ސިނަމާލެ ބްރިޖަށް ބާރުބޮޑުވާ ވަގުތުތަކުގައި ބޮޑެތި ވެހިކަލްތައް އެރުން މަނާ ކުރުމަށް މަޝްވަރާ ކުރަނީ
ބައެއް ވަގުތުތަކުގައި ސިނަމާލެ ބްރިޖު ވަރަށް ބޮޑަށް ޓްރެފިކްވޭ
މާލެއިން ސިނަމާލެ ބްރިޖަށް އަރާ ސަރަހައްދުގައި ފުލުހުން ހަރަކާތްތެރިވަނީ
ސިނަމާލެ ބްރިޖަށް ބާރުބޮޑުވާ ކަމަށް ފާހަގަކުރެވޭ ވަގުތުތަކުގައި ބޮޑެތި ވެހިކަލްތައް އެރުން މަނާ ކުރުމަށް މަޝްވަރާ ކުރަމުންދާ ކަމަށް ފުލުހުން ބުނެފިއެވެ.
މަގުމަތީގެ ސަލާމާއި ރައްކާތެރިކަން ގާއިމް ކުރުމަށް ކުރަމުންދާ މަސައްކަތްތަކާ ގުޅޭގޮތުން ރާއްޖެޓީވީގެ ފަސްކާފު ޕްރޮގްރާމްގައި ސަބް އިންސްޕެކްޓަރ އޮފް ޕޮލިސް ހުސެއިން އަސްލަހް ވިދާޅުވީ މިހާރު ބައެއް ވަގުތުތަކުގައި ސިނަމާލެ ބްރިޖް ވަރަށް ބާރު ބޮޑުވެ ތޮއްޖެހުމުންދާ ކަމަށެވެ. އެވަގުތުތަކުގައި ބަރު ނުވަތަ ބޮޑެތި ވެހިކަލްތައް އެރުން މަނާކުރުމާ މެދު މަޝްވަރާތައް ކުރަމުންދާ ކަމަށާއި، ވަރަށް އަވަހަށް ވަގުތު ކަނޑައެޅި، ގޮތް ނިންމޭނެ ކަމަށް އުންމީދު ކުރާ ކަމަށް އަސްލަހް ވިދާޅުވިއެވެ.
މީގެ ކުރިން ބްރިޖަށް ބޮޑެތި ވެހިކަލްތައް އެރުމުގައި ވަކި ވަގުތެއް ކަނޑައަޅާފައިވާކަން ފާހަގަކުރައްވައި އަސްލަހް ވިދާޅުވީ މިހާރު ވަކި ވަގުތެއް ނެތުމުން ބައެއް ހާލަތްތަކުގައި ބައެއް ދަތިތައް ކުރިމަތިވާ ކަމަށެވެ.
އަސްލަހް ވިދާޅުވީ މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ގިނަ މަސައްކަތްތައް ކުރަމުންދާ ކަމަށެވެ. އެ މަސައްކަތުގެ ދަށުން ސްކޫލުތަކަށް ދަރިވަރުންދާ ވަގުތަކާއި، ނިމޭ ވަގުތުތަކުގައި މަގުތަކުގެ ޓްރެފިކަށް ޚާއްސަ އިސްކަމެއްދޭ ކަމަށް އޭނާ ވިދާޅުވިއެވެ. އަދި ވިދާޅުވީ އެސަރައްހައްދުތަކަށް މުދާ ހިފައިގެންދާ ކުދި ވެހިކަލްތަކަށް ވަނުމުގެ ފުރުސަތު ވެސް ނުދޭ ކަމަށެވެ.
މާލޭގެ މަގުތަކުގެ ތޮއްޖެހުން ކުޑަކުރުމަށް ކުރެވޭނެ މަސައްކަތްތަކާއި ގުޅޭގޮތުން މަޝްވަރާތައް ކުރިއަށް ގެންދާއިރު، ކުރިއަށް އޮތްތަނުގައި މާލެ އަދި ހުޅުމާލޭގެ މަގުތަކުގައި ދުއްވާ ބޮޑެތި ވެހިކަލްތަކާއި، މުދާ ހިފައިގެން ދަތުރުކުރާ ކުދި ޕިކަޕު ދަތުރު ކުރުމަށް ހަރުދަނާ އުސޫލުތައް ކަނޑައަޅާނެ ކަމަށް ފުލުހުން ބުނެއެވެ.
މީގެ އިތުރުން މަގުމަތީގެ ގާނޫނުތަކާއި ގަވާއިދުތައް ތަންފީޒުކުރުމުގެ މަސައްކަތް އިތުރަށް ހަރުދަނާ ކުރުމަށް މަގުމަތީގައި ފުލުހުން ހަރަކާތްތެރިވާ މިންވަރު ވަނީ އިތުރުކޮށްފައެވެ.
