ފީފާގެ ވަފުދުން މުހިންމު އިދާރާތަކާ ބައްދަލު ކުރަނީ، މައިގަނޑު ބޭނުމަކީ އެފްއޭއެމަށް ދިން ފައިސާ ހޯދުން
26 ސެޕްޓެމްބަރު 2024 | ބުރާސްފަތި 07:45ފީފާގެ ޓީމުން ވަނީ ޕްރޮސެކިއުޓާ ޖެނަރަލް އަލްއުސްތާޛް ޢައްބާސް ޝަރީފުގެ އިތުރުން ދާޚިލީ ވަޒީރު އަލީ އިޙުސާން އާއި، ކުޅިވަރާއި ހަށިހެޔޮ ކަމާ ބެހޭ ވަޒީރު ޢަބްދުﷲ ރާފިޢު (ރާއްޕެ)އާ ވެސް ވަނީ ބައްދަލު ކުރައްވައިފަ އެވެ.
ކުޅިވަރު ވަޒީރު ރާފިޢުއާ ބައްދަލު ކުރެއްވުމަށްފަހު ފީފާ ވަފުދުގެ ބޭފުޅުން އަދި އެފްއޭއެމް ނޯމަލައިޒިން ކޮމެޓީގެ ބައެއް ބޭފުޅުން
ދުނިޔޭގެ ފުޓުބޯޅައިގެ މައި އިދާރާ (ފީފާ) ގެ ޚާއްސަ ވަފުދެއް މިހާރު ރާއްޖެ އަށް ކުރަމުން އަންނަ ދަތުރުގައި، ރާއްޖޭގެ މުހިންމު އިދާރާތަކުގެ ވެރިންނާ ބައްދަލު ކޮށްފި އެވެ.
ފީފާގެ ޚާއްސަ ވަފުދެއް ރާއްްޖެ އަށް ކުރާ މި ދަތުރަކީ، އެފްއޭއެމްގެ ނޯމަލައިޒިން ކޮމެޓީން ކުރަމުން އަންނަ މަސައްކަތުގައި، އެ ކޮމެޓީ އަށް އެހީތެރިކަން ފޯރުކޮށްދިނުމާއި، މުހިންމު ކަންކަމާ ގުޅޭ ގޮތުން މަޝްވަރާ ކުރުމަށް ކުރާ ދަތުރެކެވެ. ހަ ބޭފުޅުން ހިމެނޭ އެ ވަފުދުގެ ޓީމު ރާއްޖެ އައިސްފައި ވަނީ އަންގާރަ ދުވަހު އެވެ. އަދި އެއަށްފަހު އަންނަނީ އެކި އެކި އިދާރާތަކާ ވެސް ބައްދަލު ކުރަމުންނެވެ.
އެގޮތުން ފީފާގެ ޓީމުން ވަނީ ޕްރޮސެކިއުޓާ ޖެނަރަލް އަލްއުސްތާޛް ޢައްބާސް ޝަރީފުއާ ވެސް ބައްދަލު ކުރައްވައިފަ އެވެ. އޭގެ އިތުރުން ދާޚިލީ ވަޒީރު އަލީ އިޙުސާން އާއި، ކުޅިވަރާއި ހަށިހެޔޮ ކަމާ ބެހޭ ވަޒީރު ޢަބްދުﷲ ރާފިޢު (ރާއްޕެ)އާ ވެސް ވަނީ ބައްދަލު ކުރައްވައިފަ އެވެ. މގެ އިތުރުން ވެސް، ސަރުކާރުގެ ކަމާ ގުޅުން ހުރި އެހެން އިދާާރާތަކާ ވެސް ފީފާގެ ވަފުދުން ބައްދަލު ކުރުމަށް ވަނީ ހަމަޖެހިފަ އެވެ.
ޕްރޮސެކިއުޓާ ޖެނަރަލް އައްބާޝް ޝަރީފް އަދި ދާޚިލީ ވަޒީރު އިޙުސާންއާ ކުރެއްވި ބައްދަލުވުމުގައި ބޮޑަށް މަޝްވަރާ ކޮށްފައި ވަނީ، މީގެ ކުރިން އެކި ފަހަރުގެ މަތިން ފީފާ އިން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދީފައިވާ ފައިސާ އަށް ވެފައިވާ ގޮތް ހޯދުމުގެ މަޝްވަރާތަކެވެ. އެކި ފަހަރުތަކުގެ މަތިން، ފީފާ އިން އެފްއޭއެމަށް ދީފައިވާ ފައިސާ އަށް، އެ އިދާރާގެ ކުރީގެ ރައީސް ބައްސާމް އަދީލް ޖަލީލް އާއި ބައެއް އިސްވެރިން ޚިޔާނާތްތެރިވި ކަމުގެ ތުހުމަތު ވަނީ ކޮށްފަ އެވެ. އެކަމާ ގުޅުން ހުރި ތަޙުޤީގު ދިވެހި ފުލުހުންގެ ފަރާތުން ކޮށްފައިވާއިރު، ބައްސާމް އަދި އެހެން ތިން ފަރާތެއްގެ މައްޗަށް ދައުވާ ކޮށްދިނުމަށް އެދި ޕްރޮސެކިއުޓާ ޖެނަރަލްގެ އޮފީހަށް ވަނީ ފޮނުވައިފަ އެވެ.
އެ ދައުވާ ކޮށްދިނުމަށް ދިވެހި ފުލުހުންގެ ފަރާތުން އެދިފައިވާއިރު، މީގެ ކުރިން ވެސް ވަނީ ބައްސާމާ ދެކޮޅަށް ދައުވާކޮށް، ޝަރީއަތްތައް ފަށައިފަ އެވެ. އެއީ ވެސް، އެކި ފަހަރު މަތިން ފީފާ އަދި ބައިނަލްއަޤުވާމީ އިދާރާތަކުން އެފްއޭއެމަށް ދީފައިވާ ފައިސާ ނަހަމަ ގޮތުގައި ބޭނުން ކޮށްފައިވާކަން ތަޙުޤީގަށް އެނގި، އެކަމާ ގުޅޭ ހެކި ހުރުމުން ކޮށްފަައިވާ ދައުވާއެކެވެ. އެ ދައުވާތައް ވަނީ ކްރިމިނަލް ކޯޓަށް ހުށަހަޅައިފަ އެވެ.
ފީފާ އިން ވަނީ ރާއްޖެ ނޯމަލައިޒް ކުރުމަށް ނިންމައި، ފަސް މެމްބަރުންގެ ކޮމެޓީއެއް ވަނީ އައްޔަން ކޮށްފަ އެވެ. ފީފާ އިން ނިންމާފައި ވަނީ 2025 ވަނަ އަހަރުގެ ޖުލައި މަހުގެ އެއް ވަނަ ދުވަހުގެ ނިޔަލަށް ރާއްޖެ ނޯމަލައިޒް ކުރުމަށެވެ. އެ މުއްދަތުގެ ތެރޭގައި އެފްއޭއެމްގެ ކަންކަން ރަނގަޅުކޮށް، އައު އިންތިޚާބެއް ބާއްވައި، އައު ހިންގާ ކޮމެޓީ އެއްވެސް އިންތިޚާބު ކުރަން ޖެހޭނެ އެވެ.
