އެންމެ މޮޅު ކީޕަރަކަށް މާޓިނޭޒް، މޮޅު ޒުވާން ކުޅުންތެރިޔާ އަށް ޔަމާލް

ފްރާންސް ފުޓުބޯޅަ އިން ދުނިޔޭގެ އެންމެ މޮޅު ގޯލު ކީޕަރަށް ދެމުން އަންނަ ޔަޝިން އެވޯޑު އެސްޓަން ވިލާ އަށް ކުޅެމުން އަންނަ އާޖެންޓީނާގެ އެމިލިއާނޯ މާޓިނޭޒް ހޯދިއިރު، އެންމެ މޮޅު ޒުވާން ކުޅުންތެރިޔާ އަށް ދެމުން އަންނަ ކޮޕާ އެވޯޑު ބާސެލޯނާ އަށް ކުޅެމުން އަންނަ ސްޕެއިންގެ ޔަމީން ޔަމާލް ހޯދައިފި އެވެ.

ހޯމަ ދުވަހުގެ ރޭ ފްރާންސްގެ ވެރި ރަށް ޕެރިހުގައި އޮތް އެވޯޑު ހަފުލާގައި އެންމެ މޮޅު ގޯލު ކީޕަރުގެ އެވޯޑު މާޓިނޭޒް ހޯދީ، އުނާއީ ސިމޮން، އަންދްރޭ ލުނިން، ޖުއާންލުއިޖީ ޑޮންނަރުންމާ އަދި މައިކް މައިގްނަންއާ ވާދަކޮށެވެ. އެންމެ މޮޅު ގޯލު ކީޕަރުގެ މަޤާމު ހޯދި މާޓިނޭޒް ވަނީ އެސްޓަން ވިލާގައި މޮޅު ކުޅުމެއް ދައްކައިފަ އެވެ. އޭގެ އިތުރުން އާޖެންޓީނާ އާއެކު އޭނާ ވަނީ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) ކާމިޔާބު ކޮށްފަ އެވެ. އެ މުބާރާތުގެ ތަށި އާޖެންޓީނާ އަށް ހޯދުމުގައި މާޓިނޭޒް މުހިންމު ދައުރެއް އަދާކުރިއިރު، މުބާރާތުގެ އެންމެ މޮޅު ގޯލު ކީޕަރަކަށް ހޮވުނީ ވެސް އޭނާ އެވެ. މިދިޔަ އަހަރު އޮތް ބެލެންޑިއޯ އެވޯޑުގެ އެންމެ މޮޅު ކީޕަރަަކަށް ހޮވުނީ ވެސް މާޓިނޭޒް އެވެ.

މީގެ އިތުރުން އެންމެ މޮޅު ޒުވާން ކުޅުންތެރިޔާ އަށް ދެމުން އަންނަ ކޮޕާ އެވޯޑު ޔަމާލް ކާމިޔާބު ކުރީ ރެއާލް މެޑްރިޑަށް ކުޅެމުން އަންނަ އާޑާ ގުލާ، މެންޗެސްޓަރ ޔުނައިޓެޑަށް ކުޅެމުން އަންނަ ކޮބީ މައިނޫ، މެންޗެސްޓަރ ސިޓީ އަށް ކުޅެމުން އަންނަ ސަވީނިއޯ އަދި ބާސެލޯނާ އަށް ކުޅެމުން އަންނަ ޕައު ސުބާސީއާ ވާދަކޮށެވެ. ބާސެލޯނާގައި ވެސް މޮޅު ކުޅުމެއް ދައްކާފައިވާ ޔަމާލް ވަނީ ސްޕެއިން އާއެކު މިއަހަރު އޮތް ޔޫރޯ ފުުޓުބޯޅަ މުބާރާތް ވެސް ކާމިޔާބު ކޮށްފަ އެވެ. އެ މުބާރާތުގެ އެންމެ މޮޅު ޒުވާން ކުޅުންތެރިޔަކަށް ހޮވުނީ ވެސް ޔަމާލް އެވެ.

މީގެ އިތުރުން މިއަހަރުގެ ބެލެންޑިއޯ އެވޯޑުގެ ފިިރިހެން އެންމެ މޮޅު ކޯޗަކަށް ހޮވުނީ ރެއާލަށް އިރުޝާދު ދެމުން އަންނަ އިޓަލީގެ ކާލޯ އަންޗެލޮޓީ އެވެ. އަންހެން އެންމެ މޮޅު ކޯޗަކަށް ހޮވުނީ އެމެރިކާ ޤައުމީ ޓީމަށް އިރުޝާދު ދެމުންް އަންނަ އެމާ ހަޔެސް އެވެ.