އިންޑިއާ އަސްކަރިއްޔާ ބޭރުކުރަން ވޯޓު ހޯދައިގެން އައިސް އިންޑިއާގެ އުނގަށް ވެއްޓުމަކީ ހިޔާނާތެއް - އުމަރު
އިންޑިއާގެ ދެ ހެލިކޮޕްޓަރާއި މަތިންދާބޯޓަކާއި ރާޑަ ސްޓޭޝަންތައް އޮޕަރޭޓްކުރަން ތިބީ އިންޑިއާގެ މިނިސްޓްރީ އޮފް ޑިފެންސްގެ މުވައްޒަފުން
ޑރ މުއިއްޒު އިންޑިއާ އައުޓް ކެމްޕޭންގައި
އިންޑިއާ އަސްކަރިއްޔާ ބޭރުކުރަން ވޯޓު ހޯދައިގެން އައިސް އިންޑިއާގެ އުނގަށް ވެއްޓުމަކީ ހިޔާނާތެއް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ރާއްޖެޓީވީގެ ސުވާލަކީ ޕްރޮގްރާމުގައި ވާހަކަދައްކަވަމުން އުމަރު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރު އައީ އިންޑިއާ ސިފައިން ބާލާކަށް ނޫން ކަމަށެވެ. ސަރުކާރު ވެރިކަމަށް އައީ އިންޑިއާގެ އަސްކަރިއްޔާ ބާލަން ކަމަށާއި، މަގުތަކުގައި ޖަހާފައި ހުރި ހޮޅިދަނޑީގައި އަދިވެސް ހަރުކުރި ޕޯސްޓަރުތައް އެބަހުރިކަމަށް އުމަރު ވިދާޅުވިއެވެ. އުމަރު ވިދާޅުވީ އޭގައި އޮތީ އިންޑިއާ ސިފައިން ބާލާ ވާހަކައެއް ނޫން ކަމަށާއި، އޭގައި އޮތީ އިންޑިއާގެ އަސްކަރިއްޔާ ބާލާ ވާހަކަ ކަމަށެވެ.
އުމަރު ވިދާޅުވީ އިންޑިއާގެ އަސްކަރިއްޔާ ކުރިންވެސް އޮތް ގޮތަށް އަދިވެސް ރާއްޖޭގައި އެބައޮތް ކަމަށާއި، އިންޑިއާގެ ދެ ހެލިކޮޕްޓަރާއި މަތިންދާބޯޓަކާއި ރާޑަ ސްޓޭޝަންތައް އޮޕަރޭޓްކުރަން ތިބީ އިންޑިއާގެ މިނިސްޓްރީ އޮފް ޑިފެންސްގެ މުވައްޒަފުން ކަމަށެވެ. އަދި އެއީ އިންޑިއާގެ އަސްކަރިއްޔާގެ މީހެއްކަމުގައި ވިޔަސް އެމީހުންނަނީ އިންޑިއާގެ އަސްކަރިއްޔާގެ ހަތިޔާރު އޮަޕަރޭޓްކުރާ މީހުން ކަމަށެވެ.
އުމަރު ވިދާޅުވީ މި ސަރުކާރު ގެންނަށް ވޯޓު ދިން މީހުންނަށް މި ސަރުކާރުން ހިޔާނާތްވެއްޖެ ކަމަށެވެ. ޕީއެންސީގެ ވަރަށް ގާތް ބޭފުޅުން ތިބޭނެ ކަމަށާއި، އެ ބޭފުޅުންނަށް ދަންނަވަން ބޭނުންވަނީ އެއީ ވަރަށް ބޮޑު ހިޔާނާތެއް ކަމަށް އުމަރު ވިދާޅުވިއެވެ.
އުމަރު ވިދާޅުވީ އިންޑިއާގެ އަސްކަރިއްޔާ ރާއްޖޭގައި ތިބުމަކީ މިނިވަންކަމުގެ ނުރައްކަލެއް ކަމަށެވެ. އަދި އެމީހުން ދިވެހިންނާއި ދެކޮޅަށް ތެދުވާނީ ކޮންދުވަހަކު ކަމެއް ނޭނގޭ ކަމަށާއި، މިނިކާވަގެއް އޮޅުވެއްޖެކަމަށް ހީކޮށް ގޭތެރޭގައި ނިންދަވަން ނުވާނެ ކަަމަށް އުމަރު ވިދާޅުވިއެވެ.
