ފާޑުކިއުންތަކާއެކު އަންގާރަ ދުވަހުގެ ދަންވަރާ ހަމައަށް އެޕާޓްމަންޓްތައް ހުސްކުރަން ފުޓްބޯޅަ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލަށް އަންގައިފިއެވެ.

ފުލުހުން ބައްސާމަށް މިފަދައިން އަންގާފައިވަނީ އެޕާޓްމަންޓްތައް ހަވާލުކުރުމަށް އޮކްޓޯބަރު 31 ވަނަ ދުވަހާ ހަމައަށް މުއްދަތު ދިނުމަށް ބައްސާމުގެ ވަކީލުގެ ފަރާތުން ސިޓީއަކުން އެދުމުން އިންސާނިއްޔަތަށްޓަކައި އެގޮތަށް ނިންމުމަށްފަހު އާންމުންގެ ފާޑުކިއުންތައް އަމާޒުވުމުންނެވެ.

އެފްއޭއެމްގެ ހިޔާނާތުގެ މައްސަލައިގައި ތުހުމަތު ކުރެވޭ ބައްސާމް އަދީލް ޖަލީލް (ގ ފަހިވާގެ މާލެ) ގެ އެޕާޓްމަންޓު ފުލުހުންނާ ހަވާލު ކުރުމަށް އަމުރުކޮށްފައިވަނީ ސެޕްޓެމްބަރު މަހުގެ 28 ވަނަ ދުވަހުއެވެ. ދިވެހި ފުލުހުންގެ ޚިދުމަތުން ބުނީ، އެފްއޭއެމްގެ ހިޔާނާތުގެ މައްސަލައިގައި ތުހުމަތު ކުރެވޭ ބައްސާމްގެ މިލްކިއްޔާތުގައިވާ ހުޅުމާލޭ އަމީން އެވެނިއުގެ 2 އެޕާޓްމަންޓު މިހިނގާ އޮކްޓޯބަރު މަހުގެ 6 ވަނަ ދުވަހުގެ ކުރިން ފުލުހުންނާ ޙަވާލު ކުރުމަށް ކޯޓުން އަމުރުކޮށްފައިވާ ކަމަށެވެ.

ނަމަވެސް މުއްދަތު އިތުރުކޮށްދިނުމުން އާންމުންގެ ފާޑުކިއުންތައް އަމާޒުވުމާއެކު، ފުލުހުން ނެރުނު ބަޔާނެއްގައި ބުނެފައިވަނީ 4 ވަނަ ދުވަހު ބައްސާމް އެދުނުގޮތަށް މުއްދަތު އިތުރުކޮށްދެވެން ނެތްކަމަށް އެ ހިދުމަތުން ދިރާސާކޮށް ބެލިބެލުމުން އެނގޭ ކަމަށެވެ.

އެހެންކަމުން މި ދެ އެޕާޓްމަންޓް ހުސްކޮށް ހަވާލުކުރުމުގެ ކަންކަން އެ ހިދުމަތުން ކުރިއަށްގެންދާ ކަމަށެވެ. އަދި އޮކްޓޯބަރު 8 ވަނަ ދުވަހުގެ ރޭ 12:00 އާއި ހަމައަށް އެޕާޓްމަންޓް ހަވާލުނުކޮށްފިނަމަ ގާނޫނީ އިމުގެ ތެރެއިން އެޕާޓްމަންޓް ފުލުހުންގެ ބެލުމުގެ ދަށަށް ނެގުމަށްޓަކައި އަޅަންޖެހޭ ފިޔަވަޅުތައް އަޅަމުންދާނެ ކަމަށެވެ.

އެފްއޭއެމަށް ބޭރުގެ އެކި އިދާރާތަކުން ލިބިފައިވާ ފައިސާ އަށް ޚިޔާނާތްތެރިވެ، މަނީ ލޯންޑަރިން ހިންގާފައިވާ ކަމަށް ތުހުމަތު ކުރެވޭ މައްސަލައިގައި މިހާރު ތަޙްޤީޤު ކުރިއަށް ދިޔަ ހިސާބުން 2 ދަޢުވާއެއް ބައްސާމް އަދީލް ޖަލީލްގެ މައްޗަށް ކްރިމިނަލް ކޯޓަށް ހުށަހަޅާފައިވެއެވެ. އެއީ ހިޔާނަތްތެރިވުމުގެ ކުށުގެ ދައުވާއާއި، މަނީ ލޯންޑަރިންގ ގެ ދައުވާއެވެ. ޕީޖީ އޮފީހުން ވަނީ ލޯންޑަރކުރުމަށް ބޭނުންކޮށްފައިވާ 10،000.00 (ދިހަހާސް އެމެރިކާ ޑޮލަރު) ދައުލަތަށް ނަގައިދިނުމަށްވެސް އެދިފައެވެ.