ފުލުހުންގެ އުނަގަނޑުގައި ފިސްތޯލު އޮންނަ ދުވަހަކީ އަމާންކަން ގާއިމްވެގެންދާނެ ދުވަސް - އުމަރު
ފިސްތޯލު އޮންނަންޖެހޭކަމަށް ދައްކާ ވާހަކަވެސް ބައެއް ފަރާތްތަކުން ގަބޫނުކުރާނެ، އެފަދަ ހިޔާލުތަކަށް ޖާގަ އޮންނަންވާނެ
ކުރީގެ ހޯމް މިނިސްޓަރ އުމަރު ނަސީރު
ދިވެހި ފުލުހުންގެ އުނަގަނޑުގައި ފިސްތޯލު އޮންނަ ދުވަހަކީ ރާއްޖޭގައި އަމާންކަން ގާއިމްވެގެންދާނެ ދުވަސް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ރާއްޖެޓީވީގެ 'ސުވާލަކީ' ޕްރޮގްރާމުގައި ވާހަކަދައްކަވަމުން އުމަރު ވިދާޅުވީ ފުލުހުންނާއި، ސިފައިން އަތުގައި ހަތިޔާރު ހުންނަންޖެހޭކަން ގަބޫލުކުރައްވާ ކަމަށެވެ. އުމަރު ވިދާޅުވީ ރާއްޖެ ގޮސްފައި އޮތް ހިސާބުން ފުލުހުންގެ އުނަގަނޑުގައި ފިސްތޯލު އޮންނަންވާނެ ކަމަށެވެ. އެއީ ކޮންމެހެން އިރުއިރުކޮޅާ ޖަހާކަށް ނޫން ކަމަށާއި، ފިސްތޯލު ގިނަ ފަހަރަށް ޖަހާކަށްވެސް ނުޖެހޭނެ ކަމަށެވެ.
އުމަރު ވިދާޅުވީ ފުލުހުންގެ އުނަގަނޑުގައި ފިސްތޯލު އޮވެއްޖެއްޔާ ކުށްވެރިޔާ އަށް އެކަން އިނގޭނެކަމަށާއި، މީހަކު ރަހީނުކުރުން ފަދަ ކަމެއްކޮށްފި ނަމަ، ފުލުހުން އެ ޖަހާނެކަން ކުށްވެރިއާއަށް އެނގޭނެ ކަމަށެވެ. އެހެންކަމުން މިއަދު ހާލަތު އޮތްގޮތުން ފުލުހުންގެ އުނަގަނޑުގައި ފިސްތޯލު އޮންނަންޖެހޭނެ ކަމަށާއި، އެ އޮންނަންޖެހޭނީ ވެސް ހުރިހާ ފުލުހުންގެ އުނގަނޑުގައި ނޫން ކަމަށެވެ.
ދާދި ފަހުން މާލޭގައި އަންހެނަކު ރަހީނުކޮށް އަނިޔާކުރި މައްސަލައިގައި އާންމުންގެ ފާޑުކިއުމަށް އިޝާރާތްކުރައްވާ އުމަރު ވިދާޅުވީ ބައެއް ފަރާތްތަކުގެ ވިސްނުން ތަންކޮޅެއް "ސޮފްޓް" ކަމަށެވެ. އަދި ފިސްތޯލު އޮންނަންޖެހޭކަމަށް ދައްކާ ވާހަކަވެސް ބައެއް ފަރާތްތަކުން ގަބޫނުކުރާނެ ކަމަށާއި، އެފަދަ ހިޔާލުތަކަށް ވެސް ޖާގަ އޮންނަންވާނެ ކަމަށެވެ.
އުމަރު ވިދާޅުވި ލީޑަރުން އެންމެން ރުއްސައިގެން އުޅޭކަށް ނުޖެހޭ ކަމަށާއި، ލީޑަރުންގެ ޒިންމާއަކީ ކަންކަން އޮންނަ އުސޫލުގެ ތެރެއިންކޮށް އެކަމެއް ނިންމާލުން ކަމަށެވެ.
