މި މަހުގެ ނިޔަލަށް އެޕާޓްމަންޓް ހުސްކުރުމަށް ފުރުސަތުދޭން ބައްސާމް އެދިއްޖެ
ހުޅުމާލޭ އަމީން އެވެނިއުގެ 2 އެޕާޓްމަންޓު މިހިނގާ އޮކްޓޯބަރު މަހުގެ 6 ވަނަ ދުވަހުގެ ކުރިން ފުލުހުންނާ ޙަވާލު ކުރަންޖެހޭ
އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް އިދާރާ ބޭރުގައި
މި މަހުގެ ނިޔަލަށް އެޕާޓްމަންޓް ހުސްކުރުމަށް ފުރުސަތުދޭން ފުޓްބޯޅަ އެސޯސިއޭޝަންގެ ފައިސާއިން ހިޔާނާތްތެރިވި ކަމުގެ ދައުވާ އުފުލާފައިވާ އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލު އެދިއްޖެއެވެ.
ފުލުހުން މީޑިއާއަށް ފޮނުވި މެސެޖެއްގައި ބުނެފައިވަނީ އެޕާޓްމަންޓްތައް ހަވާލުކުރުވުމަށް އޮކްޓޯބަރު 31 ވަނަ ދުވަހާ ހަމައަށް މުއްދަތު ދިނުމަށް ބައްސާމުގެ ވަކީލުގެ ފަރާތުން ސިޓީއަކުން އެދިފައިވާ ކަމަށެވެ. އަދި އެ ސިޓީގެ ޖަވާބެއް ދިނުމުގެ މަސައްކަތް ކުރަމުން އަންނަ ކަމަށެވެ.
އެފްއޭއެމްގެ ހިޔާނާތުގެ މައްސަލައިގައި ތުހުމަތު ކުރެވޭ ބައްސާމް އަދީލް ޖަލީލް (ގ ފަހިވާގެ މާލެ) ގެ އެޕާޓްމަންޓު ފުލުހުންނާ ހަވާލު ކުރުމަށް އަމުރުކޮށްފައިވަނީ ސެޕްޓެމްބަރު މަހުގެ 28 ވަނަ ދުވަހުއެވެ.
ދިވެހި ފުލުހުންގެ ޚިދުމަތުން ބުނީ، އެފްއޭއެމްގެ ހިޔާނާތުގެ މައްސަލައިގައި ތުހުމަތު ކުރެވޭ ބައްސާމްގެ މިލްކިއްޔާތުގައިވާ ހުޅުމާލޭ އަމީން އެވެނިއުގެ 2 އެޕާޓްމަންޓު މިހިނގާ އޮކްޓޯބަރު މަހުގެ 6 ވަނަ ދުވަހުގެ ކުރިން ފުލުހުންނާ ޙަވާލު ކުރުމަށް ކޯޓުން އަމުރުކޮށްފައިވާ ކަމަށެވެ.
ފުލުހުން ބުނީ، އެ ދެ އެޕާޓްމަންޓު ފުލުހުންގެ ބެލުމުގެ ދަށަށް ގެނައުމަށްޓަކައި ކުރަންޖެހޭ މަސައްކަތްތައް ފުލުހުން ކުރަމުންދާ ކަމަށެވެ.
އެފްއޭއެމަށް ބޭރުގެ އެކި އިދާރާތަކުން ލިބިފައިވާ ފައިސާ އަށް ޚިޔާނާތްތެރިވެ، މަނީ ލޯންޑަރިން ހިންގާފައިވާ ކަމަށް ތުހުމަތު ކުރެވޭ ބައްސާމް ސަސްޕެންޑު ކުރުމަށް ފީފާ އިންވެސް ވަނީ ނިންމާފައެވެ. އެގޮތުން އޭނާ ސަސްޕެންޑް ކުރީ ނުވަ މަސް ދުވަހުގެ މުއްދަތަކަށެވެ. ފީފާ އިން ބައްސާމް ސަސްޕެންޑު ކޮށްފައިވާއިރު، އޭނާއާ ދެކޮޅަށް ދައުވާ އުފުލައި، އެ މައްސަލައިގެ ޝަރީއަތް ވެސް ވަނީ ފަށައިފަ އެވެ.
މި މައްސަލައިގައި މިހާރު ތަޙްޤީޤު ކުރިއަށް ދިޔަ ހިސާބުން 2 ދަޢުވާއެއް ބައްސާމް އަދީލް ޖަލީލްގެ މައްޗަށް ކްރިމިނަލް ކޯޓަށް ހުށަހަޅާފައިވެއެވެ. އެއީ ހިޔާނަތްތެރިވުމުގެ ކުށުގެ ދައުވާއާއި، މަނީ ލޯންޑަރިންގ ގެ ދައުވާއެވެ. ޕީޖީ އޮފީހުން ވަނީ ލޯންޑަރކުރުމަށް ބޭނުންކޮށްފައިވާ 10،000.00 (ދިހަހާސް އެމެރިކާ ޑޮލަރު) ދައުލަތަށް ނަގައިދިނުމަށްވެސް އެދިފައެވެ.
އެފްއޭއެމުގެ ކުރީގެ ރައީސް ބައްސާމް އަދީލް ޖަލީލް އެއިދާރާގެ ފައިސާ ބޭނުންކޮށް އަމީން އެވެނިއުއިން އެޕާޓްމަންޓެއް (ޕެންޓް ހައުސް) ގަނެފައިވާ މައްސަލާގައި ދައުވާކުރަން ވަނީ ފޮނުވާފައެވެ.
މި ގޮތުން މި މައްސަލާގައި ދައުވާކުރަނީ ބައްސާމާއި އޭނާގެ ގާތް އެކުވެރިޔާ އަދި އެފްއޭއެމުގެ ވަޒީފާގައި ހުރި މ. ހިރިނައިދޫ ހަސަން ވަހީދު (ދޮނާ) އާއި އެފްއޭއެމުގެ ފައިނޭންޝަލް ހެޑް ގއ. ގެމަނަފުށީ ފެހިކުރި މުހައްމަދު އަގީލް އާއި އަމީން ކޮންސްޓްރަކްޝަންގެ މައްޗަށެވެ.
ފުލުހުން ބުނީ ބައްސާމް ހުޅުމާލެ އަމީން އެވެނިއުގެ ދެ އެޕާޓްމަންޓް އެފްއޭއެމުގެ ފައިސާ ބޭނުންކޮށްގެން ގަނެފައިވާ ކަމަށެވެ. އެއީ A1205 އެޕާޓްމަންޓާއި A1206 އެޕާޓްމަންޓް ކަމަށެވެ. އަދި މި އެޕާޓްމަންޓް ގަނެފައިވަނީ ކޮވިޑްގެ ތެރޭގައި ފުޓްބޯޅަ ކުލަބުތަކަށް އެހީވުމަށް 2021 ވަނަ އަހަރު ފީފާއިން ނެގި ލޯނެއްގެ ފައިސާއިން ކަމަށެވެ. މި ލޯނުގެ އަދަދަކީ 1،919،950 (އެއް މިލިއަން ނުވަ ސަތޭކަ ނަވާރަ ހާސް ނުވަސަތޭކަ ފަންސާސް) ޑޮލަރު އެވެ.
ފުލުހުން ބުނީ އެޕާޓްމަންޓް ގަނެފައިވަނީ މި ޑޮލަރު މާރުކޮށްގެން އެކި ކުންފުނިތަކުން އެފްއޭއެމަށް ދީފައިވާ ފައިސާ ހިމަނައިގެން ކަމަށެވެ. މި ގޮތުން އެފްއޭއެމްގެ ތިން މިލިއަން އައްޑިހަ ހަތަރު ހާސް ރުފިޔާ ބޭނުންކޮށްފައިވާކަން ތަހުގީގަށް ސާބިތުވާ ކަމަށެވެ. މީގެ އިތުރުން މި ފައިސާ އެފްއޭއެމުގެ އެކައުންޓަށް ވަންކަން ދެއްކުމަށް ކުންފުންޏެއް ހަދައި ލިޔެކިއުން އުފައްދާފައިވާ ކަމަށެވެ.
މި މައްސަލައިގެ އިތުރުން ބައްސާމް އެހެން ކަމެއްގައި އެފްއޭއެމުގެ 10،000 ޑޮލަރު ބޭނުންކޮށްފައިވާތީވެ އެ މައްސަލައިގައި މިހާރު ވަނީ ދައުވާކޮށްފައެވެ. އޭނާގެ އިތުރުން މި މައްސަލާގައި ދައުވާ ކުރަނީ އަގީލްގެ މައްޗަށް ކަމަށް ވެސް ފުލުހުން ބުނެއެވެ.
އެފްއޭއެމުގެ ފައިސާ އަށް ހިޔާނާތްވެފައިވާތީވެ ބައްސާމްގެ މައްސަލަ ފީފާ އަދި އޭއެފްސީން ވެސް ދަނީ ބަލަމުންނެވެ. މިދިޔަ ޖުލައި މަހު ފުޓްބޯޅައިގެ އެންމެހާ ހަރަކާތްތަކުން އޭނާ ނުވަ މަސްދުވަހަށް ސަސްޕެންޑްކުރީ ވެސް ފީފާއިން ދީފައިވާ އެއް މިލިއަން ޑޮލަރުގެ ލޯނުގެ ފައިސާގެ މައްސަލާގައެވެ.
