މޯޑު ސާބިތުކޮށްދިނީ ދިވެހި އެތުލީޓުންނަކީ ވެސް ހުނަރުވެރި ބައެއްކަން
މޯޑު ވަނީ ބޮޑީ ބިލްޑިން އަޕް 55 ކެޓަގަރީން ރަން މެޑަލް ހޯދާފައި
ރާއްޖެއަށް ދެވަނަ ރަން މެޑަލް ހޯދައިދިން މޯޑު
ރާއްޖޭގައި ބޭއްވި އޭޝިއަން ބޮޑީބިލްޑިން އެންޑް ފިޒިކް ސްޕޯޓްސް ޗެމްޕިއަންޝިޕްގައި ވާދަކޮށް، ބޮޑީ ބިލްޑިން އަޕް 55 ކެޓަގަރީން ރަން މެޑަލް ހޯދައި މުޙައްމަދު މޫސާ (މޯޑު) ސާބިތުކޮށްދިނީ ދިވެހި އެތުލީޓުންނަކީ ވެސް ހުނަރުވެރި ބައެއްކަމެެވެ.
މޯޑު ހޯދީ ރާއްޖޭގެ ދެ ވަނަ ރަން މެޑަލްއެވެ. މި ކެޓަގަރީން ބޮޑީ ބިލްޑިން ލެޖެންޑު މޯޑު ރަން މެޑަލް ހޯދީ ވަރުގަދަ ޤައުމުތަކުގެ އެތުލީޓުންނާ ވާދަކޮށް، ފަހަތަށް ޖައްސާލުމަށްފަހުއެވެ. މި ކެޓަގަރީގައި މޯޑު ވާދަކުރީ އިރާގު، ވިއެޓްނާމް، މިޔަންމާ އަދި އިންޑިއާގެ ވަރުގަދަ އެތުލީޓުންނާއެވެ. މޯޑު ވަނީ އެންމެ މަތިން ޕޮއިންޓު ހޯދާ، ރަން މެޑަލް ހާސިލްކޮށްފައެވެ. މީގެ ކުރިން އުޒްބެކިސްތާނުގައި ބޭއްވި ވޯލްޑް ބޮޑީ ބިލްޑިން އަދި ފިޒިކްސް ޗެމްޕިއަންޝިޕްގައި ވެސް މޯޑު ވަނީ ވާދަކޮށްފައެވެ. އެ މުބާރާތުގައި ވާދަކޮށް މޯޑު ވަނީ ރާއްޖެއަށް ރިހި މެޑަލް ހޯދައިދީފައެވެ.
ރަން މެޑަލް ހޯދުމަށްފަހު މޯޑު ބުނީ ލިބުނީ އަމިއްލަ ވަޒަނުގައި ބޮޑު މުބާރާތެއް ބޭއްވުނުއިރު، ދިވެހި އެތުލީޓުންނަށާއި އޭނާއަށް ރަނގަޅު ކާމިޔާބެއް ލިބުމަކީ ވަރަށް ހިތްހަމަޖެހޭ ކަމެއް ކަމަށެވެ. މޯޑު ބުނީ ކާމިޔާބީގެ ސިއްރަކީ ބުރަ މަސައްކަތް ކަމަށެވެ. އެގޮތުން މުބާރާތައް ތައްޔާރުވުމަށް ކުރިއަށްގެންދިޔަ ޓްރެއިނިންތަކާއި ޑައިޓްތައް އުނދަގޫކަން ފާހަގަކޮށް މޯޑު ބުނީ، އެކަން ކުރިއަށް ގެންދެވުނީ ރަނގަޅަށް ކަމަށެވެ. މީގެ އިތުރުން މޯޑު ބުނީ އެންމެ ފަހު ވަގުތާ ހަމައަށް ވެސް ކުރިއަށް ދިޔައީ އެއްވެސް މިސްޓޭކެއް ނުހަދާ ކުރިއަށް ދިޔުމުގެ އަޒުމުގައި ކަމަށެވެ. އެގޮތުން ކޯޗުންނާއި ޓްރެއިނަރުން ދޭ އިރުޝާދުގެ އިތުރުން ބޮޑީ ޗެކަޕާއި ކަންކަން ޤަވާއިދުން ކުރިއަށް ގެންދިޔަކަމަށް އޭނާ ބުންޏެވެ.
މޯޑު ބުނީ ދިވެހި ކެޓަގަރީގައި ރަން މެޑަލް ހޯދޭނެ ކަމުގެ ޔަޤީންކަން އޮތް ކަމަށެވެ. ޚާއްސަކޮށް އަމިއްލަ ފަސްގަނޑުގައި މުބާރާތް ބާއްވާތީ އެ ޔަޤީންކަން ބޮޑު ކަމަށް އޭނާ ފާހަގަ ކުރިއެވެ.
މޯޑު ބުނީ އެހެން ޤައުމުތަކުގެ އެތުލީޓުންނާ އަޅާ ބަލާއިރު، ދިވެހި އެތުލީޓުންގެ ފެންވަރު ދަށެކޭ ބުނެވެން ނެތް ކަމަށެވެ. އެގޮތުން އަބަދުވެސް މުބާރާތްތަކަށް އަންނައިރު ބަދަލުވެފައިވަނީ އެކެެއް ނުވަތަ ދެ އެތުލީޓުންކަމަށެވެ. އެހެންކަމުން އަބަދުވެސް ވާދަކުރަނީ ކުރިން ވެސް ވާދަކޮށްފައި ހުރި އެތުލީޓަކާ ކަމަށެވެ. އެގޮތަށް ދިމާވުމުގެ ސަބަބުން އެހެން ޤައުމުތަކުގެ އެތުލީޓުން ކައިރީގައި ވާދަކޮށް، އެ މީހުންނާ ފައި ހަމަކުރަން މާބޮޑު ބިރެއް ނޯންނަކަމަށް މޯޑު ބުންޏެވެ. ކުރިއަށް އޮތް މުބާރާތްތަކުގައި ވެސް ނިކުންނާނީ އެއް އަޒުމެއްގައި، ޤައުމަށް ރީތި ނަން ހޯދައިދޭން ކަމަށް ފާހަގަކުރަމުން މޯޑު ބުނީ، ދިވެހި އެތުލީޓުންނަށް އެކަން ކުރެވޭނެ ކަމަށެވެ.
ކުޅިވަރަށް ބަދަލުތަކެއް އަންނަކަން ފާހަގަ ކުރަމުން މޯޑު ބުނީ ޒުވާން އެތުލީޓުންނަށް ފުރުސަތު އޮތް ކަމަށެވެ. މުބާރާތުގައި ވެސް ޒުވާން އެތުލީޓުން ރަން މެޑަލް ހޯދިކަމަށާއި، އެއީ މިއަދު ބޮޑީ ބިލްޑިނާއި މުޅި ކުޅިވަރު ކުރިއަރަމުން އަންނަކަމުގެ ހެތްކެއް ކަމަށް އޭނާ ބުންޏެވެ. އޭނާ ބުނީ ކުރިއަށް އޮތީ ވަރުގަދަ މުބާރާތެއް ކަމަށާއި، އެމުބާރާތަށް ނުކުންނާނީ ރަން މެޑަލެއް ހޯދުމަށް އަޒުމު ކަނޑައަޅައި، ޤައުމަށް ރީތި ނަމެއް ހޯދައިދިނުމުގެ އަޒުމުގައި ކަމަށެވެ. އެކަމަށް ކުރިއަށް އޮތް ތަނުގައި ބުރަ މަސައްކަތް ކުރަންޖެހޭނެކަން ފާހަގަކޮށް އޭނާ ބުނީ، މިހާރު އެއީ ނުވާވަރުގެ ކަމެއް ނޫން ކަމަށެވެ.
