ރައީސްގެ ދަތުރުފުޅާއެކު މަޖިލީހުގެ ޖަލްސާތައް އަންނަ ހަފްތާއަށް ފަސްކޮށްފި
މެންބަރުންނަށް ފޮނުވި މެސެޖުގައި ބުނެފައިވަނީ މަޖިލީހުގެ ޖަލްސާތައް ރީބްރޯޑްކާސްޓް ކުރުމަށްޓަކައި ވީޑިއޯ ރޫމެއް ގާއިމްކުރުމުގެ މަސައްކަތް ދާތީ ޖަލްސާ ފަސްކުރިކަމަށް
މަޖިލީހުގެ ރައީސް އިންޑިއާ އައުޓް ކެމްޕޭނުގައި - ރައީސް އިންޑިއާއަށް ކުރައްވާ ދަތުރުފުޅާއެކު މަޖިލީހުގެ ޖަލްސާތައް ވަނީ ފަސްކޮށްފައި
ރައީސް ޑރ. މުހައްމަދު މުއިއްޒު އިންޑިއާއަށް ކުރައްވާ ދަތުރުފުޅާއެކު މަޖިލީހުގެ ޖަލްސާތައް އަންނަ ހަފްތާއަށް ފަސްކޮށްފިއެވެ.
ރައްޔިތުންގެ މަޖިލީހުގެ އިދާރާއިން މަޖިލީހުގެ މެންބަރުންނަށް ފޮނުވި މެސެޖުގައި ބުނެފައިވަނީ ހޯމަ ދުވަހު (07 އޮކްޓޯބަރު) ގައި ފެށުމަށް ހަމަޖެހިފައިވާ ޖަލްސާތައް އަންނަ ހަފްތާގެ ހޯމަ (14 އޮކްޓޯބަރު) އަށް ފަސްކޮށްފައިވާ ކަމަށެވެ. އަދި އެގޮތަށް ނިންމީ މަޖިލީހުގެ ޖަލްސާތައް ރީބްރޯޑްކާސްޓް ކުރުމަށްޓަކައި ވީޑިއޯ ރޫމެއް ގާއިމްކުރުމުގެ މަސައްކަތް ކުރިއަށްދާތީއެވެ.
ނަމަވެސް ރާއްޖެއެމްވީއަށް މައުލޫމާތު ލިބިފައިވާ ގޮތުގައި މަޖިލީހުގެ ޖަލްސާތައް ހަފްތާއަކަށް ފަސްކޮށްފައިވަނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު، އިންޑިއާއަށް ކުރައްވާ ފުރަމާނަ ދަތުރުފުޅެއްގައި ފުރާވަޑައިގަތުމާއި ގުޅިގެންނެވެ. ރައީސްގެ މި ދަތުރުފުޅު ނިންމަވާލައްވާ އެނބުރި ވަޑައިގަންނަވާނީ 10 ވަނަ ދުވަހުއެވެ.
އަދި 10 ވަނަ ދުވަހަކީ ބުރާސްފަތި ދުވަސްކަމުގައި ވެފައި، މަޖިލީހުގެ ޖަލްސާ އޮންނަ ދުވަހަކަށް ނުވާތީ ދެން އެންމެ އަވަހަށް މަޖިލީހުގެ ޖަލްސާއެއް ބޭއްވޭނީ ގަވާއިދުގައި ބުނާގޮތުން ހޯމަ ދުވަހުއެވެ. ރައީސުލްޖުމްހޫރިއްޔާގެ ދެކަނބަލުން މިހިނގާ އޮކްޓޯބަރުމަހުގެ 6ން 10ށް ކުރައްވާ މި ދަތުރުފުޅަކީ އިންޑިއާގެ ރައީސް ދުރޫޕަތީ މުރުމޫގެ ދަޢުވަތަކަށް ކުރައްވާ ދަތުރުފުޅެކެވެ.
އިންޑިއާގެ ރައީސްގެ ދައުވަތަކަށް ރައީސް މުއިއްޒު ކުރައްވާ މި ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީއާއި ހޯމަ ދުވަހު ބައްދަލުކުރައްވާނެއެވެ.
ރައީސުލްޖުމްހޫރިއްޔާއާއި، މަޖިލީހުގެ ރައީސް އަބްދުއްރަހީމް އަބްދުﷲއާއި ދެމެދު ހިޔާލު ތަފާތުވުންތަކެއް އުފެދިފައިވާކަމަށް އަޑު ފެތުރިފައިވާއިރު، ރައީސްގެ މި ދަތުރުފުޅުގައި ބައިވެރިވެފައިވަނީ މަޖިލީހުގެ ޕީއެންސީއަށް ނިސްބަތްވާ މަދު މެންބަރެކެވެ. އޭގެ ތެރޭގައި ޕީއެންސީގެ ޕީޖީ ލީޑަރު އިބްރާހިމް ފަލާހު ބައިވެރިވެވަޑައިގެންނެވިއެވެ.
ރާއްޖެއަށް އިޒްރޭލު ރައްޔިތުންނަށް ނާދެވޭ ގޮތަށް ހުށަހަޅާފައިވާ ބިލާއި، މުހިންމު ގިނަ ބިލްތަކެއް ހިމެނޭހެން މަޖިލީހުގައި މަސައްކަތްތަކެއް ހުއްޓާ މަޖިލީހުގެ ޖަލްސާތައް ފެށުން ފަސްކުރުމާއެކު އާންމުންގެ ފާޑުކިއުން ވަނީ މަޖިލީހަށް އަމާޒުވެފައެވެ.
