އެމެރިކާއިން އަބަދުވެސް ސައުދީ އަރަބިއްޔާ ދިފާއުކުރާނެ: ފެންޓަގަންގެ ޗީފް

އެމެރިކާ އިން އަބަދުވެސް ސައުދީ އަރަބިއްޔާ ދިފާއު ކުރާނެ ކަމަށް ޕެންޓަގަންގެ އިސްވެރިޔާ ލޮއިޑް އޮސްޓިން ވިދާޅުވެއްޖެއެވެ.

ހޯމަ ދުވަހުގެ ރޭ ކުރެވުނު މި ފޯނު މަޝްވަރާއާ ގުޅޭ ގޮތުން އޮސްޓިން ވިދާޅުވީ، ސައުދީ ޢަރަބިއްޔާގެ ދިފާޢީ ވަޒީރު ޕްރިންސް ޚާލިދު ބިން ސަލްމާނާ މަޝްވަރާކުރެއްވި ކަމަށާއި، މި މަޝްވަރާގައި ސައުދީ ޢަރަބިއްޔާގެ ދިފާއުގައި އަބަދުވެސް އެމެރިކާ އޮންނާނެ ކަމުގެ ޔަޤީންކަން އަނެއްކާވެސް ދެއްވާފައިވާނެ ކަމަށެވެ.

މީގެ އިތުރުން، މެދުއިރުމަތީގައި ހަމަޖެހުން ޤާއިމުކުރުމަށް ސައުދީން ކުރަމުން ގެންދާ މަސައްކަތްތަކަށް ވެސް އޭނާ ޝުކުރު އަދާކުރައްވާފައިވެއެވެ.

މި މަޝްވަރާއާ ގުޅޭގޮތުން ޕްރިންސް ޚާލިދު ހޯމަ ދުވަހު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، މި މަޝްވަރާގައި ސަޢޫދީ ޢަރަބިއްޔާ އާއި އެމެރިކާ އާ ދެމެދު ޤާއިމުކުރެވިފައިވާ އިސްތިރާތީޖީ ގުޅުން މުރާޖަޢާކުރެއްވުމުގެ އިތުރުން، ދެ ޤައުމުގެ މެދުގައި ދިފާޢީ އެއްބާރުލުން އިތުރަށް ހަރުދަނާކުރެވިދާނެ ގޮތްތަކާ މެދުވެސް މަޝްވަރާކުރެވުނު ކަމަށެވެ.

މި މަޝްވަރާ އާ ބެހޭގޮތުން ޕެންޓަގަނުން ނެރުނު ބަޔާނެއްގައި ބުނެފައިވަނީ، އެމެރިކާގެ ޑިފެންސް ސެކްރެޓަރީ އާއި ސައުދީ އަރަބިއްޔާގެ ދިފާއީ ވަޒީރު ވަނީ ދެ ޤައުމަށް ކުރިމަތިވެފައިވާ ނުރައްކާތަކުން ރައްކާތެރިވުމަށްޓަކައި، ދެ ފަރާތުގެ މެދުގައި ގާތް ގުޅުމެއް އުފެއްދުމަށް މަސައްކަތްކުރަން އެއްބަސްވެފައި ކަމަށާއި، މީގެ ތެރޭގައި އީރާނާއި އީރާނުގެ އެހީތެރިކަން ލިބިގެން ހަރަކާތްތެރިވާ ގްރޫޕްތަކުން ކުރިމަތިވާ ނުރައްކާތައްވެސް ހިމެނޭ،" ކަމަށެވެ.