" މަޖިލިސް މެމްބަރުންގެ ރައްޓެހިންނަށް ފްލެޓް ދޭ ވާހަކަ އެބަ ދެކެވޭ، މިކަހަލަ ކަންކަމުގަ ހީ އަކަށް ކަންކަން ދޫކޮށްލައިގެން ނުވާނެ "
މަޖިލީހުގެ ފުލް މެޖޯރިޓީ އޮވެ ޕީއެންސީން އާއްމުންނަށް ދޭން ޖެހޭ ފްލެޓާއި ގޯތި ނުދީ އެކަން ދޫކޮށްލައިގެން ތިބުމުން އާއްމުން ތިބީ މާޔޫސްވެފައި ކަމަށް އޭނާ ވިދާޅުވި
ގަލޮޅު އުތުުރު ދާއިރާގެ މެމްބަރު މުހައްމަދު އިބްރާހިމް (ކުޑޫ)
މަޖިލިސް މެމްބަރުންގެ ރައްޓެހިންނަށް ފްލެޓް ދޭ ވާހަކަ އެބަ ދެކެވޭ ކަމަށާއި މިކަހަލަ ކަންކަމުގައި ހީއަކަށް ކަންކަން ދޫކޮށްލައިގެން ނުވާނެ ކަމަށް ގަލޮޅު އުތުުރު ދާއިރާގެ މެމްބަރު މުހައްމަދު އިބްރާހިމް (ކުޑޫ) ވިދާޅުވެއްޖެއެވެ.
އޭނާ އެފަދައިން ވިދާޅުވީ ހުކުރު ދުވަހު ގޯއްޗާޢި ފްލެޓް ނުދީ ލަސްވަމުންދާތީ އާއްމުން ބޭއްވި ހިނގާލުމުގައި ބައިވެރިވަޑައިގެން ވާހަކަދައްކަވަމުންނެވެ. އާއްމު ރައްޔިތުން އިންތިހާ އަށް ކަންބޮޑުވާ ކަންތައްތަކެއްހުރި ކަމެއްގައި ސަރުކާރުން މިހާރަށް ވުރެ ރަނގަޅަށް ޖާވާބުދާރީވާން ޖެހޭ ކަަމަށް އޭނާ ވިދާޅުވިއެވެ. އަދި މަޖިލީހުގެ ފުލް މެޖޯރިޓީ އޮވެ ޕީއެންސީން އާއްމުންނަށް ދޭން ޖެހޭ ފްލެޓާއި ގޯތި ނުދީ އެކަން ދޫކޮށްލައިގެން ތިބުމުން އާއްމުން ތިބީ މާޔޫސްވެފައި ކަމަށް އޭނާ ވިދާޅުވިއެވެ. ކުޑޫ ވަނީ މި ސަރުކާރު އައި ފަހުން އެއްވެސް ކަމެއްގައި ވާނުވާ އެއް ސާފުނުވާ ކަމަށާއި ގޯއްޗާއި ފްލެޓްގެ މައްސަލައިގައި ވެސް ކަންކަން ހިނގަނީ އެހެން ކަމަށް ސިފަކުރައްވާފައެވެ. އެގޮތުން ގޯއްޗާއި ފްލެޓް ނުދީގެން އާއްމުން އެކި މުއައްސަސާތަކަށް ދާއިރު ވެސް ސަރުކާރަށް އެ ވާހަކަތައް އިވޭ ކަމަށް ނުހެދުމަކީ ކަންބޮޑުވުމެއް ކަމަށް އޭނާ ވިދާޅުވިއެވެ. ކުޑޫ ވަނީ ފްލެޓް މައްސަލައިގައި ހެދި ކޮމިޓީ ވެސް އޮތީ ނަމެއްގައި ކަމަށް ފާހަގަކުރައްވާ އެކަމަށް ވަރަށް ބޮޑަށް ފާޑު ވިދާޅުވެފައެވެ.
ނިމިދިޔަ ސަރުކާރުން ހުޅުވާލި ގެދޮވެރިވެރިޔާ ސްކީމްގެ ދަށުން ހުށަހަޅާފައިވާ ހުރިހާ ފޯމެއް އިވަލުއޭޓްކުރަމުންދާ ކަމަށާއި އުންމީދަކީ މި މަހު ފުލެޓު ލިބޭ މީހުންގެ ފައިނަލް ލިސްޓު އާއްމުކުރުން ކަމަށް ހައުސިންގ މިނިސްޓަރު، އަލީ ހައިދަރު ވަނީ މީގެ ކުރިން ވިދާޅުވެފައެވެ. ރާއްޖެ އެމްވީ އަށް މައުލޫމާތުދެއްވަމުން ހައިދަރު ވިދާޅުވީ ފޯރމްތައް އިވެލުއޭޓްކޮށް ނިމޭ އިރު ޕޮއިންޓްތަކަށް ބަދަލު އައުމުގެ ފުރުސަތު އެބަ އޮތް ކަމަށެވެ. ފްލެޓަށް އެދި ހުށަހެޅި މީހުންގެ ފޯރމްތައް އިވެލުއޭޓްކުރުމުގެ މަރުހަލާގެ ކިހާ އިންސައްތައެއް ނިމިފައިވޭތޯ ސާފުކުރުމަށް ރާއްޖެ އެމްވީން ސުވާލުކުރުމުން ހައިދަރު ވިދާޅުވީ އިވެލުއޭޝަންގެ މަރުހަލާ ކުރިއަށް ގޮސްފައިވާ މިންވަރު އެނގިވަޑައިނުގަންނަވާ ކަމަށެވެ. ނަމަވެސް އިވެލުއޭޝަންގެ މަރުހަލާ މިހާރުވެސް ކުރިއަށްދާކަން އެ މަނިކުފާނު ވަނީ ހާމަކުރައްވާފައެވެ.
ފްލެޓް ލިސްޓަށް ފްލެޓް ދޫކުރުން ހުއްޓާލާފައިވަނީ އެންޓި-ކޮރަޕްޝަން ކޮމިޝަނުން އެންގުމާ ގުޅިގެންނެވެ. ގެދޮރުވެރިޔާ ސްކީމުގެ ދަށުން ހުޅުމާލޭގައި އާޅާ ފްލެޓް އިމާރާތް ތަކުގެތެރެއިން 700 ހައުސިން ޔުނިޓުގެ މަސައްކަތްތައް ނިންމައި އިންޑިއާ ސަރުކާރުން ވަނީ މި ހިނގާ އޮކްޓޯބަރ މަހުގެ ހަތްވަނަ ދުވަހު އެ ތަންތަން ރާއްޖެ އާއިހަވާލުކޮށްފައެވެ.
މި ސްކީމްގެ ދަށުން 15،046 މީހުން ޝަރުތު ހަމަވާ ކަމަށް ކުރީ ސަރުކާރުން ވަނީ ކަނޑައަޅާފައެވެ. އޭރު އެމްޑީޕީގެ ސަރުކާރުން ނިންމީ ފްލެޓަށް އެދި ހުށަހެޅި އެންމެންނަށް ފްލެޓް ދިނުމަށެވެ. އޭގެ ތެރެއިން 4000 ފުލެޓުގެ މަސައްކަތް ކޮންޓްރެކްޓްކޮށް އޭރު މަސައްކަތް ވަނީ ފަށާފައެވެ.
