހުރި ޖަނަރޭޓަރތަކާއި ގުޅުން ހުރި ކޭބަލް ނަގައިގެން އއ.މަތިވެރި، ވ.ތިނަދޫ، އއ.ތޮއްޑޫ، އއ.އުކުޅަސް، ކ.ގުރައިދޫ އަދި ކ.ވިލިނގިލި ސްޓެލްކޯ ޕަވަރހައުސް ގެންގޮސް ޕަވަރ ހައުސް އިން ކަނޑައަޅާ ސަރަހައްދުގައި ބަހައްޓައިދިނުމުގެ މަސައްކަތް ކޮށްދޭނެ ކުންފުންޏެއް ހޯދުމަށް ކުރި މަސައްކަތް ކޮށްފައި ވަނީ އިންސާފު ވެރިކޮށް ކަމަށެވެ. އަދި މަސައްކަތް ހަވާލު ކޮށްފައި ވަނީ އެ މަސައްކަތް ކުރުމުގައި އެންމެ ތަޖުރިބާ ހުރި ކުންފުންޏަށް ކަމަށާއި، އުސޫލުގެ ތެރެއިން ޕޮއިންޓް ދީފައިވާ ކަަމަށް އޭނާ ވިދާޅުވި އެވެ.