މަސްވެރިން ކިރުވި މަހަށް ފައިސާ ދޭނެ ގޮތެއް ނެތް - މިފްކޯ
ސެޕްޓެމްބަރު 26 ވަނަ ދުވަހުން ފެށިގެން މިހާތަނަށް ޖުމްލަ 9،155،491 ރުފިޔާ ނުދީ އެބަހުރި
މަސްވެރިންނަށް ފައިސާ ނުދޭތީ ކުޑަހުވަދޫގެ މަސްވެރިންވެސް ކުރި މުޒާހަރާގެ ތެރެއިން
މަސްވެރިން ކިރުވި މަހަށް ފައިސާ ދެވޭނެ ގޮތެއް ނެތްކަމަށް މިފްކޯއިން ބުނެފިއެވެ.
މިދިޔަ މަހުގެ 26 ވަނަ ދުވަހުން ފެށިގެން މަސްވެރިން ކިރާފައިވާ މަހަށް ދޭންޖެހޭ 9 މިލިއަން ރުފިޔާ އެބަހުއްޓެވެ. މިފްކޯއިން ބުނީ ސެޕްޓެމްބަރު މަހުގެ 26 ވަނަ ދުވަހުން ފެށިގެން ކިރި މަހުގެ ފައިސާ ހޯދުމަށް ކުރިއެކޭވެސް އެއްގޮތަށް ސަރުކާރާއެކު މިދަނީ ގިނަ މަސައްކަތްތަކެއް ކުރެވެމުން ކަމަށެވެ. އަދި އުންމީދަކީ ވީއެންމެ އަވަހަކަށް ފައިސާ ހަލާސްކުރުން ކަމަށާއި، މިކަމުގައި އިތުރު މައުލޫމާތު ލިބޭ މިންވަރަކުން ހިއްސާކުރާނެ ކަމަށެވެ.
މިފްކޯއިން ހިއްސާކޮށްފައިވާ އަދަދުތައް ދައްކާގޮތުން ފެލިވަރަށް ކިރި މަހަށް ދޭން ޖެހޭ 3.5 މިލިއަން ރުފިޔާ ހުރީ ނުދައްކައެވެ. އަދި ކޫއްޑުއަށް ކިރި މަހަށް ދޭންޖެހޭ 5.45 މިލިއަން ރުފިޔާގެ ނުދީ ހުރި އިރު، އައްޑޫ ފިޝަރީޒް ކޮމްޕްލެކްސްއަށް ކިރި މަހަށް ދޭންޖެހޭ އެއްލައްކަ ރުފިޔާ އެބަހުއްޓެވެ.
ސެޕްޓެމްބަރު 26 ވަނަ ދުވަހުން ފެށިގެން މިހާތަނަށް ޖުމްލަ 9،155،491 ރުފިޔާ ނުދީ އެބަހުއްޓެވެ.
ސެޕްޓެމްބަރު 26 ކުރިން މަސްވެރިންނަށް 17.3 މިލިއަން ރުފިޔާ ދޫކޮށްފައިވަނީ ވެސް މަސްވެރިން މުޒާހަރާކޮށްގެންނެވެ. އެއީ 1 މަސް ދުވަހުގެ ފައިސާއެވެ. އެ ފައިސާ ދޫކުރަން ފެށީ، ފިޝަރީޒް މިނިސްޓްރީގެ ޓީމްތައް ރަށްރަށަށް ނާރުވާ މުޒާހަރާކުރަން ފެށުމުންނެވެ.
މި ސަރުކާރު ވެރިކަމަށް އައީ ކިރާ މަހަށް ވަގުތުން ފައިސާއާއި ޑޮލަރުން ފައިސާ ދޭނެކަމުގެ ވައުދާއެކުއެވެ. ނަމަވެސް މަސްވެރިންނަށް ކިރާ މަހަށް ފައިސާ ނުލިބި މަސްވެރިކަމަށް ނުނުކުމެ އެތައް ފަހަރެއްގެ މަތިންވަނީ މުޒާހަރާކޮށްފައެވެ.
