މި ސަރުކާރުގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަކީ ބާރުގަދަ ބޭފުޅެއް ކަމަށާއި، މުރައިދޫ ގެއިން އެބޭފުޅާ ނުނެރެވޭނެ ކަމަށް ދަ ޑިމޮކްރެޓްސް ރައީސް ހަސަން ލަތީފް ވިދާޅުވެއްޖެއެވެ.
ހޮނިހިރު ދުވަހުގެ ފަށާއިރު ޕްރޮގްރާމްގައި ހަސަން ލަތީފް ވިދާޅުވީ ކުރީގެ ރައީސް މުހައްމަދު ނަޝީދަށް އަމާޒުކޮށްދިން ބޮމުގެ ހަމަލާއާ ގުޅިގެން އެމަނިކުފާނުގެ ސެކިއުރިޓީ ވަރުގަދަ ކުރުމަށް އެމްއެންޑީއެފުން ބޭނުންވި ކަމަށެވެ. ނަޝީދަށް އޮތް ނުރައްކާ ބޮޑުވުމުން އޭރުގެ ހާލަތަށް ބެލުމަށްފަހު މުރައިދޫގެއަށް ބަދަލުކުރީ ކަމަށް އޭނާ ވިދާޅުވިއެވެ.
މުރައިދޫގެއަށް އިޝާރާތް ކުރައްވައި ހަސަން ލަތީފް ވިދާޅުވީ އެގެއަކީ ސެކިއުރިޓީ ވަރުގަދަތަނެއް ކަމަށާއި، އެގެ ހުންނާނީ ވަރަށް ބޮޑަށް ބަންދުވެފައި ކަމަށެވެ. ހަސަން ލަތީފް ވިދާޅުވީ އެގޭގައި ނަޝީދު ދިރިއުޅުއްވީ ނަޝީދަށް އޮތް ނުރައްކަލެއްގެ ސަބަބުން ކަމަށާއި، މަޖިލީހުގެ ރައީސް އޮތް ނުރައްކަލެއްގެ ސަބަބުން ނޫން ކަމަށެވެ. އަދި މިފަދަ ގެއެއްގައި މިހާރުގެ މަޖިލީހުގެ ރައީސް އަބްދުއްރަހީމް ދިރިއުޅުއްވަން ޖެހޭ ސަބަބެއް ނެތް ކަމަށް އޭނާ ވިދާޅުވިއެވެ.
އެއާއެކު ސަރުކާރު ނިންމި ނިންމުމެއް އޮވޭ އުއްތަމަ ފަނޑިޔާރަށާއި، މަޖިލީހުގެ ރައީސްއަށާއި، ރައީސުލްޖުމްހޫރިއްޔާއަށް މި ބޭބޭފުޅުންނަށް މަގާމުގައި ތިއްބަވައިގެން ދިރިއުޅުއްވާނެ ތަނެއް ހަމަޖައްސަން. އެގޮތުން އުއްތަމަފަނޑިޔާރަށާއި، އޭރު ހުންނެވީ މަޖިލީހުގެ ރައީސް އަކަށް ނަޝީދަށް ވެސް 5 އަހަރުގެ ދައުރުގެ ތެރޭގައި ދާއިމީކޮށް އެހެން ބޭފުޅުން ވަޑައިގެންނެވި ނަމަވެސް ޕާމަނަންޓް ތަނެއް ހެދުމުގެ މަޝްވަރާ ކުރެވި ތަން ހުސްކޮށްގެން އެމަސައްކަތެއް ފެށި ހަނދާނެއް ވޭ އޭރު. އެހެންވީމަ އެހެން ގޮތަކަށް ދަންނަވަންޏާ އެތަންތަން ހައްދަވާ ނިމުނީމަ ސަރުކާރުން އުއްތަމަ ފަނޑިޔާރު ރައްޔިތުން މަޖިލީހުގެ ރައީސް އެތަންތަނަށް ބަދަލުވެވަޑައިގަތުން އޮންނަންވާނެ ގޮތަކީ. ކޮންމެވެސް ވަރަކަށް ނަޝީދު މުރައިދޫގޭގައި ހުންނެވިއިރު އެގެއަށް ވަދެ އުޅުނިން އެނގޭތޯ. އެއީ މީހުން ދިރިއުޅޭ ކަހަލަ ފަސޭހަކޮށް ރީތިކޮށް މިޒަމާނުގައި މީހުން ދިރިއުޅެން ބޭނުންވާ ގޮތަށް ހުންނަ ގެއެއް ނޫން. މިދެންނެވީ އެތަނުގެ ފެސިލިޓީ ގޯސްވާހަކައެއް ނޫން. އެހެންނަމަވެސް އަލިކަމާއި، ސެކިއުރިޓީއަށް އެތަން ޕްރޮޓެކްޓް ކުރެވުނީ އެތަން ހުންނާނީ ވަރަށް ބަންދުތަނެއްގެ ގޮތުގައި އެނގޭތޯ.ދަ ޑިމޮކްރެޓްސް ރައީސް ހަސަން ލަތީފް
މިސަރުކާރުގައި އަބްދުއްރަހީމްއަކީ ބާރުގަދަ ބޭފުޅެއްކަން ފާހަގަކުރައްވައި ހަސަން ލަތީފް ވިދާޅުވީ ރާއްޖޭގެ މާލީ ހާލަތު ދަށްވެ، ސަރުކާރުގެ ހަރަދު ބޮޑުވި ނަމަވެސް މުރައިދޫގޭގައި ހުރިހާ އިންތިޒާމެއް ރައީސް ޑރ.މުހައްމަދު މުއިއްޒަށް ހަމަޖައްސަވައިދެއްވަން ޖެހޭނެ ކަމަށާއި، އެމަނިކުފާނަށް މިއަދު އެނޫން ގޮތެއް ނެތް ކަމަށެވެ. އަދި އަބްދުއްރަހީމް ހުންނަވާނީ އެގޭގައި ކަމަށާއި، މުރައިދޫގެއިން އަބްދުއްރަހީމް ނުނެރެވޭނެ ކަމަށް އޭނާ ވިދާޅުވިއެވެ.
އަޅުގަނޑަށް މިހާރު ފެންނަ ގޮތުން ވެއްޖެއްޔާ އެކަން ނުކޮށެއް ރައީސުލްޖުމްހޫރިއްޔާއަކަށް ނުވާނެ. އަބްދުއްރަހީމްއަކީ ރައްޔިތުން މަޖިލީހުގެ ރައީސް. އަބްދުއްރަހީމްއަކީ މިސަރުކާރުގެ ވަރަށް ބާރުގަދަ ބޭފުޅެއް ވެސް މޭ. އެހެންވީމަ އެކަން ކޮށްދެއްވަން ޖެހިވަޑައިގަންނަވާތީއާއެކު އެކަން އެކޮށްދެއްވަނީ. ރައީސް މުއިއްޒަށް އެނޫން ގޮތެއް ވެސް ނޯންނާނެ. އެތާ ބަހައްޓަވަން ޖެހިވަޑައިގަންނަވާނީ އަބްދުއްރަހީމް. ނުވެސް ނެރެވޭނެ. އެއަށްވުރެ ބާރުގަދަކޮށް އަބްދުއްރަހީމް ހުންނެވިތަން އަޅުގަނޑަށް ފެންނަނީ ސަރުކާރުން.ދަ ޑިމޮކްރެޓްސް ރައީސް ހަސަން ލަތީފް
މަޖިލީހުގެ ރައީސް ދިރިއުޅުއްވާ ގެކޮޅު މުރައިދޫ ގޭގައި މަސައްކަތްކުރާ މުވައްޒަފުންނާއި އެ މުވައްޒަފުންގެ މުސާރަ އާއި އިނާޔަތްތައް ވަނީ ސިއްރުކޮށްފައެވެ. އަދި އެކަމާއި ގުޅިގެން 24 އޮކްޓޫބަރު 2024 ގައި ކުރިއަށް ގެންދިޔަ ކޮމެޓީ ވަނީ ސިއްރުކޮށްފައެވެ.
އަބްދުއްރަހީމް މުރައިދޫގެ އަށް ދިރިއުޅުއްވުން ބަދަލުކުރައްވާފައި ވަނީ ޖުލައި މަހުގެ 26 ވަނަ ދުވަހުއެވެ. އެ ގެއަށް ބަދަލުވެވަޑައިގަތީ މުރައިދޫ ގޭގައި ބައެއް މަރާމާތުގެ މަސައްކަތްތައް ކުރުމަށް ފަހުގައެވެ.
