ރައްޔިތުން ނުކުމެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިންތިޚާބުކޮށްފައިވަނީ ރައްޔިތުންގެ ބާރުތައް ސީދާ ރައީސްގެ މުށުތެރެއަށް ލާން ނޫން ކަމަށް ކުރީގެ އެންވަޔަރަންމަންޓް މިނިސްޓަރު އާމިނަތު ޝައުނާ ވިދާޅުވެއްޖެއެވެ.

ހޯމަ ދުވަހު ލާމަރުކަޒީ ނިޒާމުގެ ބާރު ކެނޑޭގޮތަށް މިސަރުކާރުން އަމަލުކުރަމުންދާތީ ލޯކަލް ގަވަރމަންޓް މިނިސްޓަރު އާދަމް ޝަރީފްއާ ބައްދަލުކުރުމަށް އެމްޑީޕީގެ މެންބަރުން އެ މިނިސްޓްރީއަށް ދިޔަ ނަމަވެސް މިނިސްޓަރު ވަނީ ބައްދަލު ކުރުމަށް ދެކޮޅު ހައްދަވާފައެވެ.

އެކަމުގެ ކަންބޮޑުވުންތައް ހިއްސާކޮށް ޝައުނާ ވިދާޅުވީ ރައްޔިތުން ވޯޓުލައި ވެރިކަން ރައީސް މުއިއްޒާއި، ހަވާލުކުރީ ރައްޔިތުންނަށް ލިބިފައިވާ ހުރިހާ ބާރުތައް ސީދާ ރައީސްގެ މުށުތެރެއަށް ލާން ނޫން ކަމަށެވެ. މިސަރުކާރުން ގައުމުގެ ކަންކަން ހިންގަމުންދަނީ ރައްޔިތުން އެދޭ ގޮތަށް ނޫން ކަމަށާއި، ރައްޔިތުންގެ ވިންދާ އިދިކޮޅަށް ކަމަށް އޭނާ ވިދާޅުވިއެވެ.

މީގެ އިތުރުން ޝައުނާ ވިދާޅުވީ 2000 ވަނަ އަހަރުން ފެށިގެން އެމްޑީޕީން އިސްވެ އޮވެ، ޑިމޮކްރަސީގައި ރިފޯމަށް ގިނަ މަސައްކަތްތަކެއް ކޮށްފައިވާ ކަމަށެވެ. ނަމަވެސް މިހާރު ފެނިގެންދަނީ ރީފޯމަށް ކުރި މަސައްކަތުގައި ފަހަތަށް ޖެހޭ މަންޒަރު ކަމަށް އޭނާ ވިދާޅުވިއެވެ.

ލާމަރުކަޒީ ނިޒާމަށް އިޝާރާތް ކުރައްވައި ޝައުނާ ވިދާޅުވީ މިސަރުކާރު މަސައްކަތް ކުރަނީ މިނިޒާމު އެއްކޮށް ފުޑާލުމަށް ކަމަށާއި، މިހެން މަންޒަރު ބަލަން ނުތިބެވޭނެ ކަމަށެވެ.

ޝައުނާ ވިދާޅުވީ ރައްޔިތުންގެ ހައްގުތައް ކަށަވަރު ކުރުމަށް އެމްޑީޕީން އަބަދުވެސް މަސައްކަތް ކުރާނެ ކަމަށެވެ.