ހޮނިހިރު ދުވަހު އިޒްރޭލުން އީރާނުގެ އަސްކަރީ މަރުކަޒުތަކަށް ދިން ހަމަލާތަކަށްފަހު އީރާނުގެ މަތީގައިވާ ވައިގެ ސަރަހައްދު ބޭނުންކޮށްގެން އިތުރު ހަމަލާތައް ދިނުމުގެ މިނިވަންކަން މާބޮޑުވެއްޖެ ކަމަށް އިޒްރޭލު އަސްކަރިއްޔާއިން ބުނެފިއެވެ.
ހަމަލާތަކަށްފަހު އިޒްރޭލުގެ އަސްކަރިއްޔާގެ ތަރުޖަމާނު ރިއަރ އެޑްމިރަލް ޑެނިއަލް ހަގާރީ ދެއްވި ބްރީފިންގ އެއްގައި ބުނެފައިވަނީ "އިޒްރޭލަށް މިހާރު އީރާނުގެ މަތީގައިވެސް އިތުރު އަސްކަރީ ހަރަކާތްތައް ހިންގުމުގެ ފުޅާ މިނިވަންކަމެއް ލިބިފައިވާ،" ކަމަށެވެ.
ހޮނިހިރު ދުވަހު އިޒްރޭލުން އީރާނުގެ އަސްކަރީ މަރުކަޒުތަކާއި މިސައިލް ސައިޓުތަކަށާއި އަދި އެހެނިހެން ސަރަޙައްދުތަކަށް އަމާޒުކޮށް ދިން ވައިގެ ހަމަލާ އަކީ އޮކްޓޫބަރު މަހު އިޒްރޭލަށް އީރާނުން ދިން ހަމަލާތަކަށް ބަދަލު ހިފުމުގެ ގޮތުން ދިން ހަަމަލާއެއް ކަމަށް އިޒްރޭލުން ބުނެފައިވެއެވެ.
ހަަމަލާއާ ގުޅިގެން އީރާނުގެ އެއަރ ޑިފެންސް ފޯސްއިން ނެރުނު ބަޔާނެއްގައި ބުނެފައިވަނީ، "އިސްލާމިކް ރިޕަބްލިކްގެ އޮފިޝަލުން ކުރިން ދީފައިވާ އިންޒާރުތަކަށް ބެލުމެއް ނެތި، ޖަރީމާތައް ހިންގާ ޣައިރު ޤާނޫނީ ޒަޔަނިސްޓް ވެރިކަމުގެ ފަރާތުން ނުރައްކާތެރި ޢަމަލުތަކުން ދުރުހެލިވުމަށް އެންގުމުންވެސް، މި ފޭކު ވެރިކަމުން ތެހުރާން، ޚުޒެސްތާން އަދި އިލާމް ޕްރޮވިންސްގެ އަސްކަރީ މަރުކަޒުތަކުގެ ބައިތަކަކަށް ހަލަބޮލިކަން އުފެދޭފަދަ ޢަމަލެއް ހިންގައިފި،" ކަމަށެވެ.
އަނެއްކޮޅުން، މި ހަމަލާއާ ގުޅިގެން އިޒްރޭލުގެ އަނިޔާވެރިކަމަށް އެންމެ ބޮޑަށް ވާގިވެރިވާ އިނގިރޭސިވިލާތުގެ ބޮޑުވަޒީރު ކިއަރ ސްޓާމަރ ހޮނިހިރު ދުވަހު ވިދާޅުވެފައިވަނީ "އިޒްރޭލުން ދިން ހަމަލާތަކަށް އީރާނުން ޖަވާބު ދޭކަށް ނުޖެހޭނެ،" ކަމަށެވެ. އޭނާ އިތުރަށް ވިދާޅުވީ "އީރާނުގެ އަނިޔާވެރިކަމާ ދެކޮޅަށް އިޒްރޭލަށް އަމިއްލަ ނަފްސު ދިފާޢުކުރުމުގެ ޙައްޤު އެބައޮތް ކަމަށް މިބުނަނީ ވަރަށް ސާފުކޮށްކަމަށާއި، އަދި ހަމަ އެހާމެ ސާފުކޮށް ސަރަޙައްދުގައި އިތުރަށް ކަންކަން ގޯސްވިޔަ ނުދީ ހުއްޓުވަން ޖެހޭކަމަށް ގޮވާލަން،" ކަމަށެވެ.
އިޒްރޭލުން އީރާނަށް ހަަމަލާދީފައި މިވަނީ އީރާނުން އިޒްރޭލަށް ދިން މިސައިލް ހަމަލާތަކުގެ ބަދަލު ހިފުމުގެ ގޮތުން އިޒްރޭލުން ހަމަލާދޭނެ އީރާނުގެ ޓާގެޓްތައް ކަނޑައަޅާ އެކަން އެމެރިކާ އާ ހިއްސާ ކޮށްފި ކަމަށް ދާދިފަހުން މީޑިއާ ރިޕޯޓްތައް ބުނެފައިވަނިކޮށެވެ.
