ކިލޯއެއްގެ މަސްތުވާތަކެތި ހިމެނެ މައްސަލައެއްގައި ޒުވާނަކު ހައްޔަރުކޮށްފިއެވެ.
މަސްތުވާތަކެތީގެ މި މައްސަލައާއި ގުޅިގެން ހައްޔަރުކޮށްފައިވަނީ ފުވައްމުލަކަށް ނިސްބަތްވާ 24 އަހަރުގެ ޒުވާނެކެވެ. މިއީ މަސްތުވާތަކެތި ބޭނުންކޮށް ގެންގުޅެ ވިޔަފާރިކުރުމުގެ މައްސަލައެކެވެ. މި މައްސަލައާއި ގުޅިގެން އޭނާގެ ބަންދާއި މެދު ގޮތެއް ނިންމުމަށް ކްރިމިނަލް ކޯތަށް ހާޒިރުކުރުމުން އެ ކޯޓުން ވަނީ އޭނާގެ ބަންދަށް 15 ދުވަސް ދީފައެވެ. އަދި ބަންދުކުރުމަށް އަމުރުކޮށްފައިވަނީ ކަސްޓޯޑިއަލް ޖަލެއްގައެވެ.
ހެކީގެ ނިސްބަތަށް ބަތަށް ބަލާއިރު، އޭނާގެ މައްޗަށް ތުހުމަތުކުރެވޭ ކުށް އޭނާ ކުރިކަމަށް އެކަށީގެންވާ ހެކި ހުށަހަޅާފައިވެއެވެ. އަދި އޭނާ ހައްޔަރުކުރި އިރު ހުރި އެޕާޓްމަންޓުން ޓްރެފިކިންގ މިންގަނޑަށް އަރާ މަސްތުވާތަކެތި އަދި މަސްތުވާތަކެތި ބަންދުކުރަން ބޭނުންކުރާ އާލާތްތައް ވަނީ ފެނިފައެވެ. މީގެ އިތުރުން މީނާއަކީ ނެޓްވޯކެއްގެ ތެރެއިން މަސްތުވާތަކެތި ވިއްކާ ވިޔަފާރިކުރުމުގައި ހަރަކާތްތެރިވާ ފަރާތެއްކަމަށް ފުލުހުން ތުހުމަތުކުރެއެވެ.
މީނާ ބަންދުގައި ބަހައްޓަންޖެހޭ ހާލަތުގެ ގޮތުގައި ބުނެފައިވަނީ ގާނޫނު އަސާސީގެ 49 ވަނަ މާއްދާއާއި، ޖިނާއީ އިޖުރާއަތުގެ ގާނޫނުގެ 59 ވަނަ މާއްދާއާއި 60 ވަނަ މާއްދާއަށް ރިއާޔަތްކޮށް މުޖްތަމައުގެ ސަލާމަތަށް ނުރައްކަލެއް ކުރިމަތިވެދާނެކަމަށް ފެންނާތީއެވެ. އަދި ޝަރީއަތްކުރުމައި ބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ) ގެ (1) ވަނަ ނަންބަރާއި (3) ވަނަ ނަންބަރާއި އަދި (6) ވަނަ ނަންބަރުގައިވާ ކަންކަން ފުރިހަމަވާކަމަށް ކްރިމިނަލް ކޯޓުން ނެރެފައިވާ ބަންދުއަމުރުގައި ބުނެފައިވެއެވެ.
މި މައްސަލައާއި ގުޅިގެން ދިފާއުން ބުނެފައިވަނީ މީނާ ހުރި އެޕާޓްމަންޓުގެ ބަދިގެ އަދި ކޮޓަރިން ގިނަ އަދަދެއްގެ މަސްތުވާތަކެތި އަދި މަސްތުވާތަކެތި ބަންދުކުރާ ތަކެތި ފެނިފައިވާ ކަމަށެވެ. އަދި މި އެޕާޓްމަންޓަކީ މީނާ ދިރިއުޅޭ ތަނެއް ނޫންކަމަށާއި، މީނާ ހައްޔަރުކުރީ އެ އެޕާޓްމަންޓަށް ދިޔަތާ 20 ނޫނީ 30 މިނެޓް ތެރޭގައި ކަމަށެވެ.
ފުލުހުން ބުނެފައިވަނީ މި މައްސަލައާއި ގުޅިގެން ބަލައި ފާސްކުރި އިތުރު އެޕާޓްމަންޓްތަކުންނާއި، ދެ ކާރުން މަސްތުވާތަކެތި ފެނިފައިވާ ކަމަށެވެ. ނަމަވެސް މި ތަކެއްޗާއި މީނާއާއި ގުޅުމެއް ނުވާކަމަށް އޭނާ ވަނީ ބުނެފައެވެ.
މި މައްސަލައިގައި ޖުމްލަ ކިލޯއެއްގެ މަސްތުވާތަކެތި ފެނިފައިވެއެވެ. އަދި ހައްޔަރުކުރެވުނު ޒުވާނާއަކީ ހައްޔަރު އަދި ބަންދު ލޮގަށް ބަލާއިރު ކުށުގެ ރެކޯޑް އޮތް މީހެކެވެ. މީގެ އިތުރުން އިތުރު ބައެއްގެ ބައިވެރިވުން އޮތް މައްސަލައެއްކަމަށް ފުލުހުން ވަނީ ބުނެފައެވެ.
