މިއަދު އެންމެ ކުޑަމިނުން ސިވިލް ސަރވަންޓުންނަށްވެސް ވަޒީފާގެ ރައްކާތެރިކަމެއް ނެތް: މެމްބަރު އަހުމަދު ދީދީ

މިއަދު އެންމެ ކުޑަމިނުން ސިވިލް ސަރވަންޓުންނަށްވެސް ވަޒީފާގެ ރައްކާތެރިކަމެއް ނެތްކަމަށް މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.

ހަވަރު ބެރުގައި ވާހަކަ ދައްކަވަމުން މަރަދޫ ދާއިރާގެ މެންބަރު އަހުމަދު ދީދީ ވިދާޅުވީ، ރައްޔިތުންގެ ވިންދާ ދެކޮޅަށް ސަރުކާރު ހިންގާނަމަ އެކަމުގެ ނަތީޖާ ރަނގަޅު ނުވާނެ ކަމަށެވެ. އެގޮތުން މި ވެރިކަން ތަފާތުވާނެކަމަށް ރައްޔިތުންވެސް އުއްމީދުތަކެއް ކުރާނެކަމަށް މެމްބަރު ވިދާޅުވިއެވެ.

Advertisement

ވަކިން ޚާއްސަކޮށް، މި ސަރުކާރު ވެރިކަމަށް އައީ ތައުލީމީ ޤާބިލު މީހުން މަޤާމުތަކަށް ގެންނަމުންދާކަމުގެ ވާހަކަތަކާއެކުކަން ފާހަގަ ކުރައްވައި މެމްބަރު ވިދާޅުވީ، އޭރު ރައްޔިތުންވެސް ވޯޓު ދިނީ މިއީ ތަފާތު ފިކުރެއްކަން ޤަބޫލުކޮށްގެން ކަމަށެވެ.

އެހެންނަމަވެސް ކަން ވަމުން ދަނީ އެއާ މުޅިން ޚިލާފަށްކަމަށް މެމްބަރު ވިދާޅުވިއެވެ.  

މެމްބަރު އަހުމަދު ދީދީ ވިދާޅުވީ، އެމްޑީޕީގެ ނިމިދިޔަ ވެރިިކަމުގައި ސިވިލް ސަރވިސްގެ އިތުރުން ސިޔާސީ އެކި މަޤާމުތަކުގައިވެސް އެކި ފިކުރުތަކުގެ މީހުން ގެންގުޅުނު ކަމަށާއި، އެމްޑީޕީއަކީ ތަފާތު ފިކުރުތަކާއެކުވެސް މަސައްކަތް ކުރެވޭ ޕާޓީއެއް ކަމަށެވެ.

އެހެންނަމަވެސް މިއަދު އެންމެ ކުޑަމިނުން ސިވިލް ސަރވަންޓުންނަށްވެސް ވަޒީފާގެ ރައްކާތެރިކަމެއް ނެތްކަމަށް މެމްބަރު ވިދާޅުވިއެވެ. އެގޮތުން ކަސްޓަމްސް، އިމިގްރޭޝަން ފަަދަ ތަންތަނަށް މެމްބަރު އަލިއަޅުވާލެއްވިއެވެ.

މެމްބަރު ވިދާޅުވީ، އަނިޔާވެރިކަމުގެ 5 އަހަރަށްފަހު އޮމާން އަމާން ސަރުކާރެއްވެސް ރައްޔިތުން ދެކެފައިވާ ކަމަށާއި، ނަމަވެސް މިހާރު ކަންކަން ދަނީ އަނިޔާވެރިކަމުގެ މިސްރާބަށް ކަމަށެވެ. އެހެންނަމަވެސް އަނިޔާވެރިވާނަމަ، ރައްޔިތުން އެކަމާ ދެކޮޅަށް ނުކުންނާނެކަމަށްވެސް މެމްބަރު ވިދާޅުވިއެވެ.

މެންބަރު އަހުމަދު ދީދީ ވަނީ ޑރ. މުއިއްޒަކީ ވައުދެއްވެއްޖެނަމަ އެ ވައުދަކާ ހިލާފުވާ ބޭފުޅެއް ކަމަށްވެސް ވިދާޅުވެފައެވެ.