އިނގިރޭސި ޕްރިމިއާ ލީގުގައި ލިވަޕޫލާ ދެކޮޅަށް ކުޅުނު މެޗުން މޮޅު ނުވުމުން ދެރަވާ ކަމަށާއި، ނަމަވެސް މެޗުގައި އާސެނަލް އިން ދެއްކީ ރަނގަޅު ކުޅުމެއް ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.
އާސެނަލްގެ އެމިރޭޓްސް ސްޓޭޑިއަމްގައި އާދީއްތަ ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ވެސް އާސެނަލް އިންނެވެ. އޭގެ ފަހުން ލިވަޕޫލް އިން ނަތީޖާ ހަމަހަމަ ކުރި ނަމަވެސް، ދެ ވަނަ ފަހަރަށް ވެސް އާސެނަލް ލީޑު ނެގި އެވެ. ލިވަޕޫލުން ދެ ވަނަ ފަހަރަށް މެޗުގެ ނަތީޖާ ހަމަހަމަ ކުރީ ފަހު ދިހަ މިނެޓުގެ ތެރޭގަ އެވެ.
އެމެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން އާޓެޓާ ބުނީ، މިވަގުތު އާސެނަލް އޮތް ޙާލަތުގައި އެ ޓީމުގެ ކުޅުންތެރިން ދެއްކި ކުޅުމާ މެދު އޭނާ ފަޚުރުވެރިވާ ކަމަށެވެ. މެޗުގެ ފުރަތަމަ ހާފަށް ބަލާއިރު އެ ހާފުގައި އާސެނަލް އިން މެޗު ކޮންޓްރޯލް ކޮށްގެން ކުޅުނު ކަމަށް ވެސް އާޓެޓާ ބުންޏެވެ. ވަކި ވަކި ކަންކަމަށް ބަލާއިރު ވެސް، ކުޅުންތެރިންގެ ފަރާތުން ފެނުނީ ޤަބޫލު ކުރެވޭ ވަރުގެ ކުޅުމެއް ކަމަށް ވެސް އާޓެޓާ ވަނީ ބުނެފަ އެވެ.
މެޗުގެ ނަތީޖާ އަށް އިޝާރާތް ކުރަމުން އާޓެޓާ ބުނީ އެ މެޗުން މޮޅު ނުވުމުން ދެރަވާ ކަމަށެވެ. އެހެން ނަމަވެސް ޖުމުލަ ގޮތެއްގައި އާސެނަލްގެ ކުޅުން ދަށް ނޫން ކަމަށާއި، ދެ ތިން ކަމަކަށް ސަމާލުކަން ދެވުނު ނަމަ، އެ ޓީމު ކޮޅަށް މެޗު އެނބުރުނީސް ކަމަށް ވެސް އާޓެޓާ ބުންޏެވެ. އޭނާ ބުނީ އެކަންކަން ކުރިއަށް އޮތް ތަނުގައި އިތުރަށް ރަނގަޅު ކުރުމަށް ޚާއްސަ ސަމާލުކަމެއް ދޭނެ ކަމަށެވެ.
ލީގު ތާވަލްގައި އާސެނަލް އޮތް މަގާމާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، ފަސް ޕޮއިންޓު ފަހަތުން އާސެނަލް ތިން ވަނައިގައި އޮތްއިރު، އެ މަގާމުގައި އޮންނަން އެއްވެސް ބަޔަކު ބޭނުން ނުވާނެ ކަމަށެވެ. އާސެނަލް ވެސް ބޭނުން ވަނީ ފަސް ޕޮއިންޓުން ކުރީގައި އޮންނަން ކަމަށާއި، ނަމަވެސް މިވަގުތު އާސެނަލް ތިން ވަަނައިގައި އޮތްއިރު ވެސް އެ ޓީމަށް ފުރުސަތު އޮތްކަން އޭނާ ފާހަގަ ކުރި އެވެ.
އާޓެޓާ ބުނީ އާސެނަލް އިން ދެން މަސައްކަތް ކުރާނީ ކުރިއަށް އޮތް މެޗަށް ކަމަށާއި، އޭނާ ބޭނުންވާ ފަދައިން ކުޅުންތެރިން ވެސް ބޭނުން ވަނީ މެޗުތަކުން މޮޅުވެ އާސެނަލް ކުރިއަށް ދާން ކަމަށެވެ. ޚާއްސަކޮށް ކުރިއަށް އޮތް ތަނުގައި އާސެނަލް އިން ރަނގަޅު ކުރަން ހުރި ކަންކަމަށް އިތުރަށް މަސައްކަތް ކުރާނެ ކަމަށް ވެސް އޭނާ ވަނީ ބުނެފަ އެވެ. މިވަގުތު އާސެނަލް ތިން ވަނައިގައި އޮތީ މިހާތަނަށް ކުޅުނު ނުވަ މެޗުން 18 ޕޮއިންޓާ އެކު އެވެ.
