އދ ގެ ސުލްހައަށް މަސައްކަތްކުރާ ބާރުތަކާ ދެކޮޅަށް އިޒްރޭލުން ދިން ހަމަލާތަކަށްފަހު، ދެކުނު ލުބުނާނުގައި ހުރި އދ ގެ ސުލްހަ ބަލަހައްޓާ ފައުޖުތައް ރައްކާތެރިކުރަންޖެހޭ ކަމަށް އދ ގެ ސަލާމަތީ މަޖިލީހުން ބުނެފިއެވެ.
ހޯމަ ދުވަހު އދ ގެ ސަލާމަތީ މަޖިީލީހުން ނެރުނު ބަޔާނެއްގައި ވަނީ "ހުރިހާ ފަރާތްތަކުންވެސް އދ ގެ ވަގުތީ ބާރުތަކުގެ މުވައްޒަފުންނާއި އިމާރާތްތަކުގެ ސަލާމަތާއި ރައްކާތެރިކަމަށް އިޙްތިރާމްކުރުމަށް" ގޮވާލާފައެވެ.
އެ ބަޔާނުގައި ބުނެފައިވަނީ "އދ. ގެ ސުލްޙަ އަށް މަސައްކަތްކުރާ ބާރުތަކާއި އދ. ގެ އިމާރާތްތައް އެއްވެސް ހާލެއްގައި ހަމަލާއެއްގެ އަމާޒަކަށް ވެގެން ނުވާނެ،" ކަމަށެވެ.
މި ބަޔާން ނެރެފައިވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އދ. ގެ ސުލްޙަ އަށް މަސައްކަތްކުރާ ބާރުތައް "އިޒްރޭލުގެ އެދުމަށް އިޖާބަދީ، ވަގުތީގޮތުން ނުރައްކަލުގެ ތެރެއިން ނުކުތުމަށް،" ގޮވާލައްވާފައިވަނިކޮށެވެ.
އިޒްރޭލުން ވަނީ ހުރި އދ ގެ ވަގުތީ ބާރުތަކުގެ މަރުކަޒުތައް ދޫކޮށް ދިއުމަށް އެމީހުންނަށް އަންގާފައިވެއެވެ.
އދ. ގެ ބާރުތަކުން ބުނެފައިވަނީ އިޒްރޭލުން އެމީހުންގެ މަރުކަޒުތައް ދޫކޮށްލުމަށް ބާރުއަޅަމުންދިޔަ ނަމަވެސް އެމީހުން އެތަނުގައި ދެމިތިބޭނެ ކަމަށެވެ. ހޯމަ ދުވަހު އދ. ގެ ވަގުތީ ބާރުތަކުގެ ތަރުޖަމާނު ވިދާޅުވެފައިވަނީ އެމީހުން ދެކުނު ލުބުނާނުގައި މިތިބީ އދ. ގެ ސަލާމަތީ މަޖިލީހުގެ އަމުރަކާ އެކުގައި ކަމަށާއި، އެހެންކަމުން މި ސަރަޙައްދުގައި އދ ގެ ބާރުތަކުން ދެމިތިބުމާއި، އދ. ގެ ދިދަ ނެގިފައި ހުރުމަކީ މުހިންމު ކަމެއް ކަމަށެވެ.
އދ. ގެ ސުލްޙައަށް މަސައްކަތްކުރާ ބާރުތަކުން ބުނާގޮތުގައި ފާއިތުވި ހަފްތާގައި އިޒްރޭލުން އެތައް ފަހަރެއްގެ މަތިން އެމީހުންގެ މަރުކަޒުތަކަށް ހަމަލާދީފައިވެއެވެ. އެގޮތުން، 48 ގަޑީއިރުގެ ތެރޭގައި ދެފަހަރު ޔުނިފިލްގެ މައި މަރުކަޒަށް ދިން ހަމަލާއެއްގައި ދެމީހަކު ޒަޚަމްވެފައިވެއެވެ.
އދ އިން ވަނީ މި ހަމަލާތައް ހަރުކަށި އިބާރާތުން ކުށްވެރިކޮށްފައެވެ. ހަމަލާތަކާގުޅިގެން އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް އާދީއްތަ ދުވަހު ސޯޝަލް މީޑިއާގައި ކުރެއްވި ޕޯޯސްޓެއްގައި ވިދާޅުވެފައި ވަނީ "އދ. ގެ ސުލްޙައަށް މަސައްކަތްކުރާ ބާރުތަކަށް ދޭ ހަމަލާތަކަކީ ބައިނަލްއަޤްވާމީ ޤާނޫނާ ޚިލާފު ކަމެއް ކަމަށާއި މިއީ ހަނގުރާމައިގެ ކުށަކަށް ވެދާނެ ކަމެއް،" ކަމަށެވެ.
އދގެ ވަގުތީ ބާރުތަކުގައި 50ށް ވުރެ ގިނަ ޤައުމުތައް ހިމެނޭއިރު، އޭގެ ތެރޭގައި އިންޑޮނޭޝިއާ، އިންޑިއާ އަދި އަޔަލޭންޑް ހިމެނޭގޮތަށް، 10,000 އެއްހާ ސުލްޙައަށް މަސައްކަތްކުރާ ފަރާތްތައް އުޅެއެވެ.
